Grit Financial Advisory

GRIT_Passion for your growth.

“ဒီအချက် ၅ ချက် ရှိနေရင် အခက်အခဲတိုင်းကို ကျော်ဖြတ်နိုင်တယ်”

◾️ခက်ခဲကြမ်းတမ်းတဲ့ အခြေအနေကို ၂ နှစ်ခွဲနီးပါး ကြာသည်အထိ တောင့်ခံနေကြဆဲဖြစ်တဲ့ မြန်မာပြည်သူတွေကို စကားလုံးတစ်လုံးတည်းနဲ့ ဖော်ပြပါဆို “Grit” လို့ ပြောချင်တယ်။

သူ့အဓိပ္ပါယ်က “သန်မာသော၊ ကြံ့ကြံ့ခံနိုင်သော၊ အလွယ်တကူ လက်မလျှော့တတ်သော၊ အရှုံးမပေးတတ်သော၊ အစဉ်အမြဲ တိုးတက်အောင် ကြိုးစားနေတတ်သော စိတ်ဓါတ်အရည်အသွေးမျိုး” ဖြစ်ပါတယ်။

◾️လူတစ်ယောက်ရဲ့ဘ၀ အောင်မြင်မယ်၊ မအောင်မြင်ဘူး ဆိုတာကို သူ့ရဲ့ ဉာဏ်ရည်ဉာဏ်သွေး၊ စာမေးပွဲရလဒ် စတာတွေနဲ့ အကဲဖြတ်ကြတယ်။ လိုအပ်တာတော့ မှန်ပေမဲ့ အဲဒီအချက်တွေက ဒီလောက်ကြီး အာမခံချက် မပေးနိုင်ဘူးလို့ သုတေသနတွေအရ သိရတယ်။ ဆိုလိုတာက ဉာဏ်ကောင်းတိုင်းလည်း ဘဝမှာ အောင်မြင်ချင်မှ အောင်မြင်မှာပေါ့။

အဲဒီထက် ပိုပြီး သေချာရေရာတာကတော့ “ဒီလူဟာ ဘယ်လောက်ထိ စိတ်ဆန္ဒ ပြင်းပြသလဲ၊ ဇွဲကောင်းသလဲ၊ လက်မလျှော့တတ်ဘူးလဲ” ဆိုတဲ့အချက်ပဲ ဖြစ်တယ်။

◾️ကြုံဖူးကြမယ်။ တချို့တွေ အင်္ဂလိပ်စာ အတော်အားနည်းတယ်။ ပြောတာတွေ လွဲလွန်းလို့ သူငယ်ချင်းတွေကအစ လှောင်ပြောင်ခဲ့ကြတယ်။ ဒါပေမဲ့ ဇွဲမလျှော့ဘူး။ ဆက်ကြိုးစားတယ်။ နောက်တော့ နိုင်ငံခြားတက္ကသိုလ်မှာ စကောလားရှစ် ရသည်အထိ ဖြစ်လာတာမျိုး။

လွတ်လပ်ရေးခေါင်းဆောင် ဗိုလ်ချုပ်အောင်ဆန်းဆိုလည်း Gritty သိပ်ဖြစ်တယ်ဆိုတာ သူ့အကြောင်းတွေ ဖတ်ဖူးရင်၊ ကြားဖူးရင် သိလိမ့်မယ်။

ဘောလုံးသမားတွေထဲမှာလည်း ဒီလိုပဲ။ ပင်ကိုယ်ပါရမီအရ တော်တယ်။ ဒါပေမဲ့ မကြိုးစားဘူး။ ကိုယ့်ကိုယ်ကိုယ် မထိန်းသိမ်းဘူး။ အဲဒီတော့ ပေါက်မြောက်သင့်သလောက် မပေါက်မြောက်ဘူး။

စီရော်နယ်ဒိုလို ကစားသမားမျိုးကျ Grit အတွက် အကောင်းဆုံးဥပမာပဲ။ ကောင်းသထက် ကောင်းအောင် ကြိုးစားအားထုတ်တယ်။ လေ့ကျင့်ရေးကွင်းကို အရင်ဆုံးလာပြီး နောက်ဆုံးမှ ပြန်တယ်။ ဝေဖန်မှုတွေ အပြင်းအထန် ခံရတဲ့ အခြေအနေကနေလည်း အကောင်းဆုံး ပြန်လာနိုင်တယ်။

