Famous.F

ရုရှတို့ရဲ့ နိုင်ငံပိုင် လမ်းညွှန်နေရာပြစနစ် GLONASS ဟာ နိုင်ငံအပေါ် အမေရိကန်၏ GPS ချိတ်ဆက်မှုဖြတ်တောက်ပစ်မည့် ခြိမ်းခြောက်မှုတွေကြောင့် အဆင့်မြှင့်တင်တိုးချဲ့သွားတော့မည်ဟုဆို

ရုရှ ဟာ ၎င်းတို့ရဲ့ အစိုးရပိုင် လမ်းညွှန်​နေရာပြ စနစ် GLONASS အတွက် မြေပြင်အခြေစိုက်စခန်းများကို ဗင်နီဇွဲလားနိုင်ငံတွင် နေရာချထားသွားတော့မည်ဟုသိရသည်။ ဒါဟာ မော်စကိုနှင့် ကာရာကတ်တို့ကြားက 2018 ခုနှစ် ဆွေးနွေးပွဲတွေထဲက အတည်ပြုခဲ့တဲ့ သဘောတူညီချက်များ အရ လုပ်ဆောင်သွားရမှာလည်းဖြစ်ပါတယ်။

GLONASS ဆိုတာက ဆိုဗီယက်ရုရှရဲ့ ဂြိုလ်တုအခြေပြု လမ်းညွှန်နေရာပြစနစ်ဖြစ်ပါတယ်။ သူရဲ့ လုပ်ဆောင်မှုက အပိုင်းနှစ်ပိုင်းပါဝင်ပြီး (၁)လမ်းကြောင်းရှာ ဂြိုလ်တုများ(အာကာသ) ပိုင်းနဲ့ (၂) မြေပြင် အခြေစိုက်စခန်းများ ထိန်းချုပ်/တိုင်းတာ/ဆက်သွယ်/စောင့်ကြည့်ရေး (Ground based Communication, Control,Monitoring & SLR) ပိုင်း ဆိုပြီးတော့ ခွဲခြားနိုင်မှာဖြစ်ပါတယ်။ မြေအခြေစိုက်စခန်းတွေကတော့ User interface ဘက်ကို ပိုအသားပေးထားတာလည်းဖြစ်ပါတယ်။ သူ့မှာ လမ်းညွှန်ဂြိုလ်တု စုစုပေါင်း ၂၄ လုံး လွှတ်တင်ထားပြီး Km 19000 ကျော်အမြင့်မှာရှိတဲ့ ကမ္ဘာ့ပတ်လမ်းထဲကနေ ပြင်ညီတစ်ခုကို ဂြိုလ်တု ၈ လုံးနှုန်းနဲ့ အလွှာသုံးလွှာ ခွဲခြား လှည့်ပတ်လျက်ရှိပါတယ်။ ဗဟိုထိန်းချုပ်ရေး စခန်းများအပါအဝင် စောင့်ကြည့်ရေးစခန်းနဲ့ ထပ်ဆင်လွှင့်ရုံ သဘောမျိုး မြေပြင်အခြေစိုက်စခန်း များ စုစုပေါင်း ၁၄ ခုခန့် (ပြည်ပ စခန်းများမပါ) ပါဝင်တာဖြစ်ပြီး နိုင်ငံ တွင်းမှာပင် ထပ်မံ၍ မြေပြင်အခြေစိုက်စခန်း ၆ ခု တိုးချဲ့ဖွင့်လှစ်သွားဖို့လျာထားတယ်လို့လည်းသိရပါတယ်။

Roscosmos ရဲ့အဆိုအရတော့ အကယ်၍ ရုရှနိုင်ငံအပေါ် အမေရိကန်က GPS (GNSS) သာ ဖြတ်တောက်ပစ်ခဲ့မယ်ဆိုပါက ကြုံတွေ့ရနိုင်တဲ့ ပြဿနာတွေကို ရေရှည် ရင်ဆိုင်ဖြေရှင်းနိုင်ရန်မှာ သူတို့စနစ်ထပ်ပိုမိုသာလွန်ကောင်းမွန်စေမယ့် ဆက်သွယ်ရေး စနစ်တွေတည်ဆောက်သွားဖို့ပဲရှိမှာဖြစ်တယ်လို့ ဆိုပါတယ်။ ဒါကမြေပြင် အခြေစိုက်စခန်းတွေ တစ်ခုပြီးတစ်ခု ဆက်လက် တည်ဆောက်သွားဖို့ဖြစ်ပြီး မတိုင်မီကပင် မဟာမိတ်နိုင်ငံတွေနဲ့ သဘောတူညီချက်ရယူထားနိုင်ခဲ့တာက တော်တော်လေး အရာရောက်တဲ့ ခြေလှမ်းတွေဖြစ်ခဲ့တယ်လို့ သိရပါတယ်။

