Maxamed Bulbul

Isbarbardhigga Labada Wareysi ee Madaxweyna Xasan Sheekh iyo Hoggaamiye Cabdiraxmaan Cabdishakuur

1. Qaabka wareysiga loo qaaday
Qaabka loo qaaday labada wareysi aad buu u kala duwanaa. Mid waxaa ka muuqatay dood iyo su’aalo adag oo la is weydiinayo, halka kan kalena uu u ekaa mid arrimo badan laga gaabsanaayay.

2. Waqtiga iyo qotada doodda
Waqti ahaan labada wareysi way isku dhowaayeen, inkastoo wareysiga Cabdiraxmaan uu dheeraa dhowr iyo toban daqiiqo. Taasna waxaa laga dheehan karay in mawduucyada iyo doodaha lagu faaqiday ay ka qoto dheeraayeen kuwii wareysiga Madaxweynaha.

3. Xujeynta iyo saldhigga doodda
Xagga xujeynta, adeegsiga mandiiqda (logic), diinta, dhaqanka, iyo xigashooyinka falsafiyiinta iyo siyaasiyiinta, arrimahaasi waxay si weyn uga muuqdeen doodda AAW, taas oo ka dhigtay dood u badan caqli iyo mabda’ (rational argument). Dhanka kale, doodda Madaxweyne Xasan Sheekh inta badan way ka marneyd qodobadaas, taas oo ka dhigtay mid u badan sharaxaad iyo difaac ku saleysan duruufaha iyo waaqica siyaasadeed ee jira.

4. Ku adkaysiga mowqifka
Waxaa ka muuqatay in Hoggaamiye AAW uusan wax badan ka beddelin mowqifyadii uu qabay shalay iyo waxa uu maanta u taagan yahay. Halka Madaxweynaha laga dheehan karay kala duwanaansho u dhexeeya wixii uu h**e u diidanaa iyo qaar ka mid ah arrimaha uu maanta difaacayo ama u ololeynayo.

5. Adeegsiga qabiilka
Labaduba waxay ka hadleen qabiilka, balse siyaabo kala duwan. AAW wuxuu sheegay in qabiilku yahay heybtiisa gaarka ah oo uusan ka maarmin, maadaama siyaasadda Soomaaliya muddo dheer lagu saleeyay nidaamka qabiilka. Sidaas darteed, wuxuu qabiilka u arkay inuu yahay heyb siyaasadeed (political identity).

Dhanka kale, Madaxweynaha ayaa isu muujiyay inuu yahay hoggaamiye ka sarreeya qabiilka iyo deegaanka. Isla markaana wuxuu mucaaradka, gaar ahaan AAW, ku eedeeyay in laga soo abaabulayo meelo ka baxsan Muqdisho. Wuxuu sidoo kale si dadban ugu tilmaamay AAW inuu yahay shakhsi aan qadarin u haynin dhaqanka iyo qabiilka. Arrintaasna dad badan ayaa u arkay isku day lagu abuuraayay aragti taban oo AAW looga horkeenayo bulshada ku dhisan qabiilka iyo dhaqanka.

Ugu danbayn, labada wareysi waxay muujiyeen laba hab oo siyaasadeed oo kala duwan; mid ku dhisan mabda’, dood iyo xujeyn, iyo mid ku saleysan sharaxaadda waaqica siyaasadeed iyo difaaca go’aannada dowladeed. Sida loo qiimeeyo mid kasta waxay ku xirnaan doontaa aragtida iyo qiyamka qofka daawanay!

Doorashada ay mucaaradku doonayaan.

Wasiir Cabdi Xuseen Maalow, oo ka tirsan Golaha Wasiirrada Dowlad-Goboleedka Koonfur Galbeed ayaa sheegay in Dastuurka Koonfur Galbeed uu si cad u dhigayo in madaxa ugu sarreeya maamulka loo yeero Madaxweyne, islamarkaana aan si fudud lagu beddeli karin magacaas ilaa wax-ka-beddel rasmi ah lagu sameeyo dastuurka.

Wasiirku wuxuu ku dooday in arrintan ay ka dhalan karto is-afgarad la’aan sharciyeed, maadaama Dastuur dhowaan ay ansixisay Dowladda Federaalka Soomaaliya uu isticmaalayo erayga “hoggaamiye” marka uu tilmaamayo madaxa dowlad-goboleedyada.

Arrintan ayaa sii kordhisay doodda ku saabsan awood-qaybsiga iyo kala sarreynta dastuurka Federaalka iyo kan dowlad-goboleedyada, iyadoo Koonfur Galbeed ay h**e uga mid ahayd maamulada ay ka taagnaayeen murano siyaasadeed iyo sharci oo la xiriira hannaanka hoggaamineed.