Akha Newcreation Studio

Kalizaq-aq yaqkhaer maqbi yaq nya-a
23-05-2026 คริสเตียนไม่สามารถูกสาปแช่งได้

Aqcawq yawdoer jeq janrlar-eu khawf, yawdoer jeq taq janrkhofnaeq. Aqcawq dawqdoer ngaeqlar khawf, dawqdoer maq ngaeqkhof naeqni, dawq ngaeqghae naeq-awq. Miqyaer-aq, nawmaf-anr guiqlanq-euq jeqbir biza-eu laer kur-euq mae laer siqnya-awq.”
(‭‭1 Beqtuvluv‬ ‭3‬:‭9‬)

Tsawrhaq ghawqmya ghaq yawqha-euq daefzir lafkhoer keuvle-eu gardzaq garkawv-anr torluf-eu mae, Aqyawfmaf yawqha-euq daefzir lafkhoer keuvle-eu gardzaq garkawv teu-aq, yaqkhaer yaq-eu lafkhoer jawrluf-eu mirnae nya laer noeq-eu mae, Aerkhawf Nawr, kalizaq pyeuf-eu ngeurnar-aq, Miqyaer-euq yaerbof lafkhoer byacaevni nawr-aq, yaqkhaer maqbi yaq nya-a laer aertaq-euq mae, aqpoeq aqpiq pawnae oe-euq yaqkhaer yaq-eu jeq yawfjir pawnae oeq-eu yaqkhaer yaq-eu jeq, arjeuq arca pawnae oe-euq yaqkhaer yaq-eu jeq, hawr-eu nawq-anr muir-eu ghaq pawnae oe-euq yaqkhaer yaq-eu jeq Nawq-eu daefzir lafkhoer maq oekeuv nya-a, Nawq-eu daefzir lafkhoer-aq, Guiqlanq hawr-eu ghaqler-eu jeq taef-aer keuvle nya-eu mae

Aqdui nae gui-euq yaerbof ardeuv-anr yawmuiq-aer hawduq-awq, Nawr-aq guiqlanq-eu jeqbir biza-eu laer Miqyaer nawq-anr kur-euq mae, (2 Gawrliqtu‬ ‭5‬:‭17‬) lafkhoer “Tsawrhaq tiq ghaq, Kali-euq lafkhoer jawr nar-aq, aqyawf, tsawrhaq yawshuif pyeuflar-euq mae.laer aertaq-euq mae, tsawrhaq yawshuif pyeuflar-euq deuq-aq. naef saqdaq hawr-eu aqyawfmaf-eu gar dawqtawvluf nav maqtser huiqdzaeq-eu mae, Teumirnae nyirpaq, boermawq maqngeur nar-aq, naeftor tor-eu tsawrhaq nawq-anr aqjeq lmqlar khawf aryaer maqhuiq-a, Nawq-eu daefzir lafkhoer Baqgaq baqya janr-eu hawr-eu mawloq loq-eu tiqjeq-iq maq keuvle nya-a, (Bawrtsanr 23:23( lafkhoer aer-eu “Yaqkov-anr coeqler-eu mawloq loq-eu jeq maq jav-aer, Irsaqleqlav-anr coeqler-eu ja’maw maw-eu jeq maq jav-a, laer aertaq-euq mae

Yawmuiq-aer noeqtaq de-eq, aqdirmar pyeuf-eu yawtsaq yawdaer jeq-anr maq siqnya nar-aq, Baoq maqjav-a, Aerkhawf aqdirmar pyeuf-eu jeq-anr siqnya nar-aq. Nawq-anr Baoq bi’anr-eu mae, Miqyaer nawq-anr aqjeq laer aertaq la laer Nawr, maq siqnya nar-aq. Nawr, guv-eu lafkhoer can-awr lanrju-anr bafler nya-eu mae, Aefkhawf Nawr, aqdir pyeuf-eu yawtsaq yawdaer jeq-anr siqnya nar-aq, nawq-anr bibuq-ir-eu mae, ‭‭(Yorhaq‬ ‭8‬:‭32‬)lafkhoer aer-eu “Nawmaf, yawtsaq yawdawr-anr siqnya ngae, yawtsaq yawdawr, nawmaf-anr puirpyaeq naeqlaf taef-a.”laer aertaq-euq mae,