GLONASS အတွက် မြေပြင်အခြေစိုက်စခန်းတွေဟာ ဗင်နီဇွဲလားမှာတင်မဟုတ်ဘဲ အခြားသောမဟာမိတ်နိုင်ငံတွေဖြစ်တဲ့ အာရပ်စော်ဘွားများ ပြည်ထောင်စု(UAE)၊ အာဂျင်တီးနား၊ ဘရာဇီးနှင့် ပါရာဂွေးတို့ မှာ တည်ဆောက်သွားနိုင်ဖို့ ဗင်နီဇွဲလားမှာကဲ့သို့ အလားတူသဘောတူညီချက်များရရှိ ထားပြီးဖြစ်တယ်လို့လည်းသိရပါတယ်။ တချို့နေရာတွေမှာဆို လိုအပ်တဲ့ အခြေခံအဆောက်အအုံတွေတောင် စတင်အကောင်အထည်ဖော်ဆောင်ရွက်မှုတွေ ပြုလုပ်နေပြီလည်းဖြစ်တယ်လို့ထုတ်ပြန်ထားပါတယ်။

ယနေ့ ကမ္ဘာပေါ်မှာ လမ်းညွှန်နေရာပြစနစ် အနေနဲ့ GPS (USA)၊ GLONASS (Russia)၊ Galileo (EU) နှင့် Beidou (China) ဆိုပြီး အသုံးပြုနိုင်တဲ့ စနစ်ကြီး (၄) ခုရှိပါတယ်။ (အန္ဒိယ က တည်ဆောက်ဆဲမို့ - Function မဖြစ်သေးပါ။) တစ်ချိန်တည်းမှာပင် Galileo နှင့် Beidou တို့ကတော့ အရပ်သားတွေအတွက် အသုံးပြုနိုင်ဖို့ အဓိက ရည်ရွယ်ဖန်တီးခဲ့ခြင်းဖြစ်ပြီး GPS နှင့် GLONASS တို့ကတော့ စစ်တပ် ကော အရပ်ဘက် ရည်ရွယ်ချက်တွေမှာပါ အသုံးပြုနေကြတာလည်းဖြစ်ပါတယ်။

ဒါပေမယ့် စနစ်လေးခုစလုံးမှာ Perfect ဖြစ်တဲ့ စနစ်တော့မရှိဘဲ အားနည်းချက်ကိုယ်စီနဲ့ Run နေရာခြင်းသာ ဖြစ်ကြပါတယ်။ ပတ်လမ်းကြောင်း အကြီးဆုံး ဂြိုလ်တု အစုအဝေး ကိုပိုင်ဆိုင်ထားတဲ့ တရုတ် စနစ် Beidou ရဲ့အားနည်းချက်က ၎င်းတို့ရဲ့ နိုင်ငံ ပိုင်နက် အတွင်းလောက်ကိုပဲ အဓိက ခြုံငုံမိတာဖြစ်ပါတယ်။ ယန်းကီးတို့ရဲ့ GPS ကတော့ မြောက်ဘက်/တောင်ဘက်ဝန်ရိုးစွန်ဒေသတွေမှာ Blind zone ဖြစ်နေပြီး ဒီနေရာတွေအတွက်ဆို သိပ်အလုပ်မဖြစ်လှဘူးလို့ဆိုနိုင်ပါလိမ့်မယ်။ ရုရှလုပ် GLONASS ကတော့ အမေရိကန် စနစ်ထပ်စာရင် တိကျမှု ပိုင်းအားနည်းချက် ရှိနေပြီး မြေပြင်နဲ့ ၆ မီတာ ကနေ ၁၀ မီတာလောက် လွဲချော်မှုရှိနိုင်ပါတယ်။ (အမေရိကန်က ၃ မီတာကနေ ၄ မီတာလောက်သာ လွဲ) သို့ပေမယ့် သူက အာတိတ် လို ဝင်ရိုးစွန်းဒေသတွေကျပြန်တော့ သူက ဆရာကျတဲ့ အခြေအနေမျိုးမှာရှိနေပြန် ပါတယ်။ ဒီထဲမှာ အားအနည်းဆုံးကတော့ ဥရောပစနစ် Galileo ပဲဖြစ်ပြီး အသုံးပြုသူတွေအဖို့ နှစ်စဉ် အချိန်နဲ့အမျှ Service ပြတ်တောက်မှုတွေ ရင်ဆိုင် ကြုံတွေ့ရတာလည်း ဖြစ်ပါတယ်။

