Food For Soul - ACM

🥀✞︎ ချစ်သူများနေ့ (ဝါ) St. Valentine အကြောင်း ✞︎🥀

👉 "စိန့်ဗန်လန်တိုင်း Valentine ဇာတ်ကြောင်း အစစ်အမှန်နှင့် ခရစ်ယာန် မောင်မယ်များအတွက် စိန့်ဗန်လန်တိုင်း၏ သတင်းစကား" 👈

အချစ်ပန်းစည်းလက်ဆောင်တွေ၊ ချိုချဉ် ချောကလက်တွေ၊ အသည်းနှလုံးပုံကဒ်တွေ၊ အချစ်ရေး အချစ်ရာတွေ။ ဗန်လန်တိုင်းဒေးဆိုရင် ဒါတွေပဲ လုပ်ရမယ် ဟုတ်တယ်ဟုတ်? အင်း၊ ပြောရရင် ဒီပန်းစည်းတွေနဲ့ ဗန်လန်တိုင်းဟာ အရမ်း စပ်ဆိုင်လှတာမဟုတ်ဘူး။

ဒီတော့ မြန်မာပြည်နဲ့ အခြားနိုင်ငံတွေမှာ အဲ့ဒီနေ့ကို အားလပ်ရက် အဖြစ် မသတ်မှတ်ပေမယ့် တချို့ နိုင်ငံတော်တော်များများမှာ ရုံးပိတ်အားလပ်ရက် အဖြစ် သတ်မှတ်ပါတယ်။

ထုံးတမ်း အစဉ်အလာအရ ဗန်လန်တိုင်းဒေး မူရင်း ဇစ်မြစ်ကို ကြည့်မယ်ဆိုရင် အချစ်ဇာတ်လမ်း ရိုမန့်တစ်ဆန်လှတယ်တော့လည်း မဟုတ်ပါဘူး။ အိုင်ယာလန်နိုင်ငံ White-friars လမ်းမှာရှိတဲ့ ဘုရားကျောင်းမှာ တာဝန်ယူတဲ့ ဘုန်းတော်ကြီး ဖာသာရ် ဖရန့် အိုဂါရာ Frank O’Gara ဟာ စိန့်ဗန်လန်တိုင်း အကြောင်းကို ပြောပြခဲ့ပါတယ်။

“သူဟာ ရောမမြို့သား ကက်သလစ် ဘုန်းတော်ကြီး တစ်ပါးဖြစ်ပြီး အဲ့ဒီအချိန် အေဒီ ၃ ရာစု ခရစ်ယာန်များကို ရောမ ဧကရာဇ်များ သုတ်သင်သတ်ဖြတ်နေတဲ့ အချိန်လည်းဖြစ်ပါတယ်။ ရောမအင်ပါယာ ပြည့်ရှင် အမည်ကတော့ Claudias ကလောင်းဒီးယပ်စ် ဖြစ်ပြီး သူက အဲ့ဒီအချိန်က လူငယ်လူရွယ်တွေ အိမ်ထောင်ပြု လက်ထပ်ထိမ်းမြားခြင်းကို ဆန့်ကျင်ကန့်သတ်ထားပါတယ်။ ပြည့်ရှင် ကလောင်းဒီးယပ်စ်ရဲ့ အတွေးလေးကတော့ အိမ်ထောင်မရှိတဲ့ စစ်သားတစ်ဦးဟာ ငါသေသွားရင် မိသားစုတော့ ဒုက္ခရောက်တော့မှာပဲ ဆိုတဲ့ အတွေးမရှိတဲ့အတွက် စစ်ပွဲမှာ တိုက်ရည်ခိုက်ရည် ပိုကောင်းနိုင်တယ်လို့ပဲ ဖြစ်ပါတယ်။”