Nawr, tiqghaq nae-iq nawq-eu yaqkhaer yaq-eu jeq khoer bi puirpyeaeq naeq-eu maqloq-a, Sanqpaq Yeqsur nawq-eu yaqkhaer yaq-eu jeq pidan-euq mae, hawr-eu kali-euq lafkhoer Nawr, buq-ir-awr, yawshaef khanqsaer sanrdui dui-eu Miqyaer-euq yawshaef lafkhoer bisheuq urlaf-euq mae, Khoer-aq. Nawr, buq-ir dzeur-euq mae,
Sharnoeq hawsher-eq, Nawr, yaqkhaer biyaq nar-aq, dawqkhoer aqsur ghaq bipyeuf ler nya-eu la? naef saqdaq-a laq? Nawr, naef saqdaq hawr-eu aqyawfmaf-eu armaf dawqtawvluf navmaqtser Baoq anr-eu mae,

Khoernar-aq, Miqyaer lawrnae? Miqayer-aq, aqyawf-eu zaq deuq-eu khoertav yaqkhaer yaq-eu jeq bi keuvle -eu laer aqkawq maqbif haw-aq
Aerkhawf yaqkhaer biyaq taq-euq lof-aer yawdaef daef-eu kalizaq deuq-aq, Miqyaer-euq yaerdawq-anr maq narhaq ni yaeqbaw saerlu-aer haw-awr, maq hageuf ni yaerdawq -anr hawdoer-eu deuq mae, Miqayer nae bosav-euq garnae candov ghae-eu mae, khoermirnae yaqkhaer yaq-eu jeq pyeuf-ir mae, Yaerdawq lafkhoer aer-eu
“Yaerdawq-anr hawdoer-eu tsawrhaq-aq, yawqhar yawqha lavcawv-eu mae”laer aertaq-euq mae (‭‭Dawqdaq‬ ‭13‬:‭13‬ THSV)

Nawr, kali-euq lafkhoer jawr-awr Yaerdawq-anr hageuf-uqtaf yawshawr saflar sheuqghae-eu gar kharjawr-eu khoerkeuv ni nawq-anr tiqghaq-iq maq lavciv lar nya-a, Nawr-aq. Guiqlanq-eu lafkhoer taef-aer yadaef-eu mae, Nawr-aq, kali-euq lafkhoer ur-eu jeqbir lafkhoer nuima khaqduq ni ghaqler-euq lafkhoer yawdaef daef-eu mae, Guiqlanq za-awr, ghaq za-eu uqtaf ya uvlanr-eu mae, Miqyaer guiqlanq-anr jaceuq ma


Ngamaf-anr Gaqdui gui-eu Aqda Miqyaer-or, kali-euq lafkhoer Ngamaf-anr bifnaeq laf-euq guiqlanq gharduq guiqlanq huiqma, Ngamaf-aq, yawzanr-anr ghaqler-awr Miqyaer-euq yaerdawq-eu yawshaef lafkhoer yawdaef daef-eu ma, Ngamaf-aq, kali-euq lafkhoer ghaqler-awr uvlanr-eu uqtaf tsaq-awr dawr-eu lafkhoer yawdaef daef-eu ma, Guiqlanq za-awr ghaq za-euq uqtav uvlanr-eu ma, Yeqsur kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Bawrtsanq 23:23/ Erpersu 1:3/ Gawrlawrsaer 1:13/ Gaqlaqtiv 3:13-14

