JAYC TV

: Umushingamateka Vincent Ndagijimana mu nkingi zibiri: Inyishu y’Iterambere n’ukwisigura ku vyo yagirizwa
__________________________________

🎙Ku wa 30 Ntwarante 2026, Intara ya Butanyerera muri commune kayanza yari yaramutse yitegereza ibikorwa bidasanzwe vy’umushingamateka Vincent Ndagijimana. Mu gihe yariko atanguza umugambi ukomeye wo kwubaka ikiraro ku ruzi Mwòógēre, uwo mutegetsi ntiyatebeje no gutanga umuco ku madosiye amwagiriza guhohotera abenegihugu yari yagirijwe mu kiganiro c’abavugizi b’inzego z’igihugu.

👉​Mu gihe imyaka 20 yari ishize ikiraro gihuza imitumba ya Ryamukona, Mutana, Yandaro, Kibuba hamwe na Kivuvu carasenyutse, umushingamateka Vincent Ndagijimana yafashe intambwe yo kugisana akoresheje uburyo bwiwe, Iki gikorwa kikazotwara amafaranga y’amarundi agera ku miliyoni 15 (15.000.000 BIF).

🌁​Iki kiraro co ku ruzi Mwòógēre, gihuza ama zone ya Jene na Kabarore, cari carabaye inyanduruko y’ibibazo bitagira izina: abana ntibashobora kuja kw’ishure imvura yaguye, n’abapfasoni bibungenze vyabagora n'ugushika kw’ivuriro rya Ryamukona. Uyu mushingamateka yizeje ko mu ndwi zibiri gusa, ico kiraro kizoba kironse inyishu, asaba abanyagihugu kukibungabunga.

🪈​Mwomenya ko ​Iki gikorwa c’iterambere kije mu gihe mu kiganiro c’abavugizi ba Reta giheruka kubera mu Kayanza, hari abenegihugu bamwagirije kurenganya abantu n’ukubapfungisha ubusa. Ndagijimana ntiyariye umunwa mu kwishura ivyo yagirizwa:
​"Jewe nk'umushingamateka, njejwe kuvugira abenegihugu, sinjejwe guhohotera umuntu. Mvugira uwahohotewe, sinogaruka ngo ndamurenganye," niko yashikirije.

🗣​Uyu mushingamateka asigura ko bamwe mu bamwidogera babikura ku kutamenya, abandi na bo bakabikora nk’irementanya baba batumwe n’abandi bamushakira ikibi. Yabasavye ko uwufise uwiwe apfunzwe yokwegera inzego zibijejwe kugira ngo zibatunganirize mu mwidegemvyo.

​
🗣​Nk’uko Ndagijimana abishikiriza, amatati menshi akunze kwaduka muri ako gace azanana n’ibibazo vy’ubutare. Yibukije abenegihugu ko ubutare ari ubwa Reta, abahanura kudashira imbere inyungu zabwo kuko bica bibakwegera gukora urudandazwa rwo mu kinywabi rukanatuma bahakwa n'amategeko.

🗣​Mu gusoza, Vincent Ndagijimana yahamagariye abandi bashingamateka kutama barereye amashi ivyo Reta izokora gusa, ahubwo ko botangura gushira mu ngiro imigambi y’iterambere mu bice bavukamwo bagakoresha uburyo bifitiye.

Musomyi muhire Wewe ubona gute uyu mugambi w'umushingamateka wo kwubaka ikiraro mu matungo yiwe ? Ni akarorero canke hari ikindi kivyihishe Inyuma? Shikiriza ivyiyumviro vyawe."

Musomyi muhire Wewe mu gace iwanyu, ubona ari ubuhe buryo abenegihugu n'abashingamateka bafatanije boshobora kwizanira iterambere batarindiriye gusa ivyo Leta izokora?