“နောက်တစ်ချက် သိထားရမှာက အဲ့ဒီ ရောမခေတ်ဆိုတာ လိင်မှုကိစ္စနဲ့ ပတ်သက်ပြီး စည်းမရှိ ဗရမ်းဗတာနိုင်တဲ့ အချိန် ဖြစ်ပါတယ်။ Polygamy ဆိုတဲ့ လင်ပြိုင် မယားပြိုင်ယူတဲ့ ဓလေ့ဟာ တစ်လင်တစ်မယား စနစ်ထက် ပိုမို လွှမ်းမိုးနေတဲ့ အချိန် ဖြစ်ပါတယ်။ သို့ပေမယ့် ကက်သလစ် ခရစ်ယာန် အသင်းတော်ဟာ လက်ထပ်ထိမ်းမြားခြင်း၊ မင်္ဂလာဆောင်ခြင်းဆိုတာကို လွန်စွာမှ မွန်မြတ်သန့်ရှင်းတဲ့ လုပ်ရပ်အနေနဲ့ လက်ခံတာမို့ ခရစ်ယာန် ဘာသာဝင် အမျိုးသား အမျိုးသမီးများဟာ ဘုရားရှေ့ လူရှေ့မှာ သေတပန် သက်တဆုံး တစ်လင် တစ်မယား စနစ်နဲ့ နေထိုင်ကြဖို့ သွန်သင်ပါတယ်။ အဲ့ဒီ အချိန်မှာ ရောမအင်ပါယာအတွင်း နေထိုင်ကြသူများဟာ ခရစ်ယာန်ဘာသာဝင်များအဖြစ် ခံယူလာကြတဲ့ အတွက် တစ်လင်တစ်မယား စနစ်ဟာ ပိုမို ကျယ်ပြန့်လာပါတယ်။ ဒါကို ခရစ်ယာန်ဘာသာကို ဆန့်ကျင်မုန်းတီးတဲ့ နတ်ကိုးကွယ်သူ Pagan ရောမဧကရာဇ်အတွက် ပိုမို မျက်မုန်းကျိုးစရာ ဖြစ်လာပါတယ်။”

“သို့ပေမယ့် ခရစ်ယာန် အသင်းတော်ဟာ တစ်လင် တစ်မယားစနစ်နဲ့ တသက်တာ စွဲစွဲမြဲမြဲ ချစ်မြတ်နိုးပါမယ်ဆိုတဲ့ စုံတွဲကို လက်ထပ်ထိမ်းမြားခြင်း မင်္ဂလာကို ဘုရားကျောင်း အစဉ်အလာနဲ့ ဆက်လက် ကျင်းပပေးနေပါတယ်။ လက်ထပ်ထိမ်းမြားခြင်းကို တားမြစ်ပေမယ့် ဖာသာရ် ဗန်လန်တိုင်းဟာ မင်္ဂလာဆောင်ခြင်းကို ကျင်းပပေးနေခဲ့ပါတယ်။”

“နောက်ဆုံးမှာတော့ ရောမအင်ပါယာ ဧကရာဇ် ဒုတိယမြောက် ကလောင်းဒီးယပ်စ် လက်ထပ်မှာ ဖာသာရ် ဗန်လန်တိုင်းဟာ ချစ်သူစုံတွဲကို လက်ထပ်ထိမ်းမြားခြင်းပေးတဲ့ အတွက် အဖမ်းခံရပြီး ညင်းပန်းနိုပ်စက်ခြင်း ခံခဲ့ရပါတယ်။ ဖာသာရ် ဗန်လန်တိုင်း အကျဉ်းချထားခြင်းခံရတဲ့အချိန်မှာ ဖြစ်ပျက်ခဲ့တာတွေနဲ့ ပတ်သက်ပြီး ဒဏ္ဍာရီတွေ ရှိပါတယ်။"

“ဒီအထဲက ထင်ရှားတဲ့ အဖြစ်အပျက်တစ်ခုကတော့ Asterius အာ့စတီးရီးယပ်စ်နဲ့ သူ့သမီး မျက်မမြင်တစ်ဦး အကြောင်းပါ။ အာ့စတီးရီးယပ်စ်ဟာ ရောမဥပဒေအရ ဖာသာရ် ဗန်လန်တိုင်းကို စီရင်ချက်ချမယ့်သူထဲက တစ်ဦးဖြစ်ပါတယ်။ ဖာသာရ် ဗန်လန်တိုင်းဟာ သူ့သမီး မျက်မမြင်အတွက် ဆုတောင်းခြင်းနဲ့ ကုသပေးခဲ့တဲ့အတွက် သမီးဟာ မျက်မမြင်ဘဝက ကျွတ်လွတ်ခဲ့ကာ အဖေဖြစ်သူ အာ့စတီးရီးယပ်စ်ဟာ ခရစ်ယာန်ယုံကြည်သူ ဖြစ်လာခဲ့ပါတယ်။”