Nawq-eu lafkhoer nae byaqdov lef-eu Miqyaer-euq yaerdawq
13-05-2026 การสำแดงออกของพระคำในตัวคุณ

“Zaftaq-euq heujeq, yawshaef khanqsaer arnavni sanr-eu garkawv, Miqyaer, aqcawq tsawrjeuq tsawrca-euq ghanrcae jawr-eu aqyawf maf-anr bi siqnya mawf-eu mae. Zaftaq-euq jeq heu-aq, Kali, nawmaf-euq lafkhoer jawr-eu mirnae, nawmaf, yawshaef khanqsaer za’ni noeqtmqduq pyeuf-eu mae.”
(‭‭Gawrlawrsaer‬ ‭1‬:‭27‬)

Kalizaq aqdirmar-aer pyeuf-eu-aq, nawq-eu lafkhoer nae Miqyaer-euq yaerdawq byaqdov lef-eu mae, Nawr, ngaeqnar-aq, khoer-aq. yaerdawq mae, Nawr, mrnar-aq. khoer-aq, yaerdawq mae, Aerghae nar-aq, kalizaq-eu daefzir-aq, Miqayer-euq yaerdawq byaqdov lef-eu daefzif mae, Teubaqda mirnae Nawr, kharcan-eu kuirtof. nawr, kharmr kharshar-eu jeq-aq, Miqyaer-euq yaerdawq byaqhaw naeq-eu jeq mae

Heu-aq, Sanqpaq Yeqsur nae aqyawf mirtsaq khoertav jawrngae mr- eu jeq mae, aqyawf-aq, Dawq panmaeq naeq-euq mae, “ Dawq khoer-aq shiqshaq pi-aer aqdaui naeq-aer jawrle-euq mae laer aertaq-euq mae,(Yorhaq 1:14)Yeqsu Aqyawf Miqyaer byaqhaw naeq-euq mae. Khoer-aq, Miqyaer pyeuf-eu jeq byaqhaw naeq-eu mae, Teumirnae nawq-eu daefzir-aq, Miqyaer-euq yaerdawq byaqhaw naeq-eu jeq mae, Aqjeqmirnae aernar-aq Nawr, Miqyaer-euq yaerdawq khoer-anr nae daefle-euq mae( ‭‭1 Beqtuvluv‬ ‭1‬:‭23‬) lafkhoer aer-eu
“Nawmaf, cawv-ir nya-eu aryoeq-anr ghoe-awr nae maqngeur-eu, maqcawv-ir nya-eu aryoeq-anr ghoe-awr nae daefpov daefpar ghaq-euq mae. Aryoeq khoer-aq, li-eu maqbawni daef-awr zifluf-eu Miqyaer-euq dawq mae.”laer aertaq-euq mae

(‭‭2 Gawrliqtu‬ ‭3‬:‭2‬-‭3‬ )lafkhoer aer-eu
“Nawmaf-aq, nuima-anr boftaq-euq kali-euq sanqbof mae. ..Tsawrhaq dawqtawvluf sanqbof heu-anr yagui-awr siqnya-eu mae. Nawmaf-aq, Kali nae nga’maf-anr ghoe-awr boftaq-euq sanqbof ngar-a laer byacaevni javluf-eu mae. Sanquir nae boftaq-euq sanqbof maqngeur-a, daefluf-eu Miqyaer-euq Saflar nae boftaq-euq mae. Khaqlo terbyaf-anr boftaq-euq khawf maqngeur-a, shiqshaq-euq terbyaf pyeuf-eu nuima-euq lafkhoer boftaq-euq sanqbof mae.”laer aertaq-euq mae, kali-euq sanqbof-aq, Miqyaer-euq yaerdawq mae