ဒီဥပမာတွေကို ကြည့်ရင် Grit ရဲ့ တန်ဖိုးကို နားလည်နိုင်လာပါလိမ့်မယ်။

◾️ဘဝကို မြင့်မားအောင် ကြိုးစားတဲ့အခါ၊ လောကဓံနဲ့ ရင်ဆိုင်ရတဲ့အခါ၊ ရှုံးနိမ့်မှုတွေနဲ့ ကြုံရတဲ့အခါ ဒီအရည်အသွေး အရေးကြီးသလို၊ နိုင်ငံရေးစနစ်တစ်ခုကို ပြောင်းလဲဖို့ ကြိုးစားရာမှာလည်း ဒီအချက်က သိပ်အရေးကြီးတယ်။

အသေးစိတ်ခွဲပြောပါဆို ၅ ချက် ထွက်လာတယ်။

• Passion (ပြင်းပြတဲ့ စိတ်ဆန္ဒ)
• Perseverance (ဇွဲလုံ့လ)
• Patience (စိတ်ရှည်သည်းခံမှု)
• Positive attitude (အကောင်းမြင်စိတ်)
• Purpose (ရည်ရွယ်ချက်) တို့ ဖြစ်ပါတယ်။

📌 ၁။ ပြင်းပြတဲ့ စိတ်ဆန္ဒ

ဘာကို ဝါသနာပါသလဲ။ ဘာကိုလုပ်နေရင် ထမင်းမေ့ဟင်းမေ့ ဖြစ်နေသလဲ။ စာရေးရတာလား။ ဆေးကုရတာလား။ ပန်းချီဆွဲရတာလား။ သီချင်းဆိုရတာလား။ အမျိုးမျိုးတော့ ဖြစ်နိုင်တယ်။ သွားလည်းဒီစိတ်၊ စားလည်းဒီစိတ် ဖြစ်နေတာမျိုးပေါ့။

📌 ၂။ ဇွဲလုံ့လ

အခက်အခဲတွေ့လည်း လက်မလျှော့သွားတာ၊ နောက်တွန့်မသွားတာ၊ ရှုံးနိမ့်မှုနဲ့ ကြုံလည်း ရပ်တန့်မသွားတာ၊ မဖြစ်ဖြစ်အောင် လုပ်တာ၊ တစိုက်မတ်မတ် လုပ်တာ၊ ဒီလိုအရည်အသွေးတွေ ဖြစ်ပါတယ်။

📌 ၃။ စိတ်ရှည်သည်းခံမှု

လွယ်ကူတဲ့ အရာတိုင်းဟာ တန်ဖိုးမရှိသလို၊ တန်ဖိုးကြီးတဲ့ အရာတိုင်းက မလွယ်ကူပါဘူး။ မမြန်ဆန်ပါဘူး။ အသင့်ဖျော်ကော်ဖီတွေဟာ အချိန်ကုန် သက်သာတာတော့ မှန်ပေမဲ့ ကျန်းမာရေးအတွက်တော့ မကောင်းဘူး။ ခုတွေ့ ခုကြိုက် ဆက်ဆံရေးထက် နှစ်ပေါင်းများစွာ အပြန်အလှန် နားလည်မှုတွေနဲ့ တည်ဆောက်ထားတဲ့ ဆက်ဆံရေးက ပိုတည်မြဲပါတယ်။

ခုလုပ် ခုရလဒ်ထွက်တာ လိုချင်တော့ အဲဒီအတိုင်း ဖြစ်မလာတဲ့အခါ စိတ်ပျက်လာတယ်။ လက်လျှော့လိုက်တယ်။ ဒါကြောင့် စိတ်ရှည်သည်းခံမှုဟာ သိပ်အရေးကြီးတယ်။ အဝိုင်းလည်နေရင်တောင် စိတ်မရှည်ကြတော့တဲ့ ခေတ်မှာ ဒီအချက်ကလည်း အတော်လေး အရေးပါလာတယ်။