“ခရစ်သက္ကရာဇ် အေဒီ ၂၆၉ ခုနှစ်မှာ ဖာသာရ် ဗန်လန်တိုင်းကို ပြစ်ဒဏ် သုံးခုပေးပြီး သေဒဏ် စီရင်ခဲ့ပါတယ်။ ပထမဆုံး သူဟာ ရိုက်နှက်နိုပ်စက်ခြင်းကို ခံရမှာပါ။ ဒုတိယ ပြစ်ဒဏ်အနေနဲ့ ဖာသာရ် ဗန်လန်တိုင်းဟာ လူအုပ်ကြီးရဲ့ ကျောက်ခဲနဲ့ ပေါက်ခြင်းကို ခံရမှာပါ။ အဆုံးမှာတော့ သူဟာ ခေါင်းဖြတ်စီရင်ခြင်းကို ခံရပါတယ်။ ဖာသာရ် ဗန်လန်တိုင်းရဲ့ ခရစ်ယာန် လက်ထပ်ထိမ်းမြားခြင်းအပေါ် ရပ်တည်ချက်ကြောင့် ဒီစီရင်ချက်တွေအားလုံးကို ခံရတာ ဖြစ်ပါတယ်။ သေဒဏ်စီရင်ခြင်းမခံရမီ ဖာသာရ် ဗန်လန်တိုင်းဟာ စက္ခုအလင်းပြန်ရလာသူ အာ့စတီးရီးယပ်စ်ရဲ့ သမီးကို စာတစ်စောင် ရေးခဲ့ပါတယ်။ ဒီစာလေးရဲ့ အဆုံးသတ်မှာ ယနေ့ခတ်မှာ ထင်ရှားတဲ့ စာသားလေးဖြစ်တဲ့ “သင်၏ ဗန်လန်တိုင်းဆီမှ From Your Valentine” ဆိုတာလေးနဲ့ အဆုံးသတ်ရေးသားခဲ့ပါတယ်။”

ဖာသာရ် အိုဂါရာက ပြောကြားခဲ့ပါတယ်။ “ကက်သလစ် ခရစ်ယာန် ယုံကြည်သူတစ်ဦး၊ ခရစ်ယာန် ဘုန်းတော်ကြီး တစ်ပါးအနေနဲ့တော့ ဗန်လန်တိုင်းဒေးဆိုတာဟာ ကိုယ်ချစ်မြတ်နိုးတဲ့သူ တစ်ဦး (သို့မဟုတ်) ကိုယ့်ယုံကြည်ချက်အတွက် တစ်နေ့မှာ ကိုယ့်အသက်ကို ပေးဆပ်ရတဲ့ အချိန်တစ်ခု လာတတ်တယ်ဆိုတာကို အမှတ်ရနေဖို့ပဲ ဖြစ်ပါတယ်။ ဒီလို အမှန်တရား ယုံကြည်ခြင်းအတွက် အသက်ပေးတဲ့ အထိ ပေးဆပ်ဖို့ ဆိုတာဟာလည်း သန့်ရှင်းသော ဝိညာဉ်တော်ဘုရား Holy Spirit ရဲ့ ဘုန်းတန်ခိုးကျေးဇူးတော်နဲ့ ကျွန်တော်တို့ လုပ်ဆောင်နိုင်မှာ ဖြစ်ပါတယ်။”

“ဖာသာရ် ဗန်လန်တိုင်းရဲ့ ခရစ်ယာန် ယုံကြည်ခြင်းအတွက် အသက်စွန့် အသေခံခြင်းဟာ အများပြည်သူလူထုက သတိပြုမိခဲ့ပါတယ်။ ယနေ့ခေတ် အခါမှာဆိုရင် စိန့်ဗန်လန်တိုင်းရဲ့ ရုပ်ကလာပ် အစိတ်အပိုင်းကို သုံးပိုင်းခွဲခြမ်းခဲ့ပြီး ဘုရားကျောင်း သုံးခုမှာ ဌာပနာထားတဲ့ ထားရှိပါတယ်။ ယနေ့လို စိန်ဗန်လန်တိုင်း ပွဲနေ့ Feast Day of St. Valentine မှာဆို ဒီဘုရားကျောင်း သုံးကျောင်းမှာ ဘုရားဖူး အဖြစ် လူအများ သွားရောက်ကြပြီး အသက်ပေးလှုခဲ့တဲ့ ဒီခရစ်ယာန် ရဟန္တာကို သွားရောက် ဂုဏ်ပြုကြပါတယ်။ ဒီဘုရားကျောင်း သုံးကျောင်းက တစ်ခုကတော့ ကျွန်တော်တာဝန်ယူတဲ့ White-friars လမ်းထဲက ဘုရားကျောင်းပဲ ဖြစ်ပါတယ်။”

