Shereen Beauty Salon

كل يوم بقول لحالي ( خلص شيرين أكيد تعلمتي) و خلص أكيد ما راح اتعلم اكتر، بس برجع بتعلم درس جديد، اليوم تعلمت درس من صبية بعمر العشرين، بس الوعي اللي لمسته عندها فاق الخمسينات، صبية شفت نظرة بعيونها عمري ما راح انساها، حسستني قديش المرأة ممكن تكون قوية، و أقوى من مليون رجال 😍😍

اجت و عيونها عالقة فيهم دموع السعادة مع الحماس، مع الخوف الممزوج بالحزن، إجت و حاملة على كتافها أجمل جدايل ممكن حدا يتخيلهم، جدايل سود بكثافة ذيل الفرس، لمعتهم متل لمعة الشمس و هي بنصف السما 🥹

اجت وحكتلي بصوت برتجف: ( أنا جاي أقص شعري كله)

لفيت وجهي عليها مع انه كنت مشغولة بأشياء تانية، بس لحتى أتأكد انه اللي انا شايفته شعرها الحقيقي و مش تركيب، وكانت صدمتي كبيرة لما تأكدت انه هادا فعلا شعرها، سواده متل سواد الليل، و لما فردته نزل لآخر ظهرها و بكثافة بحياتي كلها ما شفت متلها

شعر عمره ما لمسه المقص، وعلى الرغم من انها عمرها ما قصته، إلا انه حيوي جداً و جميل جداً جداً، ولما اجيت أتدخل حطت إيدها على تمي و حكتلي: (ممكن نبلش لانه انا مستعجلة و مش معنية اسمع اي كلمة من اي حدا )

و صراحة لأول مرة من يوم ما اشتغلت بمسك المقص و إيديي برتجفوا، و مقصي فاقد جرأته اللي عودني عليها

ربطت الشعر حتى اقدر اتحكم فيه، لإنه كثيف جداً، و قصيته كله مرة وحدة 😭😭

قصيته لحدود الأذن بالضبط متل ما هي طلبت، وساعتها عيني ضربت عليها عالمراية، و كانت هاي النظرة اللي بحياتي كلها ما راح انساها

البنت عيونها انهارت منها الدموع مع انها كانت تضحك بشكل هستيري، عندها رجفة غريبة خلت كرسي القص يهتز تحتها، تفرجت على حالها متل الجندي اللي انتصر بالمعركة رغم الخسائر الكبيرة ، و أغرب اشي كان لما خلصنا، صارت ( تصفق) بصوت عالي، و تحكي ( واخيراً تحررت)

هجمت عليي و حضنتني، وطلبت تاخد شعرها معها و تحتفظ فيه كذكرى، و لما سألتها : ( هل شعرك راح يكون ذكرى جميلة ولا تعيسة؟)
جاوبت بابتسامة هادئة :
( ذكرى ليوم الاستقلال)

تركت دبلتها عندي و طلعت، و راح معها سرها اللي لغاية الآن نفسي أفهمه