Rautamai Network

हरेक गल्ति ले एक अनुभव बढाउछ,
त्यो अनुभव ले एउटा गल्ति घटाउने प्रयास चै गरिरहनु पर्छ ...

एकपटक एउटा राज्यका राजाले "जसले मलाई सबैभन्दा सुन्दर र मन छुने कुरा सुनाउँछ, उसलाई पुरस्कार स्वरूप ५०० चाँदीका सिक्का दिइनेछ।" भन्नेकुरा घोषणा गरे।
एक दिन राजा राज्यको भ्रमणमा निस्किएका थिए। बाटोमा उनले ९० वर्षकी एक वृद्ध आमालाई एउटा फलफूलको बिरुवा रोप्दै गरेको देखे। राजाले अचम्म मान्दै सोधे, "आमा, तपाईंको उमेर अब कति नै होला र? बढीमा ५-१० वर्ष बाँच्नुहोला। यो बिरुवाले त २० वर्षपछि मात्र फल दिन्छ। अनि यो उमेरमा यति धेरै दुःख किन गर्नुहुन्छ?"
वृद्धाले मुस्कुराउँदै जवाफ दिइन्, "महाराज, हामीले आज जुन फल खाइरहेका छौं, त्यो हाम्रा पुर्खाहरूले लगाएका थिए। आज म यो बिरुवा रोप्दै छु, ताकि मेरो आउने सन्ततिले फल खान पाऊन्।"
वृद्धाको दूरदर्शी र परोपकारी सोचले राजाको मन छोयो। राजाले प्रसन्न भएर उनलाई ५०० चाँदीका सिक्का उपहार दिए। उपहार पाउनासाथ ती वृद्धा हाँस्न थालिन्। राजाले सोधे, "आमा, तपाईं किन हाँस्नुभयो?"
वृद्धाले भनिन्, "महाराज, मैले रोपेको बिरुवाले त २० वर्षपछि मात्रै फल दिन्छ भन्नुहुन्थ्यो, तर मैले त रोप्नासाथ आजै फल पाइसके।"
वृद्धाको यो चतुर्याईं र मीठो बोली सुनेर राजा फेरि दंग परे। उनले थप ५०० चाँदीका सिक्का उपहार दिए। वृद्धा फेरि मुस्कुराइन्। राजाले फेरि सोधे, "अब किन हाँस्नुभयो?"
वृद्धाले विनम्रतापूर्वक भनिन्, "महाराज, संसारको नियममा रुखले वर्षमा एकपटक मात्र फल दिन्छ, तर मेरो यस्तो भाग्य छ कि मैले आजै दुईपटक फल पाइसकें।"
वृद्धाको मिठो बोलीबाट राजा यति प्रभावित भए कि उनले फेरि ५०० चाँदीका सिक्का दिए। अब भने राजाले ढिला नगरी त्यहाँबाट बिदा लिए।
राज्यको दरवार फर्कने क्रममा मन्त्रीले सोधे, "महाराज, तपाईं किन त्यति हतारमा त्यहाँबाट निस्कनुभयो?"
राजाले हाँस्दै भने, "म अझै केही बेर त्यहाँ बसिरहेको थिए भने, मेरा राज्यको ढुकुटी नै रित्तिनेथियो। ती वृद्धाको कुरा यति मीठा छन् कि उनको मुखबाट निस्कने कुरा कहिल्यै सकिनेवाला थिएन।"

शिक्षा: यस संसारमा धनले धेरै कुरा किन्न सकिन्छ, तर मान्छेको 'मन' केवल मीठो बोली, विनम्र व्यवहार र असल आचरणले मात्र जित्न सकिन्छ। सुन्दर शब्दहरूले शत्रुलाई पनि मित्र बनाउन सक्छ र बाँच्ने आधार दिन्छ।। - सन्तोष कार्की मौसुफ