“စိန့်ဗန်လန်တိုင်းဟာ ချစ်သူများ ကိုးစားရာ ရဟန္တာဖြစ်ပါတယ်။ လက်ထပ်မယ့် ခရစ်ယာန် ဇနီးမောင်နှံဟာ လက်မထပ်ခင်မှာတင် ဘုရားသခင်ကို ချစ်တဲ့ ယုံကြည်ခြင်းမျိုး လိုအပ်ပါတယ်။ အကယ်၍များ စိန့်ဗန်လန်တိုင်းသာ ယနေ့ခေတ်အခါမှာ ကျွန်ုပ်တို့နဲ့ အတူရှိနေရင် ဇနီးမောင်နှံများကို သူပြောမှာက ‘သင်တို့ အိမ်ထောင်ရေးမှာ ဒုက္ခအခက်အခဲ ကျရောက်တဲ့ အချိန်ရှိပါလိမ့်မယ်။ အရမ်း ရင်ခုန်တဲ့ အချစ်မျိုးကနေ အနေအေး သလိုလို ဖြစ်တဲ့ အခြေအနေမျိုးကို ကြုံတွေ့ရတတ်သလို ရှိပါလိမ့်မယ်။ ဒီလို အချိန်မျိုးတွေမှာ သင်တို့ လက်ထပ်ထိမ်းမြားခြင်း မင်္ဂလာကို ခံယူတုန်းက ဘုရားအရှေ့ လူ့အရှေ့မှာ ပြုခဲ့တဲ့ ကတိကဝတ်တွေကို ပြန်လည် အမှတ်ရပြီး စောင့်ထိန်းကြဖို့၊’ ဖြစ်ပါတယ်။”

“သို့ပေမယ့်လည်း လက်မထပ်ရသေးတဲ့ ခရစ်ယာန် လူငယ်များအနေနဲ့ ကိုယ့်ကိုကိုယ် ဆန်းစစ်မေးမြန်းရမယ့် မေးခွန်းက ကိုယ်ဟာ လက်ထပ်ထိမ်းမြားခြင်း မင်္ဂလာခံယူတဲ့အခါ ဒီလို အခြေအနေတွေအတွက် အဆင်သင့် ဖြစ်ပြီလား ဆိုတာပဲ ဖြစ်ပါတယ်။ လက်ထပ်ထိမ်းမြားခြင်းမှာ ပါဝင်တဲ့ လူသားအချင်းချင်း ချစ်မြတ်နိုးခြင်း၊ ထိတွေ့ကြင်နာခြင်း စတာတွေဟာ လွန်စွာ လှပပါတယ်။ ဒါတွေက ဘုရားသခင်ရဲ့ ကျေးဇူးတော်တွေပဲ ဖြစ်ပါတယ်။ ဒါပေမယ့်လည်း သိမှတ်ထားရမှာက ဒီချစ်ခြင်းမေတ္တာတွေနဲ့ အိမ်ထောင်စုဟာ လက်ဝါးကားတိုင်လမ်း ဒုက္ခဆင်းရဲ အခက်အခဲတွေ ကြုံတွေ့လာရင်လည်း ကြံ့ကြံ့ခံ ရင်ဆိုင်ကြဖို့ ဖြစ်ပါတယ်။

‌ဒါဟာ ကျွန်တော်တို့ ခရစ်ယာန်များရဲ့ ဗန်လန်တိုင်းဒေးဆိုတဲ့ အဓိပ္ပာယ်ပဲ ဖြစ်ပါတယ်။”

(ဘာသာပြန် ... မွန်းဆောင်)

Congratulations Bishop Felice Ba Htoo!

ဖယ်ခုံကက်သလစ် ဂိုဏ်းအုပ်သာသနာ၊ ဂိုဏ်းအုပ်ဆရာတော် ပီတာလတ်၏ အနားယူခြင်းတောင်းခံလွှာကို ပုပ်ရဟန်းမင်းကြီး အရှင်သူမြတ်လီအို ၁၄
လက်ခံပြီး သူ၏အရိုက်အရာဆက်ခံပိုင်ခွင့်နေရာကိုဆရာတော်ဖိလိချယ်ဘထူးအား ပလ္လင်တင်အပ်နှင်းခြင်းကြေညာစာကို ဖေဖော်ဝါရီလ ၂ ရက်နေ့ ၂၀၂၆ ခုနှစ် မနေ့ညမြန်မာစံတော်ချိန် ညနေ ၅း၃၀ တွင် ပုပ်ရဟန်းမင်းကြီး၏ ရုံးတော် ဗာတီကန်မှကြေညာခဲ့ပါသည်။

https://share.google/Ai7QHXkzIFB6CU4Az

Photo: OSC Pekhon