Nursing

منقول من سودا نيرسولوجي
السلام عليكم ورحمة الله
🟩 تجارب شخصية:-
هبه عمر ..فاينل تمريض جامعة الخرطوم

تحكي عن تجربتها و ربما تكون دافعه أو مُلهمه لشخص كان فاقد الشغف في المجال أو هو في بداية الطريق م عارف يبدأ من وين..

🌺تكتب :-

أنا كمُعظم طلاب التمريض دخلت التمريض من غير رغبه (دخلتني النسبه زي م بقول😂) و واحده من أسباب عدم الرغبه إني م كنت عارفه أي حاجه عن المجال و أهميته و رهابتو بس كنت على يقين إن ربنا بضع كل حد فينا في مكانه الصحيح و ما بظلم حد و أمر المؤمن كلو خير و لي خير، و اكتشفت إن ربنا أدرى بي و بمقدراتي و أكيد انو هيضع الشخص الصحيح في المكان الصحيح جدا♥️✨

شويه شويه زاد حبي و شغفي في المجال بعد بديت أعرف عنو و عن تخصصاتو و بالتحديد لمن نزلت التدريب العملي و دخلت المستشفى♥️، مع إن معظم اللي منفذ وممارس في المستشفيات دا م التمريض على أكمل وجه و ممكن تشتغل في مكان يخليك حتى تكره المجال بس انت اللي في يدك كل شي، انت اللي في يدك تختار إنك تغير عشان تقدر تحبو "حب ما تفعل حتى تفعل ما تُحب♥️".
م عشان أنا جيت في مكان فيهو مُمارسات غلط و ناس شغالين غلط أواصل معاهم،بالعكس خليك أنت نقطة البداية و محور التغيير و ابدأ بي نفسك قبل الناس.

قال تعالى: ( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ ).

أكيد فترة الحرب دي سيئة علينا كلنا بس زي ما فيها مساوئ كمان كان فيها خير.! ♥️

أنا الحمدلله ربنا وفقني و قدرت أستفيد أقصى استفادة من الفرص اللي وفرتها لي الحرب، صح الموضوع في البداية م كان ساهل بس بي توفيق ربنا الحمدلله كلو اتسهل.

جات الفكرة بي إن خلاص الجامعات واقفه حاليا و لي فترة م معروفة ف أنا م هينفع أكون قاعده كدا و بعاين، بديت بي مركز الحي في المدينه اللي نزحت ليها بعد الحرب و الحمدلله تدريب الجامعه و شغفي و حبي للمجال كانو كافيين و مؤهلِّنِّي إني أقدر أنزل أشتغل على طول مع إني كنت طالبه في السمستر الرابع (المستوى التاني) و الكلام دا م عشان أنا زولة خارقه ولا حاجه، بالعكس أنا طالبة عاديه جداً بس ممكن أزيد عن بعض الطلاب بالشغف و الرغبه في المجال اللي هو أصلا م كان رغبتي😂♥️، و طبعا دي وحده من مميزات التمريض إنك بال Basic ممكن تشتغل بس كيف تكون زول مسؤول

International nursing day 💔

♥️✌️

#منقول
نحن كشعب سوداني اتعلمنا واتربينا انو مانخاف من زول ، تلقائيا كدة اي واحد فينا عندو عزة نفس لايمكن كسرها وارثنها من ابائنا واجدادنا ...
لكن الموضوع لمن يخش في الكرامة بيبقي شييييين شديد ...بخصوص السودانييين الفاتوا مصر ربنا يحفظكم ويسهل اموركم يارب لكن اي واحد يسال نفسو سؤال هل الناس ديل كلهم متقبلين فكرة انكم تجوهم؟ هل الشعب دة كلوا مرحب بيكم بيناتهم؟ هل انتوا شفتوا منشورات الناس ديل وتعليقاتهم علي الوضع الحاصل؟ المليارات البتسافر بيها مصر دي امشي بيها لي يبك المسكين الفي الولايات وعيشوا بيها مع بعض واتقاسموا الحلوة والمرة مع بعض في ولايات كتيييرة رايقة والحياة فيها طبيعية ... مافي داعي نتذل لي زول ويعملونا لاجئين ومتسولين مع العلم بلدنا دي الناس المرقوا منها مرقوا علماء ،مهندسين، ممرضين، اطباء، مغتربين... رافعين راس السودان برة...

اللهم احفظ السودان واهله...
اوقفواالحرب....
🇸🇩🇸🇩🇸🇩🇸🇩🇸🇩🇸🇩🇸🇩🇸🇩🇸🇩🇸🇩🇸🇩🇸🇩🇸🇩