Teumirnae aqdui-aq, Miqyaer-euq yawshaef khanqsaer pyeufma, Miqyaer-euq tsaq-awr dawr-eu jeq byaqhaw naeq-euq ma, Nawr, khar-ir-eu gar Kali khawf khoergar ir-eu mae, Aqjeqmirnae mirnae aernar-aq, mirtsaq-eu khoertav aqdukhawf Yeqsu lof-aer pyeufluf-eu ma laer aertaq-euq mae (1Yorhaq 4:17) Nawr, khar-ir-eu gar Miqyaer-euq zaqsiq tsawrganr, guiqlanq yawdzanr, hawr-eu Miqyaer-euq Baoq bidov lar-eu mae, Nawr-aq mirtsaq khoertav Yeqsu Kali-euq danzar pyeuf-awr Miqyaer-euq gaq-eu jeq, Baoq, hawr-eu ghawqshaq gaq-eu jeq byaqhaw naeq-eu laer heugar jawr-eu mae, Heu-anr aqdir ghovshaw nya-awq, Miqyaer guiqlanq-anr jaceuq ma


Ngamaf-anr Gaqdui dui-do Aqda Miqayer-or, Ngamaf-anr daefluf-eu Yeqsu kali-euq sanqbof bipyeuf naeqlaf-euq gharduq guiqlanq huiqma, aqcaw gui-awr ya siqnya-eu mae, Ngamaf-eu daefzir-aq, Miqyaer-euq yawshaef khanqsaer byaqhaw naeq-eu daefzir ma, Miqyaer-euq daef-eu jeq ngamaf-eu pawnae byaqdov lef-eu mae, hawr-eu Ngamaf aqcawq-anr guiqlanq dawq pawnae Miqyaer-euq daef-eu lafkhoer sheuqur laf-eu ma, Miqyaer-euq zaqsiq tsawrganr, guiqlanq yawdzanr, Baoq, hawr-eu tsaq-awr dawr-eu jeq mawrlar-eu mae, Yeqsur Kali tsawrmyanr lafkhoer and shar-eu ma, Aqmeq

Heugar guilanq nya-eu mae
Yorhaq 1:14/ Gawrlawrsaer 1:27

Manqtawf tawfdur-aq Gaq-eu lafkhoer can-eu jeq mae
09-05-2026 กุญแจคือการเดินในความรัก

“Khoeruqtaf, nawmaf, naqbawr nae narhaq-eu tsawrhaq taef-aer maqpyeufni, Yaerdawq-anr mrcaw-eu tsawrhaq pyeuf-awq. Naqbawr nae narhaq-eu tsawrhaq taef-aer pyeuf nar-aq, yawqhar yawqha jaqmyawf myawf-eu tsawrhaq mae.”
(‭‭Yaqkov‬ ‭1‬:‭22‬)

Tsawrhaq ghawqmya ghaq Miqyaer lafkhoer Ngar, nuima huiq-eu jeq-anr aqjox-aer ya'ghaq ler-eu la? laer Ngar jawrgar sanqbof bofur laf-euq mae, Aqyawf maf nuima huiq-eu tsawrhaq pyeuf-eu mirnae aqdir mar-aer ya'bi lavpar nga laer aqcaw haw-eu mae, Teumirnae khoerlof-aer parlar mawf-eu nuima anr-eu-aq, tsaqnga laer Ngar, hawma, Aqyawf nuima huiq-eu garnae parlar mawf-eu khoer ardanq bae-eu ghaqler-euq kuirtof pyeufmae, Aefkhawf Nawr, nawq-eu daefzir lafkhoer tiqpaw dzerdzaq-anr parlar mawf-eu nar-aq, yaerbof uqdzan-anr aertaq-euq lof-aer Nawr ya’mr-eu jeq khoer-aq, Miqyaer-euq yaerdawq-anr mrcaw-eu tsawrhaq ya'pyeuf-eu mae,

