Juander Radyo Tagum 100.7 FM

𝐔𝐓𝐀𝐍𝐆 𝐒𝐀 𝐏𝐈𝐋𝐈𝐏𝐈𝐍𝐀𝐒 𝐌𝐈𝐒𝐀𝐊𝐀 𝐍𝐀 𝐒𝐀 𝐏𝟏𝟖.𝟒𝟗 𝐓𝐑𝐈𝐋𝐋𝐈𝐎𝐍

Misaka na sa P18.49 trillion ang kinatibuk-ang utang sa Pilipinas niadtong Marso 2026, sumala sa Bureau of the Treasury.

Mas taas kini og P328.43 bilyon kumpara sa natala niadtong Pebrero, nga nagpakita sa padayon nga pagsaka sa obligasyong pinansyal sa nasud atol sa kasamtangang tuig.

Gipasabot sa Bureau of the Treasury nga usa sa dakong hinungdan sa pagsaka sa utang mao ang revaluation impact nga dala sa paghuyang sa piso batok sa dolyar.

Tungod niini, mas nidako ang kantidad sa mga utang sa gawas sa nasud kon ikumpara sa bili niini sa lokal nga kuwarta.

Nadugangan usab ang utang pinaagi sa net issuance sa domestic securities o pagpanghulam sulod sa nasud aron matubag ang panginahanglan sa gobyerno.

Sa kinatibuk-ang utang sa nasud, P12.53 trillion ang domestic debt o mga utang nga gikan sa sulod sa Pilipinas, samtang P5.95 trillion ang external debt o mga utang gikan sa mga langyaw nga institusyon ug ubang nasud.

Nagpasabot kini nga dako gihapon ang pagsalig sa gobyerno sa lokal nga pagpanghulam bisan pa sa padayon nga external borrowings.

Samtang, misaka usab gamay ang guaranteed obligations sa gobyerno ug miabot kini sa P381.41 bilyon.

Kini nga mga obligasyon naglangkob sa mga utang sa ubang ahensya o korporasyon nga ginagarantiyahan sa gobyerno, nga mahimong pas-anon sa estado kon dili kini mabayran sa hustong panahon.

Photo Courtesy : Gigie Cruz, ABS-CBN News