Espace LIBRY By Babou

نهاركم زين 😜 عنوان ال post ⚠️ وهم الأهداف و نسق الحياة السريع

وهم الاهداف،
الفكرة السائدة في المجتمع، شنوما أهدافك و قداش حققت منهم ...
و فكرة "مقارنة الاهداف" و شكون الهدف متاعو اكبر و أقوى... و حققت الهدف متاعك في قداش وقت.
منافسة لا نهاية لها، مع روحك، مع الاشخاص من حولك و مع الحياة.

صحيح مش من المعقول نعيشو حياة عشوائية من دون تخطيط، من دون أهداف. و لكن حبيت نلفت الانتباه لمجرى الحياة، للتدفق الحياة، لمدى توازن الشخص على هذه الحياة و لمدى اليسر او العسر الذي يعيشه الشخص و الإنسان على هذه الحياة....
حبيت نقول جملة في الفكرة متاعي ملخر: في كل مرة تكون الحياة غير ميسرة، تكون فيها تعطيلات، يكون فيها مشاكل .... لازم نفهمو موضوع مهم برشا و نطرحو الأسئلة على انفسنا: وينو المشكل ؟؟؟
شنوة أنجم نغير ما بنفسي من أفكار، ردات فعل، معتقدات، قرارات، عادات .... و أكثر حتى اكون في حياة " ميسرة"

الفكرة كونو، و بالنسبة ليا انا، لازم يكون فما تناغم بيننا و بينا العالم من حولنا، قبل ما نحكيو على أهداف و على تحقيق أهداف...
و من خلال التركيز على1. علاقتنا بأنفسنا و 2. علاقتنا بالخالق، نخلطو للتناغم على هذه الحياة.

نتشارك معاكم شوية طرق ملي نستعملهم انا في حياتي :
الكتابة اليومية
الامتنان عبر الكتابة او في التاملات
التامل
الاكل الصحي
و برشا حاجات أخرى....
نهاركم زين أصدقائي و صديقاتي، و بالتوفيق لينا جميعا ❤️✌️

نهاركم زين 😍😍😄
موضوع اليوم: التدريج او التحضير ل ...// من أكثر الأفكار الي نحبهم في الدنيا
زوز مصطلحات حبيت نقولهم مبعضهم (اختياري الشخصي بش الفكرة تخلط اوضح)

لقيت روحي نكون مرتاحة أكثر و مقتنعة أكثر و فاهمة روحي أكثر وقت نقوم بالشيء بالتدريج...
مثلا نقولو بش نغادر مكان سوى باختياري او لا. مش هذا المهم بالنسبة ليا، لا لشيء إلا كوني نأمن كونو فما وقت لكل حاجة . لكل حاجة تظهر في حياتنا و لكل حاجة تخرج من حياتنا.
الحاصيلو، إذا نكون عندي المعلومة مثلا إلي أنا بش نغادر مكان ما و ماعاش بش نرجعلو و إلا ماعاش بش ننتمي ليه، نحاول ندخل الفكرة في مخي وحدة وحدة. نبدأ نتخيل كيفاش انا بش نكون اخر مرة نقعد في المكان هذا مثلا، نستوعب إلي أنا ممكن آخر مرة بش ندور فيه المكان او بش ناكل فيه او بش نبات فيه .....
التحضير و التدريج على المستوى المشاعري شخصيا يساعدني برشا بش نتقبل الظروف إلي نتحط فيها، او نختارها ساعات.
التغيير الفجئي منحبوش، مانحبذوش الحقيقة.
و لكن في بعض الأحيان يصيرو الظروف و نتحطو لكلنا في مواقف و وضعيات ماكناش نتخيلوها. يصير.
و في المواقف هاذي نرجع لروحي و نحاول نذكر روحي إلي في الدنيا مش كل شيء يصير كيما نختارو احنا، و ممكن هاذم تحديات الحياة زادة. و إلي أحنا نتحطو في مواقف يخرجونا من منطقة الراحة متاعنا. و إلي هو امتحان ينجم يكون صغير والا كبير. و لكن ... اخيرا ولات عندي "فكرة أو معتقد او قناعة" اكتسبتها في المدة الأخيرة : كوننا كلنا في هذه الحياة خاضعين لقانون "الخير المطلق" حتى و لو كان الظاهر عكس هذا....
سبحان الله هو الأدرى و الأعلم بالسبب و النتيجة من كل حدث على هذه الأرض.

الفكرة هذي عرضتني في كتاب "" أربعون لاحمد الشقيري و سمعتها زادة من عند نهال الناصفي في برنامجها "" حرر نفسك.

و تستمر رحلة الحياة ❤️ و يستمر تطور و تغيير القناعات
و سبحان الله، الحقيقية (ممكن الوحيدة) على هذه الارض هي : التغيير.

خواطر من هذا الصباح.... بابو بكل حب❤️🙏🙏

صوحابي و أحبابي، إنشالله نهاركم زين، post ليوم بعنوان: مسؤولية إختيار ما نسمع في يومنا!!!
من أصغر التفاصيل إلي إنجمو نبدلوهم في حياتنا على سبيل المثال هي==》 شنوة نسمعو
شنوة نسمعو في نهارنا، على طول الساعات إلي أحنا فيها فايقين، من الصباح حتى لين نرقدو.
شنية الموزيكا إلي نسمعوها، شنوة نوعها؟ شنوة الكلام الي فيها؟ شنوما المشاعر إلي تعطيهملنا؟؟؟!
إذا أحنا نسمعو في غناء حزين و كلام دمار كل يوم، كلام في علاقة بالخيانة ..... على خاطر الموزيكا حلوة و أحنا نحبوها، لازم نعرفو زادة إلي الموزيكا هاذي عندها تأثير علينا و تأثير كبير برشا
و هنا الموضوع يكون خطير برشا، علاش ؟؟ خاطر بالإعادة، كل حاجة نسمعوها و نعاودو نسمعوها تولي تدخل في مخنا، تدخل في أفكارنا، و بالتالي تدخل في معتقداتنا، تترسخ في مخنا و تولي داخلة فال base de donné متع مخنا و يكون عندا إنعكاس علينا ( حتى و لو مانفيقوش بالحاجة هاذي)
و من هنا تبدأ فكرة: مسؤولية إختيار شنوة نسمعو!!
كل واحد، كل شخص مسؤول على روحو
و بالطبيعة العكس بالعكس، يعني وقت نسمعو كلام حلو في الغناء، كلام فرحة، كلام زهو و طرب كيما نقولو، بالطبيعة باش يكون عندو تأثير باهي علينا....
خلاصة المضوع: أحنا عنا حرية إختيار نوع الموزيكا إلي نسمعوها و نعاودوها ❤️❤️
بكل حب Babou
شاركوني أفكارهم 🙏🙏