Shtepia Muze - Masakra e Poklekut

Revolta e Syzifit
OVL-UÇK Ferizaj
18.06.2026

Romani “Revolta e Syzifit” vazhdon rrugëtimin e tij, duke sjellë përmes letërsisë kujtesën e ngjarjeve që kanë lënë gjurmë në historinë tonë kombëtare.
Në këtë kuadër, 30 ekzemplarë të romanit iu dhuruan OVL-UÇK-së, Dega në Ferizaj.

Me këtë rast, kryetari i OVL-UÇK-së, Dega në Ferizaj, z. Afrim Mehmeti, i dhuroi Syzifit emblemën e UÇK-së, në shenjë respekti për kontributin e tij si pjestarë i Ushtrisë Çlirimtare të Kosovës dhe për përkushtimin e tij në ruajtjen e kujtesës historike të luftës çlirimtare.

Falënderojmë kryetarin e degës, z. Afrim Mehmeti, për mbështetjen dhe përkushtimin në ruajtjen dhe promovimin e kujtesës sonë historike.

Të mos harrojmë.
Të mos heshtim.
Të mos ndalemi.

Revolta e Syzifit
Ferizaj
18.06.2026

Romani “Revolta e Syzifit” vazhdon misionin e tij për ruajtjen dhe përcjelljen e kujtesës historike. Në një takim të veçantë në Ferizaj, dëshmitari i Masakrës së Poklekut dhe luftëtari i lirisë, Fadil Muqolli, i dhuroi ekzemplarë të këtij romani Kryetarit të Komunës së Ferizajt, z. Agim Aliu.
Falënderojmë z. Agim Aliu për mikpritjen dhe gatishmërinë që ky libër i autorit Bardhyl Mahmuti të gjejë rrugën drejt shkollave dhe lexuesve të rinj, duke kontribuar në ruajtjen e së vërtetës historike dhe në edukimin e brezave për sakrificën e popullit tonë për liri.
“Revolta e Syzifit” mbetet një dëshmi e fuqishme letrare për krimet e kryera në Poklek dhe për qëndresën e popullit shqiptar në rrugën drejt lirisë.

Të mos harrojmë.
Të mos heshtim.
Të mos ndalemi.

15.06.2026, Deçan

Në shenjë respekti dhe vlerësimi, Fadil Muqolli i dhuroi Kryetarit të Komunës së Deçanit, z. Bashkim Ramosaj, romanin “Revolta e Syzifit, të autorit Bardhyl Mahmuti.

15.06.2026, Deçan

Sot, në Deçan, u dhuruan 80 ekzemplarë të romanit Revolta e Syzifit, të autorit Bardhyl Mahmuti.
Falënderoj Kryetarin e Komunës së Deçanit, z. Bashkim Ramosaj, për mbështetjen e vazhdueshme, si dhe Drejtorin e DKA-së, z. Besnik Hulaj, për pritjen dhe gatishmërinë që ky donacion i vlefshëm të bëhet pjesë e bibliotekave të shkollave.

Me respekt,
Fadil Muqolli

Bujar Gashi viziton Poklekun e Vjetër dhe bën homazhe në kujtim të viktimave të masakrës

Këngëtari dhe artisti i grupit “UE UE Show”, Bujar Gashi, vizitoi sot Poklekun e Vjetër, ku bëri homazhe pranë varrezave të viktimave të Masakrës së Poklekut, një ndër krimet më të rënda të kryera gjatë luftës në Kosovë.

Gjatë kësaj vizite, ai u prit nga familjari i familjes Muqolli, Fadil Muqolli, në Shtëpinë Muze Masakra e Poklekut, vendi ku u krye kjo masakër makabre. Me këtë rast, Fadil Muqolli ndau rrëfimin e tij për ngjarjet tragjike që kishin ndodhur në Poklekun e Vjetër, duke sjellë dëshmi prekëse mbi sakrificën, dhimbjen dhe qëndresën e familjeve shqiptare gjatë luftës.

Vizita u zhvillua në një atmosferë respekti dhe nderimi, duke kujtuar viktimat e pafajshme dhe duke përcjellë mesazhin e ruajtjes së kujtesës historike si obligim ndaj brezave të sotëm dhe atyre që do të vijnë.

Kujtimi për martirët e Poklekut mbetet i përjetshëm, ndërsa sakrifica e tyre është themel i lirisë që gëzojmë sot.