📌 ၄။ အကောင်းမြင်စိတ်

ဖြစ်သမျှအကြောင်း အကောင်းချည်းပဲဆိုပြီး လက်လျှော့နေဖို့ မဟုတ်ဘူး။ တစ်နေ့တော့ ကံကောင်းလာမှာပါ ဆိုပြီး ကယ်တင်ရှင် မျှော်နေဖို့လည်း မဟုတ်ဘူး။ အကောင်းမြင်စိတ်ရဲ့ အဓိပ္ပါယ်က “ဘယ်လောက်ပဲ ဆိုးရွားတဲ့ အခြေအနေတွေ ဖြစ်နေပါစေ၊ ဒါကို လွန်မြောက်ဖို့ ငါလုပ်နိုင်တယ်၊ ကြိုးစားနိုင်တယ် ဆိုပြီး မျှော်လင့်ချက်ထားတာမျိုး” ဖြစ်ပါတယ်။

ပြီးခဲ့တာတွေအတွက် အပြစ်တင်မနေဘူး။ ဒါတွေ မဖြစ်ခဲ့ရင်ကောင်းမှာ ဆိုပြီးလည်း အခြေအနေမှန်ကို ငြင်းဆန်မနေဘူး။ လက်ရှိမှာ ဒီလိုတော့ ဖြစ်သွားတယ်။ လက်ခံလိုက်တယ်။ ဘယ်လိုအကောင်းဆုံးဖြစ်အောင် ရှေ့ဆက်မလဲ စဉ်းစားတယ်။ အကောင်အထည်ဖော်တယ်။

ဒါမျိုး စိတ်နေစိတ်ထားဟာ ဘဝမှာ တည်ဆောက်ထားသမျှ အရာရာ ပြိုပျက်သွားတဲ့ အခြေအနေတွေအတွက် မဖြစ်မနေ လိုအပ်ပါတယ်။

📌 ၅။ ရည်ရွယ်ချက်

ဘယ်အသက်အရွယ်မှာ ဘာဖြစ်နေရမယ် ဆိုတာမျိုး မဟုတ်ဘူး။ အများအတွက် တစ်ခုခုလုပ်ပေးလိုစိတ် ဖြစ်တယ်လို့ Grit စာအုပ်ကို ရေးသားသူ စိတ်ပညာ ပါမောက္ခ Angela Duckworth က အဓိပ္ပါယ်ဖွင့်ထားပါတယ်။

ဥပမာ ကိုယ်က စာသင်တဲ့သူဆို ပိုက်ဆံရဖို့သက်သက် စာသင်နေတာ မဟုတ်ဘူး။ ပိုလှပတဲ့ လူ့အဖွဲ့အစည်းတစ်ခု ပေါ်လာဖို့ ပညာရေးနဲ့ တည်ဆောက်နေတာလို့ ခံယူထားတာမျိုးပေါ့။

ဒီလို ကိုယ့်အလုပ်ရဲ့ တန်ဖိုးကို သေချာသိထားတဲ့သူဟာ ဘဝမှာ ရှင်သန်နေထိုင်ရတာ အဓိပ္ပါယ်ရှိသလို ခံစားရတယ်။ အဲဒီ Sense of purpose ဟာလည်း ခက်ခဲတဲ့ အခိုက်အတံ့တွေကို ကျော်ဖြတ်ရာမှာ အများကြီး အထောက်အကူ ပေးပါတယ်။

◾️လူတစ်ယောက်ဟာ -

• ဘာကိုမှ ပြင်းပြင်းပြပြ လုပ်ချင်တယ်ဆိုတာမျိုး မရှိတဲ့အခါ
• နည်းနည်းကလေး အဆင်မပြေလိုက်တာနဲ့၊ ထစ်ငေါ့လိုက်တာနဲ့ လက်လျှော့တတ်တဲ့အခါ
• ရလဒ်တစ်ခု မြင်ရဖို့ အချိန်ပေးလိုစိတ် မရှိတဲ့အခါ
• ကြုံရသမျှ အခက်အခဲတွေကို ငါတော့ဖြင့် ကျော်ဖြတ်နိုင်လောက်မှာ မဟုတ်ဘူးလို့ တွေးနေတဲ့အခါ
• သူ ဘာအတွက် ရှင်သန်နေတာလဲ မသိတော့တဲ့အခါ အကြီးအကျယ် စိတ်ဒုက္ခ ရောက်ရတတ်ပါတယ်။ လမ်းပျောက်နေတတ်ပါတယ်။ ဘဝတစ်ခုလုံး ပြိုပျက်သွားသလို ခံစားရတတ်ပါတယ်။

