Azza Meddeb - Hopeful Azza

أي نعم.. يمكن توصل لنهار معادش تعقل فيه روحك..!!
و لهنا منيش نحكي على جسديا أو صوريا!!
لهنا نحكي على عقليتك.. و كيفاش ترى الأمور.. و شنوة تنجم تعمل.. و شنوة تحب تعمل.. و العباد إلي تحب تتعامل معاهم.. و إلي وقتيا معادش عندك الطاقة باش تاخذ و تعطي معاهم...
. ساعات في مراحل معينة من الحياة تتعدى بتحديات حاسمة تمصلك بارشة من طاقتك الجسدية و الروحية و النفسية.. و بالشوية بالشوية تولي أكثر حساسية نوعا ما تجاه بارشة تصرفات.. كلام.. طلبات.. لقاءات..
و لهنا منيش نحكي على حالة اكتئاب.. نحكي على تعب و إرهاق يخليوك تحب تنطوي نسبيا و تدخل قوقعتك.. تفهم روحك.. تواسي روحك.. تحلم و تخطط مع روحك..
مذابيك أقل جوجمة.. و أقل برامج.. و أقل احتكاك بالناس..
نحب نقلك كان حسيت إلي إنت في حاجة باش تقعد مع روحك.. متحشمش.. على خاطر حتى حد مينجم ياخذ بلاصتك و إلا يحس الي تحس فيه و يستوعب إلى تتعدى بيه.. و أكيد الي بالحق يحبك و يعزك باش يبقى يكنلك المودة و التقدير.. رغم قلة التواصل و البعد.. و باش يتفهم.. و يخليك على راحتك.. و يحيى الغربال الحياتي.. أكيد باش يبقى يصفي و إن شاء الله ربي يسخر لنا ديما من يخافه فينا 🤲🌹✨

اليوم نحب نقول كلام من القلب للقلب..!
راو طول ما نحنا عايشين.. الدنيا باش تبقى تعطي فينا بإستمرار في دروس حياتية مختلفة.. إلا أنه لهنا درجة الفهم و الإستيعاب متاعنا أكيد باش تختلف حسب العمر.. الحالة النفسية.. درجة الوعي.. و الخبرة المكتسبة.. و غيره من العوامل..!!

فمذابينا نخليوا كل وقت ياخو وقته.. و نتأملوا مليح في الإشارات و الرسائل اللي تقدمهالنا الدنيا.. و إلي أكيد ثمنها باش يختلف من شخص لشخص.. و من إطار لإطار..!

على خاطر كان باش نسكروا عينينا و نتجاهلوا الواقع.. فما احتمال كبير إنا نسقطوا في فخ اللامبالاة و نكران الحقيقة.. و التكلفة يمكن تكون غالية نوعا ما لاحقا.. عاجلا أو آجلا..!!
و كان زادة باش ناخذوا الأمور بجدية مبالغ فيها.. يمكن نوصلوا لدرجة الإكتئاب الحاد.. و حرق الأعصاب.. إلىي هو زادة عواقبه المعنوية و الجسدية وخيمة بدرجة عالية..!!

الحاصيلو.. نحاولوا قد ما نجموا اتباع منهج لا إفراط و لا تفريط.. و خير الأمور أوسطها.. مع إيلاء قيمة طيبة لدور الحدس و الجانب الروحاني عند إتخاذ قرارات مصيرية نوعا ما..

و الله يوفق الجميع يا رب العالمين 💖 🤲 🌹