Kaah Post

Siyaasi Guuleed Saalax ayaa ku eedeeyay Madaxweynaha Puntland Siciid Cabdullaahi Deni iyo qaraabadiisa inay si nidaamsan u boobayaan khayraadka guud ee Puntland, isla markaana ay dawladnimadii u bedeleen mid ay si gaar ah uga faa’iideystaan isaga iyo kooxdiisu.

Guuleed Saalax wuxuu sheegay in arrintan ay muddo dheer ka digayeen, balse maanta ay si cad u soo baxday, kadib markii warbixin rasmi ah oo caalami ah ay xaqiijisay eedeymahaas.

Warbixinta oo ay soo saartay Global Initiative Against Transnational Organized Crime ayaa muujisay sida awoodda dawladnimo loogu takri-falay looguna boobay khayraadka Puntland.

Wuxuu sidoo kale xusay in shacabka reer Puntland ay la daalaa-dhacayaan abaar, dhaqaale xumo iyo adeegyo dowladeed oo liita, halka hoggaanka jira uusan ka damqayn xaaladdaas, balse uu ka faa’iidaysanayo dhibaatada shacabka.

Ugu dambayn, Siyaasi Guuleed Saalax wuxuu ugu baaqay shacabka reer Puntland inay indhaha furaan, xaqiiqada wajahaan, kana hortagaan boobka iyo ku takri-falka lagu hayo khayraadkooda iyo mustaqbalkooda.

Kaah Post