2B Books

पुस्तक : भवानी भिक्षु : कृतित्व र व्यक्तित्व
संयोजन-सम्पादन : भाउपन्थी
विधा : कृतित्व र व्यक्तित्व

"भवानी भिक्षुमा पूर्णतः समर्पित यो कृति 'भवानी भिक्षु : कृतित्व र व्यक्तित्व' ले पश्चिम तराईमा जन्मी हुर्कीबढी शिक्षादीक्षा पाएका मूलतः मधेसकै एक अवधीभाषी तर आफ्नो सम्पूर्ण लेखकीय जीवन नेपाली भाषामा नेपाली साहित्य सिर्जनामै समर्पण गर्ने भिक्षुबारे र उनले नेपाली साहित्यमा अर्जेको एक अक्षय स्थान, उनका सदा पठनीय कृतिहरू र उनको व्यक्तित्वका विभिन्न पक्षको पुनः स्मरण गराउन समर्थ छ।"
- गङ्गाप्रसाद उप्रेती

पुस्तक : बङ्गलादेशका समकालीन कथाहरू
अनुवादक : ध्रुवचन्द्र गौतम
विधा : कथासङ्ग्रह

"यी कथाहरू पढ्दा मलाई के लाग्यो भने, दक्षिण-पूर्वी एसियाली देशका कथावस्तुहरू मिल्दाजुल्दा हुँदा रहेछन्। प्रस्तुत सङ्कलनले हामीलाई बङ्गलादेशीय समाज र जीवनको विविध चित्र दर्साएको छ। दारिदय्र मनोवैज्ञानिक द्वन्द्व, सामाजिक र राजनैतिक परिस्थितिको चित्रण यस सङ्ग्रहमा बडो प्रभावकारी किसिमले गरिएको छ।"
- अनुवादक

पुस्तक : जिन्दगी र समय
लेखक : ध्रुव मधिकर्मी
विधा : कथासङ्ग्रह

"यी कथाको पृष्ठभूमिमा धेरैजसो त्यही भक्तपुर देखापर्छ, जसको प्राचीन शिल्पकलाले अलकापुरीको झलक दिन्छ, जहाँको खेतबारी शहरैसित जोरिएका छन्, जहाँ शहरभित्र पनि अपरिवर्तित ग्राम्य जीवन र वेगले परिवर्तित हुन लागेको शहरी जीवन सँगसँगै छन्। यी कथाहरू कृषि-सभ्यताबाट आधुनिक सभ्यतातिर प्रवेश गरिरहेको, तर त्यसको असीमित लालसा पूर्ति गर्न नसकेको समाजको विरोधाभास र विसंगतिका कथा हुन्। यी कथाहरू समयले ल्याएका अन्योल र अनिश्चिततालाई भोग्न परिरहेका कथा हुन् र आजको समयले गरेका यस प्रश्नका कथा पनि हुन्।"
- माधवप्रसाद घिमिरे

पुस्तक : कागतीको सिरप
लेखक : कमल दीक्षित
विधा : निबन्धसङ्ग्रह

"यी सबै निबन्धहरू गोरखापत्रसम्बन्धी छन्। यी निबन्धहरूले गोरखापत्रको क्रमबद्ध इतिहास प्रस्तुत नगरे तापनि गोरखापत्रका विभिन्न पहलूबारे जानकारी दिन्छन्। यी सबै लेखहरूले लेखकको खोजपूर्ण कलमको परिचय दिनुका साथै गोरखापत्रको अनुसन्धान हुनुपर्दछ भन्ने कमल दीक्षितको तीब्र लगनलाई बराबर व्यक्त गरेका छन्।"
- रामचन्द्र मलहोत्र