Awan-e-Adab

اپنی نازک سی کلائی میں چڑھا لو مجھ کو
اک کھنکتا ہوا کنگن ہی بنا لو مجھ کو

درد فرقت نے برا حال بنا رکھا ہے
گر کسی روز ملے وقت بلا لو مجھ کو

دشت ہوں میں تو چھلکتا ہوا دریا ہو تم
مجھ میں گھل جاؤ کہ سینے سے لگا لو مجھ کو

میں کہ اجڑے ہوئے سنسان مکاں جیسا ہوں
اپنی یادوں سے ، محبت سے بسا لو مجھ کو

کل میں اس شہر کی گلیوں سے نکل جاؤں گا
آج کی رات یہاں ہوں تو ستا لو مجھ کو

اس قدر ہجر نے دیوانہ بنا رکھا ہے
میں ہوں سکتے میں مری جان سنبھا لو مجھ کو

میں کہ فردوس بنا دوں گا تمہاری دنیا
میری تنہائی کے دوزخ سے نکالو مجھ کو

ڈاکٹر ساحل سلہری

Awan-e-Adab

معروف علمی وادبی تنظیم شفق سیالکوٹ کے زیر اہتمام تقریب پزیرائی و مشاعرہ سیاسی و سماجی شخصیت سابق وائس چیئرمین عامر مختار بھٹی کے ڈیرہ دریا پور ہاؤس دریا پور منعقد ہوا ۔ پروگرام کے پہلے حصے میں افتخار شاہد کے شعری مجموعے "بام غزل" کی پزیرائی کی گئی ۔پروگرام کا باقاعدہ آغاز تلاوت قرآن پاک سے ہوا جس کی سعادت داؤد راج کوملی ۔نعت شریف سنی راجپوت نے پیش کی اس کے بعد بام غزل پر تنقیدی مضمون ڈاکٹر ساحل سلہری نے پیش کیا ۔ اس ضمن میں انھوں نے افتخار شاہد کی شاعری کا فکری و فنی تجزیہ کیا ۔ ازاں بعد صاحب کتاب افتخار شاہد نے حاضرین کو اپنا کلام سنایا اور بے پناہ داد سمیٹی ۔ معروف شاعر محبوب صابر کی صدارت میں مشاعرہ برپا ہوا ۔ شفق مشاعرہ میں اسامہ صحرا ،داود راج ،نثار سلہری ،مبشر میو ، صدق فقر ، رانا عثمان احامر ،زاہد علی سلطان ، بشیر کمال،عدنان قلزم رانجھا ، ثوبیہ راجپوت ، سمیرا ساجد ناز ، رضا المصطفیٰ، ارشاد نیازی ،ڈاکٹر ساحل سلہری ، تنویر احمد تنویر ، افتخار شاہد اور محبوب صابر نے اپنا کلام سنایا اور بے حد داد سمیٹی ۔ ہمیشہ کی طرح یہ شفق مشاعرہ بھی کامیاب رہا ۔ عامر مختار بھٹی نے کمال کی میزبانی کی ان کا خاندان علاقے میں سماجی خدمات کے لیے جانا جاتا ہے ۔ مشاعرہ میں رانا غلام عباس ایڈووکیٹ ، اسلم ندار سلہری ، نفیس صاحب سمیت سامعین کی اچھی خاصی تعداد نے شرکت کی اور پروگرام کو یادگار بنا دیا ۔