Triomftog

Dissipelskap 292.
“Nou is my siel ontsteld. Wat sal Ek sê? Vader, red My uit hierdie uur? Maar Ek het tog juis met die oog op hierdie uur gekom! Vader, verheerlik u Naam!” (Joh 12:27). Dan die stem uit die Hemel: “Ek het dit verheerlik, en Ek sal dit weer verheerlik.” (v 28).
“Hierdie stem het nie ter wille van My gekom nie, maar ter wille van julle. Nou het die oordeel oor hierdie wêreld aangebreek; nou sal die heerser van hierdie wêreld uitgedryf word. En as Ek van die aarde af verhoog word, sal Ek almal na my toe trek.” (v 30-32).
Wonder jy nog saam met die skare oor “die Christus” en “die Seun van die Mens.”? “Nog ‘n kort tydjie is die lig by julle. Terwyl julle die lig het, leef daarvolgens, sodat die duisternis julle nie oorval nie. Wie in die duisternis leef, weet nie waarheen hy gaan nie. Terwyl julle die lig het, glo in die lig, sodat julle kinders van die lig kan wees.” (v 35-36). Dankie Jesus dat U die lig vir die wêreld is (Joh 8:12) – en my ook na U toe trek!

Stilword in die Psalms. Geseënd om ń seën te wees.
Ps 67.
“Mag God ons genadig wees en ons seën, mag Hy tot ons redding verskyn, Sela sodat sy dade oor die wêreld heen bekend mag word, sy reddende krag onder alle nasies. Mag die volke U loof, o God, mag al die volke U loof! Mag die nasies bly wees en jubel omdat U hulle regverdig regeer en hulle op die aarde lei. Sela Mag die volke U loof, o God, mag al die volke U loof! Die land het sy oes gelewer. God, ons God, het ons geseën. God het ons geseën. Die mense op die hele aarde moet Hom eer.”
Die Here seën ons, sodat ons vir die nasies ń seën sal wees.
En hoe is ons ń seën vir ander? Ons prys die Here voor ander, “sodat sy dade oor die wêreld heen bekend mag word, sy reddende krag onder alle nasies.” C.S. Lewis het gesê dat om iets te prys (in dié geval die Here), maak ons genieting daarvan (van Hom) en ons vreugde in Hom volkome. Deur die Here nie te prys voor en saam met ander nie, ontsê ons nie alleen Hom van sy eer nie, maar ook onsself van vreugde.