Connect Burma

မြန်မာအကျပ်အတည်း တိုးတက်မှုမရှိ ကြောင်း အာဆီယံ ခေါင်းဆောင်တွေ ပြော

■ လူသားချင်းစာနာမှုဆိုင်ရာ အခြေအနေတွေပိုမိုဆိုးရွားလာတယ်လို့ ဆို

Connect Burma၊ မေ ၉

မြန်မာ နိုင်ငံမှာ ကာလရှည်ကြာဖြစ်ပွားနေတဲ့ အကျပ်အတည်းတွေဟာ တိုးတက်မှု မရှိဘဲ လူချင်းစာနာမှုဆိုင်ရာ ဘေးဒုက္ခတွေဟာလည်း အခြေအနေပိုမိုဆိုးရွားလာကြောင်း အာဆီယံ ထိပ်သီးအစည်းအဝေး အပြီးမှာအဖွဲ့ ဝင်နိုင်ငံတချိုု့ရဲ့ ခေါင်းဆောင်တွေက ပြောကြားခဲ့ပါတယ်။

၂၀၂၁ ခုနှစ် စစ်အာဏာသိမ်းမှုနောက်ပိုင်း မြန်မာ့အရေး ဖြေရှင်းရာမှာ တိုးတက်မှု အလွန်နှေးကွေးနေ တဲ့ အပေါ် အာဆီယံ ခေါင်းဆောင်တွေ စိတ်ပျက်နေကြောင်း အာဆီယံ အလှည့်ကျ ဥက္ကဌ ဖိလစ်ပိုင် နိုင်ငံရဲ့ သမ္မတ ဖာဒီနန် မားကို့စ် ဂျူနီယာက သောကြာနေ့မှာ ပြောကြားခဲ့ပါတယ်။

(၄၈) ကြိမ်မြောက် အာဆီယံထိပ်သီးအစည်းအဝေးနှင့် ဆက်စပ်အစည်းအဝေးတွေ ကျင်းပြီးနောက် ပြုလုပ်တဲ့ သတင်းစာရှင်းလင်းပွဲမှာ အာဆီယံ အလှည့်ကျ ဥက္ကဌ ဖိလစ်ပိုင် သမ္မတ က အခုလို ပြောကြားခဲ့တာဖြစ်ပါတယ်။

မြန်မာ အကျပ်အတည်းဟာ နှစ်ကာလ ရှည်ကြာမဖြေရှင်းနိုင်တဲ့ အပြင် ဆူးညှောင့် သဖွယ်ဖြစ်လာတယ်လို့ လည်း သူ ကပြောဆိုခဲ့ပါတယ်။

"ကျွန်တော်တို့ လုံလောက်အောင် မလုပ်ခဲ့ဘူးလို့တော့ မယုံကြည်ပါဘူး။ ကျွန်တော်တို့ ဘာတွေ ထပ်လုပ်နိုင်သေးလဲ ဆိုတာမေးခွန်းထုတ်ရပါမယ်။ ကျွန်တော်တို့ ဆွေးနွေးပွဲတွေကိုလည်း အဲဒီဘက်ကိုပဲ ဦးတည်ခဲ့ပါတယ်။ ရှေ့ကို ဆက်မတိုးတဲ့အတွက် ကျွန်တော်တို့ ဘာတွေ ထပ်လုပ်နိုင်မလဲဆိုတာကိုပဲ ဆွေးနွေးခဲ့ကြတာပါ" လို့ ဖိလစ်ပိုင် သမ္မတ က သတင်းစာရှင်းလင်းပွဲမှာပြောကြားခဲ့ပါတယ်။

မြန်မာ အကျပ်အတည်းဖြေရှင်းရေး တိုးတက်မှု မရှိတာကို အာဆီယံ အဖွဲ့ဝင်နိုင်ငံတွေ အနေနဲ့ အလွန် အမင်း စိတ်ပျက်ရတယ်လို့ လည်း သူကပြောပါတယ်။

"လုပ်ငန်းစဉ်တွေက ရှေ့မတိုးတဲ့အပေါ်မှာ အဖွဲ့ဝင်နိုင်ငံတွေအနေနဲ့ တကယ်ပဲ စိတ်ပျက်မိပါတယ်။ ရှေ့တိုးတယ်ဆိုရင်တောင် အလွန်နည်းပါးတဲ့ ပမာဏပဲ ရှိပါတယ်။ ကျွန်တော်တို့ မျှော်လင့်ထားသလောက်တော့ တိုးတက်မှု မရှိတာ သေချာပါတယ်" လို့ သူကပြောပါတယ်။

အာဆီယံ ဘုံသဘောတူညီချက် ၅ ရပ်ကို လိုက်နာမယ်လို့ မြန်မာ စစ်အုပ်စု ကိုယ်တိုင်လက်ခံ ထားသော်လည်း ဒီနေ့အထိ ဆောင်ရွက်တာမရှိကြောင်း ဖိလစ်ပိုင် သမ္မတ က ပြောပါတယ်။

မြန်မာ နိုင်ငံဟာ အာဆီယံ အဖွဲ့ဝင်ဖြစ်တဲ့ အတွက်အသိအမှတ်ပြုပြီးသားဖြစ်လို့ နောက်ထပ် အသိအမှတ်ပြုစရာ မလိုအပ်ကြောင်း သို့သော်လည်း ပဋိပက္ခနဲ့ အကျပ်အတည်းတွေ ဖြေရှင်းရေး အတွက် လူ့အခွင့် အရေး ကို လေးစားလိုက်နာဖို့ နဲ့ တရားဥပဒေစိုးမိုးရေး ကို လျစ်လျူရှု မှာ မဟုတ်ကြောင်း ပြောကြားခဲ့ပါတယ်။

"အာဆီယံ ခေါင်းဆောင်တွေအနေနဲ့ အိုင်ဒီယာအသစ်တွေ ရှာဖွေဖို့ ကြိုးစားသွားမှာပါ။ ဘာလို့လဲဆိုတော့ ကျွန်တော်တို့ အစည်းအဝေးမှာ ထိုင်နေရင်းနဲ့ ငါတို့ဆီမှာ အဖြေတွေ မရှိသေးဘူး ဆိုတာကို ပြောခဲ့ကြလို့ပါ။ ဒီကိစ္စတွေကို အခုချက်ချင်း ဆုံးဖြတ်မှာ မဟုတ်ပါဘူး။ ဒါပေမဲ့ ကျွန်တော်တို့ ပြန်သွားကြတဲ့အခါမှာ လုပ်ငန်းစဉ်တွေ တိုးတက်လာဖို့နဲ့ အပြောင်းအလဲတွေ စတင်မြင်တွေ့ရဖို့အတွက် ဘာတွေလုပ်နိုင်မလဲဆိုတာကို စဉ်းစားရှာဖွေသွားကြမှာပါ" လို့ ဖိလစ်ပိုင် သမ္မတ က ဆိုပါတယ်။

မေလ ၇ ရက်နေ့ နဲ့ ၈ ရက်နေ့က ဖိလစ်ပိုင်နိုင်ငံ ဆီဘူး မြို့မှာ ကျင်းပတဲ့ အာဆီယံထိပ်သီးအစည်းအဝေး သမ္မတ အဖြစ်တာဝန်ယူထားတဲ့ စစ်ခေါင်းဆောင်ကိုတက်ရောက်ခွင့် မပြုဘဲ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟော်ခန်းဆွမ်က တက်ရောက်ခဲ့ပါတယ်။

ကိုးကား - GMA News