နိုင်ငံတစ်နိုင်ငံတည်းကိုကွက်ပြီး GPS Access မရအောင်လုပ်မယ်ဆိုတော့ နည်းနည်းတော့လုပ်ရခက်နိုင်မယ်ထင်ပါတယ်။ ယနေ့ ခေတ်ရဲ့ ခေတ်ပေါ် Smart phone တွေနဲ့ ခေတ်မီအိမ်သုံးပစ္စည်းအတော်များများမှာ လမ်းညွှန်နေရာပြစနစ်အတွက် အကောင်းဆုံးရလဒ်တွေကိုပေးစွမ်းနိုင်ဖို့ ရာ စနစ်လေးခုလုံးကို ပေါင်းစပ်အသုံးပြုထားလေ့ရှိကြပါတယ်။ ဒါကတစ်ချက်ပါ။ ပြီးတော့ အမေရိကန်အနေနဲ့ ရုရှတစ်ခုတည်းကို ကွက်ပြီး GPS မှချိတ်ဆက်မှု ဖြတ်တောက်ဖို့ဆိုရင် ရုရှကိုသွားတဲ့ အင်တာနက်လိုင်းကို ပိတ်ချင်ပိတ်ဖို့တော့ ရှိချင်ရှိပါလိမ့်မယ်။ အကယ်၍ ထိုသို့ပြုလုပ်ပါမူလည်း US အနေဖြင့် ရုရှအပေါ် ပျံသန်းနေတဲ့ ဂြိုလ်တုတွေကို ပိတ်ထားခဲ့မည်ဆိုပါက ပိုလန်မှ စပြီး ဂျပန်အထိ ရှိတဲ့ ပြတ်တောက်မှု ဧရိယာ ထဲမှာ အမေရိကန်ရော သူ့မဟာမိတ်တွေပါ ရုရှ တို့နှင့် အလားတူ Navigation- Access Denied ဖြစ်ပေါ်နေတော့မှာ လည်းဖြစ်ပါတယ်။

ဒါပေမယ့် မည်သို့ပင်ဆိုစေကာမူ အမေရိကန်တို့ရဲ့ ဆင်ခြင်မျှော်တွေးမှုအပိုင်း ကို မတွက်ဆနိုင်သေးတဲ့ ရုရှတွေအဖို့ အမေရိကန်ဆောင်ရွက်လာနိုင်မယ့်နည်းလမ်းတွေကို ထည့်သွင်းစဉ်းစားနေဖို့ မဖြစ်နိုင်သေးပါဘူး။ ဒါကြောင့် ၎င်းတို့အနေနဲ့ နိုင်ငံပိုင် GLONASS ကိုပဲ စတင်ချဲ့ထွင်ဖို့ ကြိုးစားလာခဲ့ပါတယ်။ ဒီကိစ္စမှာတော့ ယခင်ကပင် ကမ္ဘာ့ပတ်လမ်းအတွင်း ဂြိုလ်တုစုဖွဲ့မှု ခိုင်မာစွာ ရှိနှင့်နေပြီးသား GLONASS အဖို့ မြေပြင်အခြေစိုက် စခန်း Transceiver များထပ်မံတည်ဆောက်နိုင်ခဲ့ပါမူ လမ်းညွှန်စနစ်ရဲ့ တည်ငြိမ်မှုနဲ့ တိကျမှုတွေကို များစွာ ပိုမို အာမခံနိုင်သွားမှာလည်းဖြစ်တယ်လို့ဆိုပါတယ်။ အတိအကျပြောရရင် ကမ္ဘာတဝှမ်းမှာ ပြန့်ကျဲနေတဲ့ မြေပြင်စခန်းတွေ များလေလေ၊ ပိုတိကျ မြန်ဆန်ပြီး ခိုင်မာတည်ငြိမ်လေလေ ဖြစ်မှာဖြစ်တယ်လို့ ဖော်ပြပါရှိပါတယ်။

Source-Russiannewsagency
.F