KultPlus.com

Përfundon festivali ‘DOA’ në Durrës

Edicioni i dytë i festivalit ndërkombëtar DOA (Durrës Opera Art of Singing) ka ulur siparin me koncertin “Grand Opera Gala”, pas katër ditësh të mbushura me masterclass dhe aktivitete artistike që sollën në Durrës 21 solistë të rinj të operës nga 11 shtete.

Juria ndërkombëtare, me personalitete të njohura të operës si Inva Mula, pianisti dhe pedagogu Richard Barker, si dhe artistë e drejtues institucionesh prestigjioze, shpalli me vendim unanim fitues të çmimit të parë baritonin Mahir Taghizade nga Azerbajxhani.

Çmimi i dytë u nda mes mezzo-sopranos franceze Seraphine Cotrez dhe sopranos shqiptare Blerta Zhegu, e cila u vlerësua gjithashtu me Çmimin e Publikut dhe çmimin “Aleksandër Moisiu”. Çmimi i tretë iu dha baritonit Viktor Yankovskyi nga Ukraina.

Sipas jurisë, niveli artistik i këtij edicioni ishte jashtëzakonisht i lartë, duke e bërë përzgjedhjen e fituesve mjaft të vështirë. Ideatori dhe drejtori artistik i festivalit, baritoni shqiptar me karrierë ndërkombëtare Gëzim Myshketa, e cilësoi suksesin e këtij edicioni një hap të rëndësishëm drejt krijimit të një tradite të përvitshme operistike në Durrës.

“Ëndrra ime është që Durrësi të ketë një festival veror të përvitshëm dhe të bëhet një pikë referimi për operën në rajon”, shprehet Gëzim Myshketa.

Me pjesëmarrjen e artistëve, pedagogëve dhe menaxherëve të njohur ndërkombëtarë, DOA synon ta shndërrojë Durrësin në një qendër të rëndësishme të formimit operistik dhe një destinacion të ri të ekselencës artistike në Evropën Juglindore./tema/ KultPlus.com

Chanel blen prodhuesin më të vjetër të këmishave në botë

Shtëpia franceze e luksit Chanel ka njoftuar blerjen e Charvet, markës historike të njohur për këmishat, kravatat dhe pizhamet e punuara me porosi. Kushtet financiare të marrëveshjes nuk janë bërë publike, por drejtuesit e Chanel-it e kanë cilësuar Charvet si një nga “xhevahiret” më të rralla të modës franceze.

“Tani kemi një emër, Chanel, për gratë dhe një emër, Charvet, për burrat”, ka deklaruar Bruno Pavlovsky, president i sektorit të modës në Chanel. Sipas tij, kufijtë tradicionalë mes modës për gra dhe burra po zbehen gjithnjë e më shumë. “Edhe pse Chanel është e lidhur kryesisht me gratë, po shohim gjithnjë e më shumë burra që blejnë produktet tona. Nga ana tjetër, shumë gra vizitojnë Charvet për të porositur këmisha. Të gjithë janë të mirëpritur”, tha ai.

Pavlovsky beson se kjo marrëveshje mund të shënojë edhe fillimin e një epoke të re për modën e lartë mashkullore. Chanel nuk ka aktualisht një linjë të dedikuar për veshje burrash dhe nuk planifikon të krijojë një të tillë në të ardhmen e afërt. Megjithatë, kompania ka investuar në figura mashkullore të profilit të lartë si ambasadorë të markës, përfshirë reperin ASAP Rocky dhe aktorin Pedro Pascal./ KultPlus.com