Polillo Rural Health Unit

𝗘𝗺𝗲𝗿𝗴𝗶𝗻𝗴 & 𝗥𝗲-𝗘𝗺𝗲𝗿𝗴𝗶𝗻𝗴 𝗗𝗶𝘀𝗲𝗮𝘀𝗲 𝗔𝘄𝗮𝗿𝗲𝗻𝗲𝘀𝘀 𝗖𝗮𝗺𝗽𝗮𝗶𝗴𝗻 𝗡𝗮𝗶𝘀𝗮𝗴𝗮𝘄𝗮 𝘀𝗮 𝗧𝗮𝘁𝗹𝗼𝗻𝗴 𝗕𝗮𝗿𝗮𝗻𝗴𝗮𝘆 𝗻𝗴 𝗣𝗼𝗹𝗶𝗹𝗹𝗼

𝙏𝙄𝙉𝙂𝙉𝘼𝙉 | Sa patuloy na pagsisikap na mapalakas ang kamalayan ng komunidad laban sa mga nakahahawang sakit, matagumpay na isinagawa ang Emerging & Re-Emerging Disease Awareness Campaign na may temang “Kalusugan ng Komunidad, Ating Pananagutan” mula Mayo 25 hanggang Mayo 29, 2026 sa mga Barangay Bislian, Canicanian, at Taluong.

Layunin ng aktibidad na mabigyan ng sapat na kaalaman ang mga mamamayan tungkol sa mga sakit na patuloy na banta sa kalusugan ng publiko at ang mga hakbang upang maiwasan ang pagkalat ng mga ito. Tinalakay sa kampanya ang mahahalagang paksa tungkol sa Malaria, Dengue, Tuberculosis (TB), at Hand, Foot and Mouth Disease (HFMD), kabilang ang mga sintomas, paraan ng pag-iwas, maagang pagpapasuri, at tamang paggamot.

Pinangunahan ang mga talakayan nina Nurse Ryan Jay Pumarada, Midwife Analyn Wasigan, at Nurse Marie Jo April Huerto, na nagbahagi ng mahahalagang impormasyon at sumagot sa mga katanungan ng mga residente upang higit na mapalawak ang kanilang kaalaman sa pangangalaga ng kalusugan.

Sa pamamagitan ng gawaing ito, higit na napalakas ang kamalayan at pakikilahok ng komunidad sa pagpigil at pagkontrol ng mga emerging at re-emerging diseases. Patuloy na hinihikayat ang bawat mamamayan na maging aktibong katuwang sa pagpapanatili ng isang malusog at ligtas na komunidad.