Ahmed - Design

طلاب الجامعات أكتر ناس عبئ على الدولة
بيستهلكوا كتير، بي سببهم الشوارع بتبقى زحمة، الأسعار بتغلا كلما الجامعات تفتح.
في صرف عليهم من الأسر مبالغ فيهو، مصاريف، لبس، تلفونات وحاجات تانية مامنها أي لازمة.
انا ما ضد انو الأسر تدعم بالعكس بشجع جدا لكن ضد أنو انت ما يكون منك أي فايدة.
تقرأ أربعة ولا خمسة سنة تقضيها كلها طلعات ومرقات ومستواك الأكاديمي كعب ناس بيتكم يكون خسروا مبالغ خرافية
وبعد ده الواحد يطلع ويقعد عاطل.
طبعاً رغم انه نحن مجتمع مترابط وعندنا عادات سمحة لكن في الكعب منها.
المجتمع الغربي الواحد مجرد ما يحصل 13 سنة أمو وأبو ما بشتغلوا بيهو بمشي براهو بشتغل في أي حته وبمسك نفسو ومصاريفو براهو.
الحاجة دي من جانب ماكويسة وهو التف-كك الأسري وعلاقة الإبن بوالدينو وبِرهم.
لكن من ناحية تانية كويسة وهي انو بطلع ليك جيل منتج ومسئول ومعتمد على نفسو.
انت اليوم كطالب بتدرس في الجامعة اذا كانت فاتحة او مقفلة، مفروض يكون عندك كذا مصدر دخل تخفف على ناس بيتكم شوية ده لو ما أنت بقيت مستقل وريحتهم من مصاريفك الكتيرة.
الأغلب مفتكر انو الشغل ده الا تتخرج تشيل شهادتك حتن تشتغل وتلبس ديك يا البدلة وتركب ديك يا العربية.
صدقني شهادتك دي بلها واشرب مويتها.
بتذكر لمن كنت في الجامعة وتحديداً سنة تانية كنت قاعد أدخل قروش من تصميم المواقع وصممت موقع لي كم منظمة بعد داك خشيت مواقع العمل الحر وبقيت بمسك مشاريع بالدولار.
كونك تكون شخص ما منتج ما مشكلة لكن المشكلة الأكبر إنك تكون عرفت الحلول و الطرق البتخليك منتج وما تهتم بالموضوع.
انا شايف أنو أي طالب مفترض يكون عندو مهارة في يدو والمهارات كتيرة ولو ماعارف النت موجود بتتعلم.
إتخيل طالب الطب يكون عندو مهارة في التصميم مثلا، وبتاع المحاسىبة عندو مهارة البرمجة الحاجة دي متوفرة عند الناس التانين لكن بالنسبة لينا بتكون غريبة.
الحاجة دي ممكنة لانو انا مجربها وما حأكون مرتاح الا أملك الأسرار دي لي ناس تانين وأنقل الخبرة ليهم لانو بالجد الطلاب ديل مظلومين ودايرين الزول البوريهم.
انا البرنامج حقي ده بستهدف كل الفئات، الموظفين، ربات البيوت وحتى الناس العطالة الماعندهم موضوع لكن مركز اكتر على الشباب لانو بالنسبة لي أكتر ناس محتاجين دعم.
وانا بدعمهم و بوريهم كل الأسرار عشان ينطلقوا ويعيشوا ويغيروا حياتهم للأفضل.

الهند فيها 1 و نص بليون بني أدم ومن بين كل 5 أشخاص بتلقى واحد مبرمج.
السوادن فيهو 45 مليون بتلقى بين كل 100 شخص مبرمج ده لو لقيت أساساً.
الهنود متقدمين وماسكين أغلب شركات ال IT العالمية، متميزين ومنتشرين في كل بقاع العالم.
ونحن يا كافي البلاء عندنا كل شئ متوفر ولا قادرين نأكل لا نشرب.
عندهم الجوع، المرض، الفقر، كثافة سكانية عالية. لكن رغم ده بتلقاهم في كل مكان بيدعموا بعض وبشتغلوا بي إخلاص.
ونحن لامين كل البلاوي وعارفين الحل عندنا نحن لكن بنكابر.
كل ده لما تجي للجد بتلقى المبرمج الأمريكي و الصيني مميزين أكتر منهم.
هم لا أذكياء ولا عباقرة
بس بحترموا الزمن، بشتغلوا، بدعموا بعض، بقدروا الزول العارف أكتر منهم.
نحن مافاضين من القعاد من ضل لي ضل و الجنبات والجبنات، الواحد تلقى 24 ساعة مقضيها ضمنه وكتشينه ونوم وعطلة ويقول ليك البلد دي ما بتقدم.
تتقدم كيف اذا كان أغلب الشعب عاطل مستهلك وما منتج.
حالياً النت في السودان متوفر وبسرعة عالية لكن مضيعنو في الفاضي ساي.
انا بالنسبة لي لو بس 5 أنفار فهموا قصدي كفاية.
5 بس اوريهم كيف يتعلموا لغة العصر (البرمجة)، وكيف يقدروا يكسبوا قروش أونلاين ويغيروا حياتهم للأفضل.