MAMBO MSETO

YANGA NI WAFALME WA SIMBA TANZANIA

YANGA wako juu zaidi ya Simba wanapopambana hapa Tanzania bila kujali kuwa kuna wakati huko nyuma wao waliwahi kufungwa mengi na Simba. ANAANDIKA IBRAHIM MKAMBA.

Yanga kwenye mashindano ya ubingwa wa nchi hii wameishinda Simba mechi nyingi na wameifunga jumla ya magoli mengi na kufungwa machache kwenye mechi za wao kwa wao.

Ubingwa wa Tanzania kiuhakika ni wa Yanga. Ukiona Simba au timu nyingine inaubeba ubingwa huo ujue kuwa Yanga wana matatizo fulani. Hata wanapokuwa hivyo, wakikosa ubingwa hawashuki zaidi ya wa pili.

Mara nne za mfululizo ambazo Simba walibeba ubingwa, walifanya hivyo zaidi kwa sare nyingi walizozipata Yanga na si kwa wao Yanga kupata matokeo mabaya dhidi ya Simba.

Kwa ufupi Yanga wanapogombea ubingwa wa Tanzania na wanapopambana na Simba ari yao kimapambano huwa juu sana. Kwangu sikushangazwa na matokeo ya Ngao ya Jamii.

Yanga ni timu kubwa na ina wachezaji wakubwa. Inaweza kufanya makubwa Afrika k**a ari yao ya hapa wataihamishia Afrika. Wanapaswa waanze kujijenga hivyo msimu huu.

Simba wana ari kubwa wanaposhiriki mashindano ya Afrika lakini kwa hapa hufanikiwa kutegemea kudorora kwa Yanga tu. Hawana ari waliyonayo kwenye mashindano ya Afrika.

Simba wanachopaswa kufanya ni kuwa na ari ya ubingwa wa hapa k**a walivyo na ari ya mashindano ya Afrika. Wanapaswa wakumbuke ubingwa wa hapa ndiyo utawapa nafasi ya uwakilishi kimataifa. Si kila wakati tutaingiza timu zaidi ya mbili, moja kila mashindano, kwenye mashindano ya Afrika.Nimeshauri.