Lavdi të përjetshme martirëve dhe dëshmorëve të kombit!

Mos harrojmë kurrë sakrificën për liri dhe të vërtetën e historisë sonë.

"Kam frikë se po e zbehim përgjegjësinë e autorëve të krimeve të kryera gjatë luftës me heshtjen tonë"

Fadil Muqolli: “Kam frikë se po e zbehim përgjegjësinë e autorëve të krimeve të luftës me heshtjen tonë” Emocione të forta, lot, heshtje dhe reflektim. Këto ishin ndjenjat që shoqëruan promovimin e romanit “Revolta e Syzifit” të autorit Bardhyl Mahmuti, i mbajtur në Renens të Zvicrës, në organizim të Qendrës “Gjenocidi në Kosovë, Plagë e Hapur”. Në qendër të vëmendjes nuk isht...

Vizitë e historianëve dhe veprimtarëve në Shtëpinë Muze "Masakra e Poklekut"

Pas përfundimit të Konferencës tradicionale dyditore me temë “Perjetësimi i Dëshmorëve dhe Heronjve Kombëtarë 1980-1999”, studiuesit nga Instituti i Historisë “Ali Hadri”-Prishtinë dhe nga Universiteti Shtetëror i Tetovës zhvilluan një vizitë përkujtimore në shtëpinë-muze në Poklek të Vjetër, një nga vendet që bart kujtesën më të dhimbshme të luftës në Kosovë.
Delegacioni përbëhej nga Drejtoresha e Institutit të Historisë “Ali Hadri”-Prishtinë, Prof. Dr. Teuta Shala-Peli dhe veprimtarja e shquar e çështjes kombëtare Saime Isufi, studiuesi dhe Sekretari Shkencor Arbër Hadri, studiuesi dhe shefi i Departamentit të Historisë Kulturore dhe Studimeve Gjinore Orges Drançolli, profesorët nga Universiteti Shtetëror i Tetovës Qerim Dalipi dhe Isak Sherifi, si dhe studiuesit Skender Lutfiu, Luan Teta, Bedri Muhadri, Agron Islami dhe Fatmir Arifi, ky i fundit anëtar i Këshillit Drejtues të Institutit të Historisë. Pjesë e delegacionit ishin gjithashtu arkivistja Bleona Avdiu, si dhe Fitim Krasniqi, Ardiana Bajrami, Teuta Zeqiri, Bukurie Grajçevci dhe Durie Krasniqi nga administrata e Institutit si dhe hulumtuesi Behxhet Gashi që kishte ardhur nga Zvicra. Delegacioni u prit nga Fadil Muçolli, dëshmitar i drejtpërdrejtë i njërit prej krimeve më të rënda gjenocidare të kryera nga forcat shtetërore serbe gjatë luftës në Kosovë. Me dhimbje të thellë dhe emocion të pashuar, ai rrëfeu tragjedinë e familjes së tij, ku u ekzekutuan mizorisht 53 anëtarë të familjeve Muçolli, Elshani, Hoxha dhe Caraku (26 fëmijë, 5 të rinj, 20 gra dhe dy burra). Dëshmia e tij tronditëse nuk përfaqësonte vetëm kujtesën e një familjeje qe kishte pësuar familja e tij, por dhe dramën kolektive të një populli që ende bart plagët e gjenocidit dhe të dhunës shtetërore serbe. Vizita në Poklek të Vjetër mori një dimension të veçantë historik, njerëzor dhe kombëtar, duke rikthyer në vëmendje sakrificën, dhimbjen dhe domosdoshmërinë e ruajtjes së kujtesës historike për brezat që vijnë. Në heshtjen e atij, studiuesit përjetuan nga afër peshën e kujtesës dhe përgjegjësinë morale për ta dokumentuar e transmetuar të vërtetën historike. Me këtë rast, Fadil Muçolli u dhuroi të gjithë studiuesve romanin e autorit Bardhyl Mahmuti, “Revolta e Sizifit”, një vepër letrare që trajton pikërisht krimin gjenocidal të kryer në Poklek të Vjetër. Përmes kësaj vepre, dhimbja individuale ngrihet në nivelin e kujtesës kolektive, ndërsa letërsia shndërrohet në akt dëshmie, rezistence dhe përballjeje me harresën historike.

Me respekt,
Fatmir Arifi, anëtarë i Këshillit Drejtues të Institutit të Historisë.