Samir Choughule

'सम्या सम्या मैफलीत माझ्या' : समीर चौघुलेंचा
प्रत्येकाने पाहण्याजोगा कार्यक्रम

गोवा असो वा महाराष्ट्र, देश विदेशात प्रत्येक मराठी माणसाच्या घरात पोचलेले समीर चौघुले यांच्या ' सम्या सम्या मैफलीत माझ्या ' या एकपात्री कार्यक्रमाबाबत बरेच ऐकून होतो. त्यांच्या या कार्यक्रमाचा १२० वा प्रयोग पणजीत कला अकादमीत नीलेश फातर्पेकर यांनी आयोजित केल्याने सपत्नीक हा प्रयोग पहाण्याची संधी सोडली नाही. मराठी रंगभूमीवर विनोदाचे वेगळे स्थान निर्माण करणाऱ्या समीर चौघुले यांच्या या कार्यक्रमाने १२० प्रयोगांचा टप्पा गाठणे ही तशी निश्चितच अभिमानास्पद बाब . सुमारे अडीच तासांचा आमच्या सम्याचा हा एकपात्री प्रयोग प्रत्यक्ष पाहिल्यानंतर रसिक प्रेक्षकांवर समीर चौघुले यांनी मागील काही वर्षात केलेल्या जादूची कल्पना करता येते. समीर चौघुलेना 'महाराष्ट्राची हास्यजत्रा' या कार्यक्रमातून सारे मराठी जग पहात असताना त्यांचा हा एकपात्री प्रयोग काहीसा वेगळा वाटत असला तरी तब्बल अडीच तास रसिक अजिबात कंटाळणार नाही याची खबरदारी ते घेताना दिसतात आणि ते काम सोपे अजिबात नाही.

समीर चौघुलेना हास्यजत्रेच्या टीमबरोबर रंगमंच गाजवताना मी प्रत्यक्ष एक दोनदा पाहिले आहे. वर्ष दीड वर्षाआधी असावे वास्कोतही त्यांना अशी प्रत्यक्ष भेटण्याची संधी मिळाली होती पण सम्या सम्या हा त्यांचा प्रयोग मात्र वेगळ्या धाटणीचा वाटला आणि त्यानी तो छान रंगवला. 'सम्या सम्या... मैफलीत माझ्या' हा केवळ एक विनोदी कार्यक्रम नाही, तर तो अभिवाचन, निरीक्षणशक्ती, किस्से, नक्कल, अभिनय, संगीत आणि हजरजबाबीपणाचा सुरेख संगम आहे. त्याविषयी असे लिहिता येईल. ही एक आगळीवेगळी अभिवाचन मैफल आहे. यात समीर चौघुले आपल्या खास शैलीत जीवनातील विविध प्रसंग, माणसांचे स्वभाव, नातेसंबंधांतील गंमतीजमती आणि समाजातील विसंगती यांचे रसाळ सादरीकरण करतात. त्यांच्या शब्दफेकीला, आवाजातील चढ-उतारांना आणि अभिनयाला मिळालेली विनोदाची जोड प्रेक्षकांना खिळवून ठेवते. विनोदाचे महामेरू पु ल देशपांडे हे आपले या कलेतील दैवत असल्याचे नम्रपणे सांगतच त्यांचा अभिवाचनाचा वारसा ते पुढे नेत आहेत असे म्हटले तर अतिशयोक्तीपूर्ण ठरू नये.

अभिवाचन हा सहसा गंभीर स्वरूपाचा मानला जातो; परंतु समीर चौघुले यांनी त्यात मनोरंजनाचा अनोखा आयाम जोडला आहे. ते केवळ शब्द वाचत नाहीत, तर प्रत्येक पात्र जगतात.' प्रेम ' या संकल्पनेवर आधारित हा अभिवाचनाचा कार्यक्रम उत्तरोत्तर रंगतच जातो हे सांगायची गरज नाही. समीरजींना सुरेख गळाही देवाने दिला आहे आणि त्याचीही प्रचिती या कार्यक्रमात रसिकाना येते. प्रेमात कसे यशस्वी व्हावे याचे जणू धडेच समीर चौघुले या अभिवाचनात देतात.
त्यांच्या सादरीकरणात विनोद आहे, उपरोध आहे, मिश्किलपणा आहे; पण त्याचबरोबर मानवी स्वभावाचे सूक्ष्म निरीक्षण आणि जीवनाकडे पाहण्याचा सकारात्मक दृष्टिकोनही आहे. म्हणूनच "सम्या सम्या... मैफल" हा कार्यक्रम केवळ हास्याची मेजवानी न राहता एक समृद्ध सांस्कृतिक अनुभव ठरतो. १२० प्रयोगांचा टप्पा गाठणे हे या अभिवाचन मैफलीच्या लोकप्रियतेचे आणि समीर चौघुले यांच्या प्रभावी सादरीकरणाचे जिवंत प्रमाण आहे. प्रत्येकाने सहकुटुंब पहावा असा हा कार्यक्रम आहे.
मराठी रंगभूमीवर विनोदाचे वेगळे स्थान निर्माण
या यशामागे समीर चौघुले यांची प्रतिभा, परिश्रम आणि रसिकांचे अखंड प्रेम आहे. आगामी काळातही "सम्या सम्या... " असेच नवनवे विक्रम प्रस्थापित करत राहो आणि रसिकांचे भरभरून मनोरंजन करत राहो, हीच शुभेच्छा....

श्री. वामन प्रभू - अध्यक्ष - गोवा मराठी पत्रकार संघ ..मनापासून धन्यवाद सर

खूप आनंद आणि समाधान…सम्याच्या मैफिलीला मिळणारे रसिकांचे भरभरून आशीर्वाद आणि उदंड प्रेम बघून खरच भरून येतय…रसिकांच्या आयुष्यातील अडीच तास निखळ आनंदाचे आणि हसरे हवेत या प्रामाणिक हेतूने सुरू केलेल्या या मैफिलींचे आजवर ११६ हाऊसफुल प्रयोग झाले . परदेशातील मराठी रसिकांनी ही या कार्यक्रमावर भरभरून प्रेम केले ..आणि आता..अखिल भारतीय मराठी नाट्य परिषदेनेही दखल घेत अत्यंत मानाचा “सर्वोत्कृष्ट एकपात्री कलावंत” हा पुरस्कार जाहीर केला…कलाकाराला आणखीन काय हव?..मनापासून आभार अखिल भारतीय नाट्य परिषद - बोरिवली शाखा आणि मध्यवर्ती शाखा….आणि मनापासून आभार रसिक माय बाप प्रेक्षक ….