Prof. Dr. Ahsan Waheed Rathore

میڈیکل اور ڈینٹل کالجوں میں کلاسز کا آغاز یکم مارچ سے ہوگا، طلبہ کو اس سال نئے انٹیگریٹڈ نصاب کے مطابق پڑھایا جائے گا.

پنجاب کے سرکاری اور نجی میڈیکل اور ڈینٹل کالجوں میں کلاسز کا آغاز یکم مارچ سے ہوگا۔ طلبہ کو یونیورسٹی آف ہیلتھ سائنسز کے تیار کردہ نئے مربوط (Integrated) نصاب کے مطابق پڑھایا جائے گا جس میں پہلے دن سے طلبہ کی کلینیکل تربیت کا آغاز ہوجائے گا۔ اس حوالے سے جمعرات کے روز وائس چانسلر یو ایچ ایس پروفیسر احسن وحید راٹھور کی سربراہی میں ایک اجلاس کا انعقاد کیا گیا جس میں پنجاب بھر اور آزاد کشمیر سے آئے ہوئے میڈیکل کالجوں کے اساتذہ نے شرکت کی۔ پروفیسر احسن وحید راٹھور نے شرکاء کو بتایا کہ نصاب کی تبدیلی پاکستان میڈیکل کمیشن کی ہدایات کی روشنی میں کی گئی جس کا مقصدمیڈیکل کی تعلیم کو بین الاقوامی معیار سے ہم آہنگ کرنا ہے۔ وائس چانسلر یو ایچ ایس کا کہنا تھا کہ جدید نصاب تمام الحاق شدہ میڈیکل کالجوں میں لاگو کیا جائے گا جس میں طلبہ کو پہلے سال ہی سے کلینکل مضامین بھی پڑھائے جائیں گے۔ اس سے قبل یہ مضامین ایم بی بی ایس کے تیسرے سال سے شروع کیے جاتے تھے۔ ان کا مزید کہنا تھا کہ اس اقدام سے طلبہ کی طبی پیشہ وارانہ اور تحقیقی صلاحیتوں میں مزید بہتری لائی جاسکے گی۔پروفیسر احسن وحید راٹھور کا کہنا تھا کہ اس حوالے سے یونیورسٹی اپنے الحاق شدہ اداروں کی استعداد کار بڑھانے میں بھرپور معاونت کرے گی۔ یو ایچ ایس کے ڈائریکٹر میڈیکل ایجوکیشن ڈاکٹر خالد رحیم کا کہنا تھا کہ نصاب کی تیاری میں متعلقہ شعبوں کے ماہرین کی خدمات حاصل کی گئی ہیں اس نصاب میں طلبہ میں قائدانہ صلاحیتیں پیدا کرنے کے ساتھ ساتھ پروفیشنلزم اور اسلامی نکتہ نظر سے اخلاقیات کی تعلیم پر بھی خصوصی توجہ دی گئی ہے۔