Lungmili Post

Argentina Nih Egypt An Tei Hna I Salah Le A Naule Pawl Zong An Ram Ah An Kir Ruangmang Ve Cang Lai
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐂𝐡𝐢𝐚𝐩𝐚 7 | 2026

Myanmar caan in nihin July 7, zan suimilam 10:30 ah Fifa World Cup i Round of 16 ah Argentina le Egypt an chuih i, Argentina nih 3-2 in an tei hna ca ah Argentina cu Quarter-final an lut cang.

⚽ 15' - Argentina 0-1 Egypt
⚽ 67' - Argentina 0-2 Egypt
⚽ 79' - Argentina 1-2 Egypt
⚽ 83' - Argentina 2-2 Egypt
⚽ 90+3 - Argentina 3-2 Egypt

𝐌𝐞𝐬𝐬𝐢 🐐
1 goal
1 assist
2 big chances created
2 shots on target
2 fouls won
4 shots
6 chances created
12 touches in opponent's box

Thaizing July 8 ah Switzerland le Colombia an chuih ve lai i teinak a hmu mi paoh cu July 12 (Myanmar caan) ah khin Argentina he Quarter-final ah an i tong lai.

Lungmili Post

KIA Ralkap Pakhat Nih Tualchung Mi 2 Meithal In An Kahthah Hna I Amahle Mah Zong Aa That Ve
=========
𝐋𝐮𝐧𝐠𝐦𝐢𝐢𝐥𝐢 𝐏𝐨𝐬𝐭 | 𝐂𝐡𝐢𝐚𝐩𝐚 7 | 2026

Kachin ramkulh, Monghnyin pengkomh, Hwayhkar–Indawgyi lampi cung i a um mi Nyaunghtauk gate a hngaktu Kachin ralkap (KIA) chungtel pakhat nih nizan July 6, zan suimilam 12:00 hrawng ah zu a rit bu in duhpaoh in meithal a kah ruang ah tualchung mi pa 1 le nu 1 tiin minung 2 an nunnak a liam i, cu hnu ah amahle mah zong a nunnak aa laak ve kong, tualchung mi nih nihin July 7 ah an chim.

"Cuka gate a hngaktu KIA ralkap pawl cu Barani rawldawr i beer an din lio ah motorcycle in a kal lio mi mino pakhat an kham i rithaisii (WY) rim na nam tiin an kham hnu ah an velh. Khuabawi pa nih zantlai hnu ah buaibai lo ding in a rak chimh hna i, nangmah cu mi zeidah na si tiin k*t an thlak ve. Cu lio ah cun Mi Tun La Taung an ti mi KIA ralkap pakhat nih duhpaoh in a meithal a puah ruang ah Daw Cho Cho Oo cu hmakhatte ah a nunnak a liam."

"Cun, KIO nih rian an khinh mi khuabawi Ko Aik Hnawng cu hliamhma faak ngaiin a tuar i, nihin July 7 zing ah khan a hliamhma tuar kho ti lo in a nunnak a liam ve. Cu pin ah nu 1 le pa 2 tiin an dihlak fonh minung 3 nih hliamhma an tuar. Cu hnu ah duhpaoh in meithal zuun 13 tiang a puah i lainawngtu KIA ralkap Mi Tun La Taung cu amahle mah meithal in aa kap ve i, a thi ve. Cu bantuk thil a chuah lecangka in tualchung mi cu thinphang thlalau in an um hna i, a thi mi hna ruak zong tuamhlawm lo in an zaam hna," tiah tualchung mi cheukhat nih Shwe Phee Myay News Agency ah an chim.

A luancia June 29 zong ah khan Hpakant peng, Hparpyin khua ah KIO/KIA penguk bawi Seng Aung Nan cu amah chungkhat naihniam a si mi hna pa 3 nih an thah i tidil chung ah a ruak an hlonh. Lainawngtu minung 3 chung ah minung 2 cu KIO/KIA nih an tlaih khawh colh hna i, a zaam mi pa 1 tu cu amah tein hri in aa awkthat, tiah Kachin hrambunh thawngzamhnak nih an thanh mi in theih a si.

Lungmili Post