Streaming by 1sec9K

ကိုယ့်ကို မလိုဘူးဆိုတဲ့အရပ်မှာ လူပိုလို ရပ်နေခဲ့ဖူးတယ် ။

အဆင်ပြေပါတယ်... မင်းအနားမှာ ရှိနေချင်ရုံလေးပဲလေ ။ မင်းအနားမှာ ရှိနေရမယ်ဆိုရင် ဘယ်လိုအခြေအနေမျိုးမဆို လက်သင့်ခံလိုက်ဖို့အသင့်ပဲမို့လို့ ပိုနေတဲ့နေရာလေးမှာ မလိုသလိုလေး ရပ်နေရတာလဲ အဆင်တော့ ပြေပါတယ် ။ ရင်ထဲ နည်းနည်းလေးအောင်ရတာကလွဲရင် မျက်ရည်လေး နည်းနည်း ကျနေတာကလွဲရင် ငါ မင်းဘေးနားရှိနေခွင့်တွေ ရနေသေးတာပဲဆိုတဲ့ စိတ်နဲ့ပဲ ဖြေနေခဲ့တာပါ ။

မေးခွန်းတွေ အများကြီးမေးတတ်တဲ့ လူတစ်ယောက်က ဘာကြောင့် တိတ်ဆိတ်သွားသလဲဆိုတာကော သိရဲ့လား ... မဖြေချင်တဲ့ မေးခွန်းတွေ မေးပါများရင် စိတ်ပျက်သွားမှာစိုးလို့ ပြောလာတဲ့ စကားလောက်ကိုပဲ နားထောင်နေမိတာပါ ။ ကျွန်တော့ကို မလွမ်းဘူးလားဟင် ... ကျွန်တော့ကို မချစ်ဘူးလားဟင်ဆိုပြီး တစ်ခါလောက် မေးချင်ခဲ့ဖူးပေမယ့် အလကားသက်သက် စိတ်ရှုပ်စရာတွေဖြစ်မှာစိုးလို့ နှုတ်ဆိတ်ပေးနေခဲ့တာ ။

လမ်းခွဲရအောင်တဲ့ ... ချစ်ခြင်းမေတ္တာက လူနှစ်ယောက်နဲ့ သက်ဆိုင်ခဲ့တဲ့ အရာမဟုတ်ဘူးလား ။ မင်းကို ချစ်တယ် ပြီးတော့ မင်းကို မချစ်တော့လို့ဆိုပြီး ချန်ထားခဲ့လို့ရတယ်ပေါ့ ဟုတ်လား ... ကျွန်တော့ရဲ့ ခံစားချက်တွေကို နည်းနည်းလေး ထည့်တွက်လို့ မရဘူးလားဟင် ... ငိုနေမိတဲ့ မျက်ရည်တွေကို နည်းနည်းလေး စာနာပေးကြည့်လို့မရဘူးလား ။ မင်းမရှိရင် မဖြစ်လို့ပါဆိုပြီး တောင်းပန်နေတဲ့ ကျွန်တော့်ကိုကော နည်းနည်းလေး သနားပေးလို့မရဘူးလား ...

ကျွန်တော် ခင်ဗျားမရှိရင် မဖြစ်ဘူးလေနော် ... ကျွန်တော့်ကို မလိုအပ်တော့ဘူးဆိုတာကို ခဏခဏ စကားတွေထွက်ပြီး ပြောပြနေဖို့ မလိုတော့ပါဘူး ... ကျွန်တော်က မလိုမှန်းသိသိရဲ့နဲ့ မင်းမရှိပဲမနေနိုင်လို့ ရပ်နေမိရုံပါ ။ နာကျင်ရတာတွေကို ပြန်ရေတွက်မယ်ဆိုရင် နာဖို့သင့်ပြီဆိုပြီး ဦးဏှောက်က သိပေမယ့် တကယ့်လက်တွေ့တွေမှာကျ နှလုံးသားက လက်သင့်မခံနိုင်သေးဘူး ။ နှလုံးသားက သိပ်ခေါင်းမာတာ ခင်ဗျားမှ မဟုတ်ရင် ဘယ်သူ့ကိုမှ လူလို့တောင်ထင်တာမဟုတ်ဘူးလေ။

သိပ်မာနကြီးပါတယ်ဆိုတဲ့ လူက ... ကျွန်တော့်မာနတွေကို ဖိနပ်လုပ်စီးဖို့ ​ဒူးထောက်နေမိတာ ။ သိပ်ကို စကားနည်းပါတယ်ဆိုတဲ့လူက ကျွန်တော့်ကို ထားမသွားဖို့ ကျေးဇူးပြုပြီးတော့ဆိုတဲ့ စကားကိုသုံးပြီး ကျွန်တော့်ကို ထားမသွားဖို့ အကြိမ်ကြိမ် တောင်းပန်နေခဲ့ပြီလေ ။ ကျေးဇူးပြုပြီးတော့ ... ကျွန်တော့်ကို မချစ်ဘူးဆိုလဲ ရတယ်လေ ကျွန်တော် ခင်ဗျားကို အရမ်းချစ်နေမိလို့ မချစ်ပါနဲ့ဆိုပြီးတော့ ခဏခဏ မတားမြစ်ပါနဲ့လား။ ပြီးတော့ ကျွန်တော့ကို မလိုအပ်ဘူးဆိုတဲ့ အမှန်တရားကိုလဲ သိတယ်လေ ဒါပေမယ့် ခင်ဗျားမရှိပဲ မနေနိုင်လို့ ဒီအတိုင်းလေး ရှိနေခွင့်လေးပဲ ပေးပါလား ။

စကားတွေ အများကြီး မပြောဘူးလေ ... ဟိုဟာမကြိုက်ဘူး ဒီဟာမကြိုက်ဘူး မကန့်သတ်မချုပ်ခြယ်ဘူးလေ ။ ခင်ဗျားက လွတ်လွတ်လပ်လပ်လေး ပျံသန်းပါ ကျွန်တော်က ဒီလှောင်ချိုင့်လေးထဲကနေ ခင်ဗျားကို ငေးကြည့်ခွင့်လေးပဲ ရှိရုံနဲ့တင်ပျော်တယ်လေ ။ ကျွန်တော်နဲ့ အဝေးကြီး ပြေးမသွားရင်ဖြစ်ပြီလေနော် ...

လူပိုတဲ့ ... တကယ်တမ်းကျတော့ မလိုအပ်တော့ဘူးဆိုတာမှန်းသိသိရဲ့နဲ့တောင် သူမရှိပဲ မနေချင်တဲ့ စိတ်တွေကြောင့် ကိုယ့်ကိုယ် မလိုတဲ့တဲ့အရပ်မှာ နှစ်တွေအကြာကြီး ရပ်နေမိတာပါ ... ရင်တွေလဲနာရပါတယ် မျက်ရည်တွေလဲကျရပါတယ် ။

#ကျေးကို

(ရင်နှင့်ရင်း၍ရေးသည်)