Community Media Affairs

ANG LAMAS SA KINABUHI
Hulyo 10, 2025 (Huwebes)

ANG PAGSANGYAW SA SANTOS NGA EBANGHELYO SUMALA NI SAN MATEO (Mt. 10:7-15)

Si Jesus miingon sa iyang mga tinun-an, “Lakaw kamo ug isangyaw nga hapit na maghari ang Dios. Ayoha ninyo ang mga masakiton, banhawa ang mga minatay, hinloi ang mga sanlahon, ug aboga ang mga yawa. Nakadawat kamo nga walay bayad, busa panghatag kamo sa walay pagpangayo’g bayad. Ayaw kamo pagdalag kuwarta—kuwartang bulawan, plata, o bronsi; ayaw pagdalag puntil sa inyong pagpanaw, ni ilisan, ni sapatos, ni sungkod. Ang mga mamumuo angay hatagan sa iyang kabuhian.”
“Inig-abot ninyo sa usa ka lungsod kon balangay, pangita kamo’g tawo nga moabiabi kaninyo, ug pabilin uban kaniya hangtud nga mobiya kamo niadtong dapita. Inigdayon ninyo sa usa ka balay, ingna ang tagbalay, ‘Ang kalinaw mag-uban kaninyo.’ Kon modawat kaninyo ang tagbalay, ibilin kanila ang inyong panghinaut sa kalinaw; apan kondili, bakwia ang inyong panghinaut. Ug kon anaay balay o lungsod nga dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Hinumdomi kini: Sa adlaw sa Paghukom mas maluoy pa ang Dios sa mga tawo sa Sodoma ug sa Gomora kay sa mga tawo nianang lungsora!

ANG EBANGHELYO SA GINOO🙏🙏🙏

Pag-ampo sa Balaang Espiritu alang sa Panaghiusa

Balaang Espiritu, iusa kami isip usa ka lawas diha kang Kristo. Bungkaga ang matag dibisyon ug pun-a mi sa gugma. Hinaot nga among makita ang Imong panag-uyon diha sa Simbahan.

Amen.🙏🙏🙏

ANG LAMAS SA KINABUHI
HULYO 6, 2025
🙏🙏🙏

ANG LAMAS SA KINABUHI
Hulyo 5, 2025 (Sabado)

ANG PAGSANGYAW SA SANTOS NGA EBANGHELYO SUMALA NI SAN MATEO (Mt. 9:14-17)

Unya miadto kang Jesus ang mga tinun-an ni Juan nga Magbubunyag ug nangutana“ Ngano man nga kami ug ang mga Pariseo masubsob nga nagpuasa, apan wala magpuasa ang imong mga tinun-an?”
Si Jesus mitubag, “Naghunahuna ba diay kamo nga magsubo ang mga dinapit sa kombira sa kasal samtang ang pamanhonon uban pa kanila? Dili gayod! Apan moabot ang panahon nga ang pamanhonon kuhaon gikan kanila, ug magpuasa na unya sila.”
“Walay magtapak og bag-ong panapton sa daang bisti, kay ang maong tapak makagisi man sa bisti, ug mosamot kadako ang gisi niini. Ug walay tawo nga magsulod og bag-ong bino ngadto sa daang sudlanan nga panit. Kay kon iyang himoon kini, magisi ang sudlanan, ug unya ang bino mausik ug madaut ang sudlanan. Hinonoa, ang bag-ong bino isulod sa mga sudlanan nga bag-o aron dili maunsa ang bino ug ang mga sudlanan.

ANG EBANGHELYO SA ATONG GINOO.🙏🙏🙏