◾️အခု မြန်မာပြည်သူတွေကို ကြည့်ပါ။

• ဖက်ဒရယ် ဒီမိုကရေစီရဖို့ဆိုတဲ့ ပန်းတိုင်ကို မမှိတ်မသုန် ချီတက်နေတယ်။
• အထစ်အငေါ့တွေ၊ စိတ်ပျက်စရာတွေ ကြုံရလည်း နောက်မဆုတ်ဘူး။ လက်မလျှော့ဘူး။
• ချက်ချင်းလက်ငင်းတော့ မအောင်မြင်နိုင်ဘူး ဆိုတာ သိတယ်။ အချိန်ပေးတယ်။ သည်းခံစောင့်ဆိုင်းတယ်။
• ရှုံးနိမ့်မှုတွေ၊ ထိခိုက်မှုတွေကြုံလည်း စိတ်မပျက်ဘူး။ အမှားတွေကနေ သင်ခန်းစာယူတယ်။ ပိုကောင်းအောင် ကြိုးစားတယ်။ ထပ်မမှားအောင် ဂရုစိုက်တယ်။
• ဒီလိုမျိုးကိစ္စတွေ ငါတို့မျိုးဆက်မှာ နောက်ဆုံးဖြစ်ရမယ် ဆိုတဲ့စိတ်နဲ့ အနာဂတ်ကောင်းတွေ ချန်ထားနိုင်အောင် ကြိုးစားနေကြတယ်။

ဒါ IQ ကြောင့် ဖြစ်လာတာတွေ မဟုတ်ဘူး။ နိုင်ငံတကာကနေ ဘွဲ့တွေ ရထားလို့လည်း မဟုတ်ဘူး။ ပြည်သူအများရဲ့ “အလွယ်တကူ လက်မလျှော့တတ်တဲ့စိတ်” (Grit) ကြောင့် ဖြစ်လာတာပါ။

တစ်ဦးချင်းစီအနေနဲ့လည်း စဉ်းစားကြည့်လို့ ရပါတယ်။ ဒီ P ၅ လုံး အားကောင်းတဲ့သူတွေဟာ ဘယ်လိုအခြေအနေမှာဖြစ်ဖြစ် ရှင်သန်နိုင်ကြတာ၊ မြင့်မြင့်မားမား အနေအထားထိ ရောက်ကြတာကို တွေ့ရပါလိမ့်မယ်။

◾️ဘဝဆိုတာ ထင်မှတ်မထားတဲ့ အခက်အခဲတွေနဲ့ ပြည့်နှက်နေတာပါ။ အဲဒါကို ကျော်လွှားဖို့ ဉာဏ်ရည်ဉာဏ်သွေး တစ်ခုတည်းနဲ့ မလုံလောက်ပါဘူး။ စိတ်ပိုင်းဆိုင်ရာ ကြံ့ခိုင်သန်မာမှုကလည်း မဖြစ်မနေ လိုအပ်ပါတယ်။

ဒေါက်တာ ဖြိုးသီဟ
၁၈.၇.၂၀၂၃

Photo credit - Pixabay

“ဖွား၊ ပွင့်၊ ဟော၊ စံ၊ ဗျာဒိတ်ခံ၊ ၅ တန်ကဆုန်လပြည့်”

ယနေ့ဟာ ဗုဒ္ဓဘာသာဝင်တို့ အထွဋ်အမြတ်ထားရာ မြတ်စွာဘုရားရှင်၏
(၁) ဖွားမြင်‌တော်မူခဲ့သော၊
(၂) ဗျာဒိတ်ခံယူတော်မူခဲ့သော၊
(၃) ဘုရားအဖြစ်ရောက်တော်မူခဲ့သော၊
(၄) ဗုဒ္ဓဝင်အကျဥ်းအား ဟောကြားတော်မူခဲ့သော၊
(၅) ပရိနိဗ္ဗာန်စံတော်မူခဲ့သော နေ့ထူးနေ့မြတ် ကဆုန်လပြည့်(ဗုဒ္ဓနေ့)ပဲ ဖြစ်ပါတယ်။

