Daily Point Network.com

وزیراعظم یوتھ پروگرام کے ڈویژنل کوارڈینیٹر نوابزادہ وہاب خان کی کمشنر ڈیرہ ڈویژن داؤد خان سے ملاقات، نوجوانوں کی ترقی اور فلاحی منصوبوں پر تبادلہ خیال

ڈیرہ اسماعیل خان: وزیراعظم یوتھ پروگرام کے ڈیرہ اسماعیل خان ڈویژن کے ڈویژنل کوارڈینیٹر نوابزادہ وہاب خان نے ایک وفد کے ہمراہ کمشنر ڈیرہ اسماعیل خان ڈویژن داؤد خان سے ان کے دفتر میں ملاقات کی۔ ملاقات کے دوران ڈیرہ ڈویژن میں نوجوانوں کی فلاح و بہبود، روزگار کے مواقع، ہنر مندی کے فروغ، تعلیمی سہولیات اور وزیراعظم یوتھ پروگرام کے تحت جاری منصوبوں پر تفصیلی تبادلہ خیال کیا گیا۔

ملاقات میں نوجوانوں کو بااختیار بنانے، انہیں جدید تقاضوں سے ہم آہنگ مہارتوں کی فراہمی اور حکومتی اسکیموں سے زیادہ سے زیادہ مستفید کرنے کے لیے مختلف تجاویز زیر غور آئیں۔ اس موقع پر نوابزادہ وہاب خان نے وزیراعظم یوتھ پروگرام کے مختلف اقدامات اور ڈیرہ ڈویژن میں ان کے اثرات سے کمشنر کو آگاہ کیا اور نوجوانوں تک حکومتی سہولیات کی مؤثر رسائی یقینی بنانے کے عزم کا اظہار کیا۔

کمشنر ڈیرہ ڈویژن داؤد خان نے وزیراعظم یوتھ پروگرام کے اقدامات کو سراہتے ہوئے کہا کہ نوجوان کسی بھی قوم کا قیمتی سرمایہ ہوتے ہیں اور ان کی مثبت تربیت، تعلیم اور روزگار کے مواقع کی فراہمی ملکی ترقی کے لیے ناگزیر ہے۔ انہوں نے یقین دہانی کرائی کہ ضلعی انتظامیہ نوجوانوں کی فلاح اور ترقی کے لیے شروع کیے گئے منصوبوں کے نفاذ میں ہر ممکن تعاون فراہم کرے گی۔

ملاقات کے اختتام پر دونوں جانب سے اس امر پر اتفاق کیا گیا کہ نوجوانوں کو درپیش مسائل کے حل، انہیں بہتر مواقع فراہم کرنے اور ترقیاتی منصوبوں میں ان کی شمولیت کو یقینی بنانے کے لیے باہمی رابطوں اور تعاون کو مزید مضبوط بنایا جائے گا۔ وفد کے اراکین نے بھی نوجوانوں کے لیے جاری حکومتی اقدامات کو مؤثر انداز میں عوام تک پہنچانے اور ان کے ثمرات عام نوجوانوں تک منتقل کرنے کے عزم کا اظہار کیا۔

سوشل میڈیا کلب ڈیرہ کی نئی کابینہ تشکیل، زبیر شاہین صدر اور جنید مروت جنرل سیکرٹری منتخب

ڈیرہ اسماعیل خان: سوشل میڈیا کلب ڈیرہ اسماعیل خان کی نئی کابینہ کی تشکیل کے لیے انتخابی مرحلہ مکمل کر لیا گیا، جبکہ ممبران کی باہمی مشاورت اور اتفاق رائے سے نئی کابینہ تشکیل دے دی گئی۔

تفصیلات کے مطابق سوشل میڈیا کلب ڈیرہ کے اجلاس کا انعقاد سابق جنرل سیکرٹری ڈیرہ پریس کلب شیخ توقیر اکرم کی نگرانی میں کیا گیا، جس میں سید اطہر شاہ، زبیر شاہین، امان اللہ خان بلوچ، جنید مروت، عثمان شاہین، شعیب محسود، محمد بن خالد، محمد ارشد خان، محمد رضوان سمیت دیگر ممبران نے شرکت کی۔

اجلاس میں صدر کے عہدے کے لیے سید اطہر شاہ اور زبیر شاہین جبکہ جنرل سیکرٹری کے لیے جنید مروت اور عثمان شاہین کے نام پیش کیے گئے۔ بعد ازاں ممبران کی باہمی مشاورت سے زبیر شاہین کو متفقہ طور پر صدر جبکہ جنید مروت کو جنرل سیکرٹری منتخب کر لیا گیا، جس پر تمام شرکاء نے اعتماد کا اظہار کیا۔

اجلاس میں مزید مشاورت کے بعد سید اطہر شاہ کو چیئرمین، عثمان شاہین کو سینئر نائب صدر، محمد بن خالد کو پریس سیکرٹری، شعیب محسود کو نائب صدر، امان اللہ خان بلوچ کو جوائنٹ سیکرٹری جبکہ محمد ارشد خان کو فنانس سیکرٹری منتخب کیا گیا۔

اجلاس میں شریک ممبران نے نومنتخب عہدیداران کو مبارکباد پیش کرتے ہوئے امید ظاہر کی کہ نئی کابینہ سوشل میڈیا کے شعبے میں صحافتی اقدار کے فروغ، مثبت سرگرمیوں اور نوجوانوں کی رہنمائی کے لیے مؤثر کردار ادا کرے گی۔

اجلاس کے اختتام پر متفقہ فیصلہ کیا گیا کہ کسی بھی سرکاری ملازم کو سوشل میڈیا کلب ڈیرہ کا ممبر نامزد نہیں کیا جائے گا۔