Ang Isarog

𝗔𝗻𝘂𝗻𝘀𝘆𝗼, 𝗔𝗻𝗴 𝗜𝘀𝗮𝗿𝗼𝗴 𝗔𝗽𝗽𝗹𝗶𝗰𝗮𝗻𝘁𝘀!

Narito na ang iskedyul ng Phase 2 Screening, na kinabibilangan ng panayam o interbyu para sa mga nakapasa sa unang yugto ng recruitment.

𝗛𝘂𝗹𝘆𝗼 𝟮, 𝟮𝟬𝟮𝟲
Manunulat at Tagawasto ng Sipi, Photojournalism at Video Journalism Dibuhista, Taga-anyo at Disenyo ng Pahina

SHS: 9:00 AM - 10:30 AM
JHS: 3:30 PM - 5:00 PM
📍 Lugar: Isarog Office

𝗛𝘂𝗹𝘆𝗼 𝟯, 𝟮𝟬𝟮𝟲
Radio at TV Broadcasting

SHS: 9:00 AM - 11:30 PM
JHS: 3:30 PM - 5:00 PM
📍 Lugar: Isarog Office

Mangyaring dumating sa tamang oras. Muli, pagbati sa inyong pag-abot sa ikalawang yugto ng 𝗟𝗔𝗞𝗕𝗔𝗬: Ang Isarog Recruitment 2026. 💙🖋️

𝗘𝗗𝗜𝗧𝗢𝗥𝗬𝗔𝗟 | 𝗣𝗮𝗻𝗴𝗮𝗸𝗼𝗻𝗴 𝗣𝗮𝗴𝗶𝗴𝗶𝗻𝗴 𝗜𝗻𝗸𝗹𝘂𝘀𝗶𝗯𝗼

Hindi nasusukat ang pagiging inklusibo sa dami ng kulay ng bahaghari na ipinapakita, kundi sa lawak ng espasyong ibinibigay upang walang sinumang kailangang magtago ng tunay na pagkatao.

Madalas ginagamit ang salitang “inklusibo” bilang simbolo ng pagtanggap sa komunidad ng LGBTQIA+, lalo na tuwing Pride Month kung kailan maraming institusyon ang nagpapakita ng suporta at pagkilala. Ngunit nagiging mababaw ang kahulugan nito kapag nananatili lamang sa mga pahayag, simbolo, at pagdiriwang. Sapagkat ang tunay na inklusyon ay hindi lamang pagkilala sa presensya ng isang tao, kundi pagbibigay sa kaniya ng karapatang makilahok, magsalita, at maging bahagi ng isang ligtas na komunidad.

May malinaw na pagkakaiba ang pagtanggap at inklusyon. Ang pagtanggap ay pagkilala sa isang tao kung sino siya, habang ang inklusyon ay pagbubukas ng mga pagkakataon upang maramdaman niyang kabilang siya. Kung ang isang institusyon ay nagsasabing tumatanggap sa lahat ngunit walang malinaw na patakaran laban sa diskriminasyon, walang ligtas na espasyo para sa pagpapahayag ng sarili, at walang representasyon mula sa mismong komunidad, nananatiling kulang ang kahulugan ng pagiging inklusibo.

Makikita ang kakulangan ng tunay na pag-unawa sa mga simpleng biro na matagal nang nakasanayan ng lipunan. Isang kilos, pananamit, o paraan ng pagsasalita lamang ay agad na iniuugnay sa isang partikular na kasarian o identidad. Sa unang tingin, maaaring ituring itong biro lamang, ngunit sa likod nito ay isang pananaw na nagkukulong sa tao sa mga pamantayang hindi naman niya pinili.

Hindi lamang salita ang nagiging hadlang sa pagtanggap, kundi pati ang mga pamantayang patuloy na ipinapataw ng lipunan. Dahil sa takot sa panghuhusga, may ilang taong pinipiling baguhin ang paraan ng pananamit, pagkilos, o pagpapahayag ng sarili upang maiwasan ang pagtawa, puna, o diskriminasyon. Sa ganitong kalagayan, umiiral ang pagtanggap sa pangalan ngunit hindi sa tunay na karanasan.

Sa mga paaralan, hindi sapat ang pagkakaroon ng mga programa tungkol sa pagkakapantay-pantay kung may mga mag-aaral pa ring natatakot maging bukas tungkol sa kanilang pagkakakilanlan dahil sa pangungutya o panghuhusga. Hindi rin sapat ang pagpapakita ng suporta sa publiko kung walang konkretong hakbang upang maprotektahan ang mga taong kabilang sa komunidad ng LGBTQIA+.

Higit pa sa mga simbolo at kampanya ang kinakailangan upang makamit ang tunay na inklusyon. Kailangang magkaroon ng malinaw na patakaran laban sa diskriminasyon, mekanismong magpoprotekta sa mga biktima ng pang-aapi, at kapaligirang nagbibigay ng pantay na pagkakataon sa bawat isa. Sapagkat ang pagtanggap na walang aksyon ay nananatiling pangako lamang.

Hindi rin nangangahulugan ang pagiging inklusibo na kailangang mawala ang pagkakaiba-iba ng bawat tao. Sa halip, nangangahulugan ito ng pagkilala na ang bawat isa ay may karapatang mabuhay at makilahok nang hindi kinakailangang baguhin ang sarili upang maging katanggap-tanggap sa iba.

Hangga’t may mga taong kailangang itago ang kanilang pagkatao upang maiwasan ang panghuhusga, hindi pa ganap na umiiral ang tunay na inklusyon. Sapagkat ang isang lipunang tunay na tumatanggap ay hindi lamang ipinagmamalaki ang kulay ng bahaghari, kundi sinisig**o ring walang naiiwan sa ilalim nito.

#𝗨𝗹𝗮𝘁𝗡𝗴𝗮𝘆𝗼𝗻 | ‎Nagsagawa ng General Rabuz bilang pagdiriwang ng Philippine Environment Month sa Camarines Sur National High School, Main Campus, ngayong Hunyo 27.
‎
‎Nagmula ang imbitasyon sa City Environment and Natural Resources Office (CENRO) ng Lungsod ng Naga, na nagbigay ng mensahe na lumahok ang paaralan sa City-Wide and School Perimeter Clean Up Drive.
‎
‎Layunin ng aktibidad na gawing malinis, maayos, at maaliwalas ang paaralan para sa mga mag-aaral.

Ulat ni | Neina Sallan / Ang Isarog
Larawang kuha ni | Princess Anne Salvador / Ang Isarog