Calambeño

Launching ng Livelihood and Education Access Program (LEAP) para sa mga Probationer at Parolees

Calamba, Laguna — Inilunsad ng Parole and Probation Administration Region 4-A Calabarzon Calamba City PPO ang Livelihood and Education Access Program (LEAP), isang inisyatibo na naglalayong magbigay ng oportunidad sa kabuhayan at edukasyon para sa mga probationer at parolee sa lungsod ng Calamba, Bay, Calauan at Los Baños, Laguna sa mahigit 100 na kalahok. Sa pangunguna ni Mr. Joel Arjinal, Chief, Calamba Probation Parole Officer kasama ang Alternative Learning School (ALS) ng DepEd at Laguna State Polytechnic University, inilatag ang libreng pagsasanay upang matulungan ang mga kalahok na magkaroon ng kakayahan na kumita mula sa kani-kanilang tahanan.

Layunin ng programa na suportahan ang muling pagbabagong-buhay ng mga probationer at parolee sa pamamagitan ng pagbibigay ng praktikal na kasanayan at kaalaman na magagamit sa pang-araw-araw na pamumuhay. Kabilang sa mga aktibidad ang skills training at oryentasyon sa iba’t ibang oportunidad sa kabuhayan na maaaring pasukin ng mga kalahok.

Ayon kay Mr. Arjinal, magbibigay ang kanilang tanggapan ng mga assessment form upang matukoy ang interes at kakayahan ng bawat kalahok. Sa pamamagitan nito, maitutugma ang mga probationer at parolee sa mga programang angkop sa kanilang pangangailangan at nais tahakin.

Ang LEAP ay bahagi ng patuloy na pagsisikap ng Parole and Probation Office na itaguyod ang inklusibong pag-unlad at mabigyan ng panibagong pag-asa ang mga indibidwal na nagnanais magsimula muli.