Miqyaer-euq yaerdawq-eu lafkhoer aertaq-euq lof-aer daefcaw-awq, Yawjeq majeq Nawr, nuima huiq-eu jeq lavjae mawfnar-aq, Nawr (Erpersu 5:1-2) lafkhoer ya’mrcaw-eu mae, “Nawmaf-aq, Miqyaer zawr gaq-eu zaqdeuq pyeuf-eu mirnae, Miqyaer mr-eu lof-aer mrcaw-eu tsawrhaq pyeuflar-awq…” laer aertaq-euq mae
nuima huiq-eu jeq-anr ghaqler-eu khoer-aq, gaq-eu lafkhoer yacan-eu mae

Khoernar-aq (Gaqlaqtiv 5:22-23 ) lafkhoer heulof-aer aertaq-euq mae “Aerkhawf, muiq-eu Saflar-euq arsiq-aq, gaq-eu, laqkhaq caer-eu, nuisar of-eu, nuinoeq ghawqmanrni noeq-eu, ghawqshaq gaq-eu, yawmuiq jeq mr-eu, sarjax zif-eu, nuima nanqyuni ghae-eu, yawqha-euq nuima-anr ghaqler-eu, heudeuq mae. Heudeuq taqmr laer boftaq-euq zanrdawq maqjav-a.”laer aertaq-euq mae

Yawshawr saflar-euq arsiq-aq tsawrhaq yawshuif pyeuflar-euq daefzir lafkhoer siqle-eu arsiq mae ( daefpar le-euq saflar) Heudeuq-aq, Nawr, daefpov daefpar le-euq naeq-aer nawq-eu daefzir lafkhoer ur-eu saevdzeuf mae, gaq-eu jeq khawf khoergar 'anr-eu mae

(Gaqlaqtiv 5:19-21) lafkhoer shiqshaq-eu nuikhanr hawr-eu nuima huiq-eu jeq-aq. shiqshaq garkawv mae laer aertaq-euq mae, Aerkhawf Nawr-aq. gaq-eu, laqkhaq caer-eu, nuisar of-eu, nuinoeq ghawqmanrni noeq-eu, ghawqshaq gaq-eu, yawmuiq jeq mr-eu, sarjax zif-eu, nuima nanqyuni ghae-eu, hawr-eu yawqha-euq nuima-anr ghaqler-eu lafkhoer yawdaef daef-awq, Aqjeqmirnae aernar-aq, Heudeuq dawqtawvluf nawq-eu saflar lafkhoer ur-eu mae

Yawnan navluf gaq-eu jeq nae heu-eu lafkhoer yawdaef daef-eu gharduq mrdzaw-awq, “Ngar-aq gaq-eu lafkhoer canluf ma laer ngaeq-awq” Heulof-aer noeqtsaev-awr nae mr-awq, Khoernar-aq, Nawr, nawq-eu daefzir lafkhoer Miqyaer-euq yawshaef khanqsaer-anr ya tanqpuq taef-a, Aqjeqmirnae aernara-aq. gaq-eu jeq-aq Miqyaer-euq saevdzeuf hawr-eu ghaqler-eu garma pyeufmae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, nawq-eu yaerdawq ngamaf-eu nuima ciqshawr naeqlaf-euq mirnae guiqlanq huiqma, Nawq-eu gaq-eu jeq-aq, Ngamaf-eu daefzir lafkhoer tiqbyan ni byanluf-eu mae, Ngamaf-aq, nuima nanqyu ni ghae-eu lafkhoer, nuinanq nuiyu anr-eu lafkhoer, hawr-eu aqcawq-anr gaq-eu lafkhoer nae can-eu ma, nuima huiq-eu jeq ngamaf-eu saflar lafkhoer jawrduq maqjav-a, Aqjeqmirnae aernar-aq, Yeqsur kali-euq muiq-eu jeq, Ngamaf-eu dawq ngamaf-eu nuinoeq hawr-eu ngamaf mr-awr shar-eu pawnae dovle-awr bimawr-eu mae, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Gaqlaqtiv 5:22-23/ Erpersu 4:2/ 1Gawrliqtu 13:4-5