Catholic Faith Defenders - SSC Student Chapter

CFD-SSC's Reflection
By: Bro. Jose Aldrien Lapinig

Mga igsuon ang atong ebanghelyo karon nag ingon nga dili gayod kita angay mahadlok sa mga tawo, ug kinahanglan gayod natong isulti ang gisulti sa Dios diha sa kangitngit ngadto sa kahayag. Mga igsuon kini nagpa hinumdom kanato nga dili gayod kita angay mabalaka sa atong pagsangyaw diha sa kamatuoran. Bisan pa man tuod ug daghang mga pagpang lutos nga atong gi-tamasa tungod sa atong pag sangyaw sa pulong sa Dios. Dili gayod kita angay mabalaka kay siya maga uban kanato hangtod sa kahangturan. Hinuon mag-ampo kita, nga kita Iya untang ubanan sa atong pag-alagad kaniya, Iya unta kitang lig-onon ug panalanginan nga kitang tanan maka lahutay sa pag-alagad Kaniya bisan paman sa daghang mga pagbiay-biay ang atong natamasa.

Mga igsuon uban pa niana, nag ingon ang Dios, nga dili kita angay mahadlok niadtong mo patay sa lawas, apan dili makapatay sa kalag, hinuon angay natong kahadlokan ang Dios nga makalaglag sa lawas ug kalag didto sa impiyerno. Mga igsuon kini nagpahinumdom kanato nga unta ato gayod nga antuson ang tanang mga pagbiaybiay, pagpanglutos, ug pagpang dagmal nga atong natamasa tungod sa atong pag-alagad sa Dios ug dili gayod nato palabihon ang kahadlok. Kay Siya miingon, " Ang moangkon atubangan sa mga tawo nga siya akoa, angkonon ko usab atubangan sa akong Amahan didto sa langit. Apan ang dili mo angkon nga siya akoa, dili ko usab angkonon atubangan sa akong Amaha didto sa langit." Busa mga igsuon ato gayod maangkonong ipadayag si Kristo diha sa atong kinabuhi ngadto atubangan sa mga tawo aron usab kita iyang akonon atubangan sa Amahan didto sa langit. Amen.