AI-Com

Peskizadór Luis Patrocino reprezenta ekipa ai-kameli, hodi aprezenta rezultadu husi peskiza kona-ba “Levantamentu (survey) no Re-Levantamentu (Re-survey) Ba Ai-kameli (Santalum Album L) Moris Natural iha Timor-Leste iha Tinan 2018, 2022 ho 2025”, iha Konferensia Internasional TLSA (Timor-Leste Study Association) nian, ne’ebé realiza iha loron 16-18 Jullu, 2025, iha Kampus UNTL, Dili.
Objetivu balu husi peskiza ida ne’e mak atu 1) buka hatene ezisténsia husi populasaun ai-kameli hun ne’ebé marka no foti ona amostra iha tinan hitu ba kotuk (2018) no 2) sukat fila fali taxa kreximentu (diametru & aas) kuandu ai-kameli hun ne’ebé marka ona sei eziste.
Peskiza ida ne’e hala’o iha fatin sia ne’ebé kobre Munisipiu 8, mak hanesan: Bobonaro (Atabae no Balibo), Covalima (Tilomar no Zumalai), Ainaro (Hatudu), Manufahi (Same), Manatuto (Soibada), Baucau (Venilale), Viqueque (Watulari) no Lautem (Lore no Com).
Peskizadór sira deskobre katak:
1) Ai-kameli hun ne’ebé marka ona iha tinan 2018 hodi foti amostra, ema tesi na’ok ona 66%, no maioria do’ok husi uma.
2) Fatin ne’ebé ai-kameli hun amostra sei eziste ho pursentu as liu (entre 73.3-86.7%) mak Aidabaleten (Atabae) ho Babulu (Uatulari).
3) Dezenvolvimentu husi diametru ai-kameli (tinan 2018-2025) iha mudansa 27% husi ai-kameli hun ne’ebé sei iha.

Peskizadór sira rekomenda atu kada uma-kain kuda ai-kameli hun 5-20 iha jardin uma oin, atu ai-kameli bele kontinua buras iha Timor-Leste, tanba Ai-Kameli mak ai Natural Timor nian, no iha valor ekonomia ne’ebé as.

Iha loron 19 fulan Agostu, AI-Com partisipa iha ACIAR showcase, hodi aprezenta rezultadu husi peskiza ne’ebé halo husi tinan 2017 to agora.
AI-Com mos hetan oportunidade hodi akompaña CEO ACIAR ho ekipa vizita Institutu Bambo iha Tibar (20 Agostu), hodi hare oinsá bele prodús biochar husi au restu balun ne’ebé sei sai hanesan lixu iha fatin refere.
Atividade sira ne’e realiza hodi selebra aniversáriu ba dala 25 husi parseria no amizade ne’ebé forte entre ACIAR ho Timor-Leste, hodi halo peskiza iha setór agrikultura. Peskiza sira ne’e, la’ós atu hetan de’it progressu sientífiku, maibé mos impaktu ba komunidade/agrikultór sira no mos hasa’e kapasidade peskizadór sira nian.

Honra boot mai ami.