Green Card

تعلم اللغة الألمانية اليوم صار جزء من حياة معظم الجامعيين والمهنيين السوريين - لكن ثقافة الدورات (الغش) ما زال إلها مكانة كبيرة للأسف.

"لكن كيف بدي أفهم شو عم يحكوا؟ أكيد بدي شوف الدورات." هيك كان رد أحدهم دفاعا عن طريقته بدراسة أسئلة الفحص السماعي، ولاحظت انو في كتير ناس بتعمل هيك: بدال ما يتدربوا على الإستماع ويعملوا تمارين بتقوي مهارات الفهم (Hörverstehen)، بجيبوا "دورات" مكتوبة كتابة (رغم انو المفروض يسمعوا ما يقروا) وبالعربي مو بالألماني. يعني بدال ما يسمع الواحد ألماني بصير بيقرا عربي وبيحفظ الأسئلة والأجوبة. الاعتماد على الذاكرة بدال الاعتماد على مهارات الفهم. مع العلم انو الموضوع بياخد نفس الوقت + الواحد رح يسافر عألمانيا ورح يعيش ويشتغل ويسمع ألماني كل يوم - ليش عم يشتغلوا هيك؟

السبب بعود لثقافة التعلم يلي أساسا مانها صحيحة، يلي بتبلش من البيت للمدرسة للجامعة ويلي بتحتفل بقدرة المتعلم على الحفظ وإعادة انتاج ما حفظه سواء بالتسميع المنزلي او امتحانات المدرسة او الجامعة.

"أكيد بدي أحفظ شو بدي احكي لكن هيك بدي أحكي من عندي" طبعا بدك تحكي من عندك! امتحانات اللغة مانها تسميع، بل اختبار لمهارات اللغة: قديش بتفهم نصوص وسماعي وقديش بتعرف تكتب وتحكي وتكون واضح ومفهوم قدر الإمكان. وهي المهارات فينو الواحد يتعلمها. الحفظ ممكن يكون جزء من عملية التعليم. ممكن الواحد يحفظ كم جملة وكم تعبير لكن تعليم اللغة الو تكنيكات وأساليب في ناس مختصة بهالموضوع. اي حدا ببيعك دورات وأسئلة جاهزة وبيعطيك كورس "قواعد" فللأسف عم يضحك عليك ويضيعلك وقتك ومصرياتك ولا بهموا مستقبلك ولا بهموا يخليك تكتسب اللغة.