Time News

Вашингтон мужид химийн бодисын сав дэлбэрч, олон хүн амиа алджээ

АНУ-ын Вашингтон муж дахь Nippon Dynawave Packaging үйлдвэрийн химийн бодисын том сав дотогшоо цөмөрч дэлбэрсний улмаас хэд хэдэн хүн амиа алдаж, бусад нь хүнд бэртсэн талаар эрх баригчид мэдээлжээ.

Осол болсон Лонгвью хот нь Портланд хотоос хойд зүгт ойролцоогоор 70 км зайд оршдог.

Химийн түлэгдэлт болон бусад гэмтэл авсан олон хүнийг ойролцоох эмнэлгүүдэд хүргэсэн байна. Эрх баригчид “одоогоор ойр орчмын иргэдэд шууд аюул занал учраагүй” гэж мэдэгджээ. Хамтарсан мэдэгдэлд осолтой холбоотойгоор хүн нас барсан, олон хүн хүнд бэртсэн талаар дурдсан ч тодорхой тоо мэдээлээгүй байна.

Ослын газарт ажилласан Скотт Голдштейн хэвлэлийн бага хурлын үеэр есөн ажилтан болон нэг гал сөнөөгчийг эмнэлэгт хүргэсэн гэж мэдэгджээ. Нас барсан хүний тоо “одоо хүртэл тодорхойгүй” байгаа гэлээ.

PeaceHealth St John Medical Center эмнэлэг ABC News-т мэдээлэхдээ осолтой холбоотой есөн өвчтөн хүлээн авсны дотор нэг хүн нас барсан байсан гэжээ. Зургаан хүний биеийн байдал тогтвортой байгаа бол хоёр хүнийг өөр эмнэлэг рүү шилжүүлсэн байна.

Хамтарсан мэдэгдэлд өгүүлснээр, цаасны нухаш үйлдвэрлэлд ашиглагддаг натрийн гидроксид болон натрийн сульфидын холимог болох “white liquor” хэмээх химийн уусмалтай сав орон нутгийн цагаар өглөөний 7:15 цагийн орчимд хагарчээ.

Уг 80 000 галлон буюу ойролцоогоор 300 000 литрийн багтаамжтай сав ослын үед 60 орчим хувь дүүрэн байсан гэж мэдээлсэн байна.

Үүний зэрэгцээ Калифорниа мужийн өмнөд хэсэгт эрх баригчид метил метакрилат агуулсан үйлдвэрийн савны хэт халалтыг хянаж байгаа аж. Энэ нь хуванцар үйлдвэрлэлд ашиглагддаг маш шатамхай химийн бодис юм.