ဤရက်မြတ်တွင် ဗောဓိပင်ဌာန၌ သဗ္ဗညုတဉာဏ်တော်ကိုရရှိပြီး ဘုရားရှင်အဖြစ်သို့ရောက်တော်မူခဲ့သည်ကို အာရုံပြု၍ ဗုဒ္ဓဘာသာဝင်တို့ဟာ ပရိဘောဂစေတီထိုက်သော ဗောဓိပင်ကို ရေသွန်းလောင်းသပ္ပာယ်ပူဇော်ကြပါတယ်။

ဒီလို ထူးခြားမြင့်မြတ်မှုအပေါင်းနှင့်ပြည့်စုံတဲ့ ကဆုန်လပြည့်(ဗုဒ္ဓနေ့) အခါသမယမှာ စိတ်၏ချမ်းသာခြင်း၊ ကိုယ်၏ကျန်းမာခြင်းတို့နှင့်ပြည့်စုံပြီး ကောင်းမှုကုသိုလ်တရားများတိုးပွားနိုင်ကြပါစေကြောင်း AIA-Grit Financial Advisory မိသားစုမှ ဆုတောင်းမေတ္တာပို့သလိုက်ရပါတယ်။

💪🏽💪🏿 ဒီနေ့ဟာ အပြည်ပြည်ဆိုင်ရာ အလုပ်သမားများနေ့ပဲဖြစ်ပါတယ်။ မြေရှင်ပဒေသရာဇ်ခေတ်မှအစပြု၍ သမိုင်းတစ်လျှောက် ဖိနှိပ်မှုများကို တွန်းလှန်ရင်း အလုပ်သမားထုအခွင့်အရေးများအတွက် တိုက်ပွဲဝင်ခဲ့ကြသော အလုပ်သမားအပေါင်းတို့ကို ချီးကျူးဂုဏ်ပြုလိုက်ရပါတယ်။ 💪🏽💪🏿

ကျွန်ုပ်တို့ GRIT ဟာ လူ့အဖွဲ့အစည်းရဲ့ မောင်းနှင်အားဖြစ်တဲ့ အလုပ်သမားတို့ကို ထောက်ခံအားပေးခြင်းနှင့် အကာအကွယ်ပေးခြင်းများ ဆောင်ရွက်ပေးနိုင်ဖို့ အစဥ်အမြဲကြိုးစားလျက်ရှိပါတယ်။ မမျှော်လင့်သော ဘေးအန္တရာယ်ဖြစ်ရပ်များကြောင့် ငွေကြေးအခက်အခဲဖြစ်ပေါ်မှုမှ အလုပ်သမားများနှင့် ၎င်းတို့၏မိသားစုများကိုပါ အကာအကွယ်ရရှိစေနိုင်ရန် ကျွန်ုပ်တို့ရဲ့ အာမခံပေါ်လစီများက တာဝန်ယူပေးနိုင်မှာ ဖြစ်ပါတယ်။ လုပ်ငန်းခွင်အတွင်းဖြစ်ပေါ်တတ်သော ထိခိုက်မှုအမျိုးမျိုးအတွက်အာမခံ၊ တစ်ဦးချင်းသာမက အစုအဖွဲ့လိုက်အသက်အာမခံ (Group Life Insurance)၊ ကျန်းမာရေးအာမခံ(Group Health Insurance) နှင့် ငွေပုံငွေရင်းအာမခံ (Short Term Endowment Insurance) အစရှိသည်တို့ဟာ ဖြစ်ရပ်တိုင်းအတွက် ငွေကြေးကုန်ကျစရိတ်ကို အကာအကွယ်ပေးရုံသာမက လုပ်ငန်းရှင်တွေအတွက်လည်း တန်ဖိုးရှိတဲ့ဝန်ထမ််းများ မဆုံးရှုံးရနေအောင် ကူညီပေးနိုင်မှာပါ ဖြစ်ပါတယ်။

GRIT အနေနဲ့ အလုပ်ခွင်တန်းတူညီမျှမှု၊ တရားမျှတမှုနှင့် အခွင့်အ‌ရေးများ ကာကွယ်ထိန်းသိမ်းနိုင်ဖို့ ဆောင်ရွက်နေကြတဲ့ အလုပ်သမားတို့နှင့် ရပ်တည်ပြီး အလုပ်သမားတို့အ‌ပေါ် ပြည့်ဝသော အကာအကွယ်များပေးနိုင်ဖို့ ဆက်လက်ကြိုးပမ်းသွားမှာ ဖြစ်ပါတယ်။