TOKHA LIVE

पेट्रोलियम पदार्थको मूल्य भारतबाट बढेर आयो

टाेखालाइभ /श्रावण १६,२०८० काठमाडौं/ भारतबाट पेट्रोल तथा डिजेलको भाउ बढेर आएको छ। भारतीय आयल कर्पोरेसन (आईओसी)ले नेपाल आयल निगमलाई पठाएको मूल्यसूचीअनुसार पेट्रोल प्रतिलिटर ७ रुपैयाँ ८७ पैसा र डिजेल ६ रुपैयाँ ६१ पैसाले बढेर आएको नेपाल आयल निगमले जनाएको छ।आईओसीले हरेक १५–१५ दिनमा नयाँ मूल्यसूची पठाउने गरेकोमा यस पटक मूल्य बढेर आएको हो।आईओसीले पठाएको सूचीअनुसार नै नेपालमा पनि स्वचालित प्रणालीबाट मूल्य समायोजन हुने गरेको छ। सोअनुसार स्वचालित प्रणालीबाट निगमले मूल्य समायोजन गर्नेछ। ग्यासको मूल्य भने प्रतिसिलिण्डर करिब १ सय रुपैयाँ घटेर आएको छ। नेपालमा पनि ग्यासको मूल्य घट्नेछ।

टोखा वडा-९ बाट जुवातास खेलिरहेको अवस्थामा १२ जना पक्राउ

टाेखालाइभ /श्रावण १५,२०८० काठमाडौं। टोखा नगरपालिका वडा-९ मिलन टोलस्थित राजेन्द्र प्रसाद जोशीको सेती गण्डकी गेष्ट हाउसमा जुवातास खेलिरहेको अवस्थामा बैतडी पुर्चौडी नगरपालिका-९ घर भएका ३६ वर्षीय राजेन्द्र बहादुर थापा समेत १२ जनालाई आइतबार राति प्रहरीले पक्राउ गरेको छ । विशेष सूचनाको आधारमा प्रहरी वृत्त महाराजगंज र प्रहरी प्रभाग गोंगबुबाट खटिएको प्रहरीले उनीहरूलाई नगद १० लाख ४४ हजार ५ सय नेपाली रूपैयाँ र २ हजार ५ सय भारतीय रूपैयाँसहित पक्राउ गरेको हो ।

असं को भुलु अजिमा

- बद्रीनाथ कायस्थ
किम्बदन्तीको कथा अनुसार लिच्छविकालभन्दा पहिले यस स्थानमा केही पीठ जस्ता पत्थरहरू खडा रहेको भान हुन्छ । कथा अनुसार एकदिन ठिमीबाट एक जना व्यापारी आफ्नू चामल बिक्री गर्न यहाँ आइपुगेछ ।त्यहाँ उसले पत्थरहरू खडा देखेर त्यसकै आड लगाएर खर्पनमा बोकेर ल्याएको चामलको भारी निकालेर बिसाएछ । साँझपख आफ्नू घर ठिमी फर्कने विचार गरेर चामलको भारी उठाएर खर्पनमा राखेर लैजान्छु भनेर चामलको भारी उठाउन खोज्दा उठाउन सकेनछ । धेरै समयसम्म धेरै तरिका अपनाएर आफ्नू बल/बुद्धि लगाउँदा पनि नसकेर हार खाएर त्यहीँ छोडेर घर फर्केर गएछ ।

घरको परिवारहरूले चामलको भारीको बारेमा सोध्दा ‘अनसं( त्यही नै छोडेर आएको)’ बताएछ । भोलिपल्ट गएर हेर्दा सो भारी जस्ताको तस्तै सोही स्थानमा रहेको पाएछ । सो चामल व्यापारीलाई ती पीठहरूमा केही शक्ति भएको महसुस भई केही चामल भगवान्को नाममा चढाएर सोही स्थानमा व्यापार गर्न बसेछ । सो दिन चामलको व्यापार राम्रो भएपछि प्रत्येक दिन सोही स्थानमा चामल चढाएर व्यापार गर्न बस्ने गरे र अरू साथीहरूलाई पनि सो कथा सुनाएछ । यो कुरा सुनेपछि अरू खाद्यान्न व्यापारीहरू पनि त्यही बसेर पीठहरू मा केही खाद्यान्न चढाएर व्यापार गर्न बस्न शुरु गरेछन् । यसरी यस स्थानमा व्यापार गर्नुभन्दा पहिले केही खाद्यान्न भगवान्लाई चढाएर बस्दा राम्रो व्यापार हुने भएछ । त्यसलाई भगवान्को कृपा मानेर सबै व्यापारीहरूले मान्ने गरेछन् । यसरी अनसं बाट ‘असं’ नाम रहन गयो र खाद्यान्न व्यापारीहरूको लागि अन्नपूर्णा देवी हुन गयो । यसरी असं भुलु अजिमा को महत्त्व असनको अन्नपूर्णा को रूपमा प्रसिद्ध भएको भान हुन्छ ।

त्यसपछि सो स्थानमा खाद्यान्न को व्यापारीहरू बढ्दै गएको भान हुन्छ । त्यहाँ अन्न चढाएर व्यापार गर्न बस्नेहरू सबैको व्यापार राम्रो हुँदै गयो । त्यहाँबाट अन्न किनेर लानेहरूको पनि भलो भएको देखेर त्यस स्थानमा अन्नपूर्णा माता नै भएको विश्वास गरेर लिच्छवि कालमा नै पीठहरू भएको स्थानमा अन्नपूर्णा माताको स्थापना भएको भान हुन्छ । यसरी सो स्थान अन्नपूर्णा माताबाट आशीर्वाद प्राप्त व्यापार केन्द्र भएको देखिन्छ ।