Ry.w

هلا اصدقاء الكرام في هدا البوست حابة نحكي بدايتي مع الكروشي وكيف اصبحت محترفة في الشغل
بدايتا من اني صغير نحب شغل الكروشي وكنت نشوف فيه شي صعب تعلمه كنت نشوف في عماتي كيف يشتغلو وكانو يخدمو في شيلان حلوات مع الوقت والدراسة والشغل معاش عندي وقت كان وقتي كله برامج وما فيش وقت نتعلم حاجة جديدة لحد ما اتزوجت وشاء الله اني نغترب تزوجت ومشيت امريكا كانت بداية حياة جديدة وصعبة في نفس الوقت من انسانة طول الوقت مشغولة لي انسانة ما عندها ما ادير من الصبح لي الليل بروحي لان كنت جديدة وما عندي اوراق ما نقدر نسوق وزوجي. اغلب وقته في العمل
ما حبيتش نستسلم للفراغ الا اني فيه فكرت اني نلهي نفسي في شي نستفيد منه جتني فكرت الكروشي طلعت مع زوجي اشتريت الادوات واني ما كنت نعرف نشد اليبرة بس قعدة مصممة نتعلم كنت صبورة بديت باليوتيوب دروس لي المبتدئين نحفظ بالغرزة وندرب عليها ما اشتغلت شي لين اتقنت الغرز كلها كنت بجد حاسة اني سعيدة حلو الانسان يتعلم شي جديد مهما كان عمره عندي قناعة ان طالمة نقدرو نتعلمو العمر ما ليه دور امي الا يرحما تقولي الانسان يتعلم لين يموت الف رحمة ونور عليها كانت داعمة ليا بكل معنا الكلمة
المهم من مبتدئة بديت نخش شوي شوي علي الشغل بديت نخدم في مفارش توكات لي بنتي حاجات بسيطة وبديت نطور من نفسي اكتر خيست علي الباترونات (زي الخريطك نوضحلك الشغل)كانت عبارة عن رموز وطبعا كله هدا بالنجليزي واني لغتي ضعيفة بس التكرار خلاني ننجح لحد ما كبرت بنتي حبيت شغل الدميات فا قررت نشتغل ابنتي وحدة كانت اول لعبة وبنتي سمتها (فيدا )اشتغلت عليها اكتر من شهر كنت نغلط ونعاود لحد ما جبتها صح بنتي فرحت بيها هلبا
اصدقائي الا شاف شغلي اقنعوني ان نشتغل ونبيع بس تعرفو شغل مش مرغوب قدرت سعر الدول في الا عجبه وفي الا قالي غالية بس مش اي حد يفهم ان صعب والعسر الا حطيته مازال شوية في الوقت والجهد والمادة لحد في يوم زارتني صديقة وعجبتها لعبتي بنتي قتلي من وين شرتيهالها قوتلها اني اشتغلتها انصدمت قتلي تشتغلي للناس قوتلها اي وعطيتها السعر والوقت الا تبيه اختارت الالوان وبدون نقاش كان واتقة في دوقي وبجد كانت احلي من الاولة وانشهرت الدول ام نظارة وفستان احمد الكل اغرم فيها وبنتها لي اليوم ما تفارق فيها وبديت نحصل في شغل اكتر وكنت نحب التنوع وكل حاجة خدمتها كانت ليها قصة حلوة رح نحكيها في بوسات تانية بعون الله
ان شاء الله ما طولت عليكم وتكون قصتي ملهمة ليكم 🥰🥰🥰🥰