Big Bite

ကလေးတွေရဲ့ အမူအကျင့်ကောင်းတွေ၊ ကျင့်ဝတ်ကောင်းတွေဟာ လူကြီးမိဘက သေချာသင်ကြားဆုံးမထားတယ်ဆိုတဲ့ လက္ခဏာပါပဲ။ အမူအကျင့်ကောင်းတွေရှိပြီး ကျင့်ဝတ်သိတဲ့လူသားလေးတွေဟာ ဘဝမှာ ပိုပြီးအောင်မြင်ကြပါတယ်။

✔️ ကိုယ့်ကိုယ်ကိုယ် ယုံကြည်၊ တန်ဖိုးထားတတ်တဲ့ ကလေးများ ဖြစ်စေပါတယ်။

✔️ လူချစ်လူခင်များစေပါတယ်။

✔️ ကျောင်းမှာပဲဖြစ်ဖြစ်၊ အလုပ်ထဲမှာပဲဖြစ်ဖြစ် ပိုပြီး အဆင်ပြေ အောင်မြင်ကြပါတယ်။

✔️ ပျော်ရွှင်တဲ့ဘဝ ရစေပါတယ်။

ကလေးတွေကို အမူအကျင့်ကောင်းတွေ၊ ကျင့်ဝတ်ကောင်းတွေ သင်ပေးဖို့ရာ ဘယ်တော့မှ နောက်မကျပါဘူး။ ငယ်စဉ်မှာ သင်ကြားမယ်ဆိုရင်တော့ ပိုပြီးသင်ရလွယ်ပါတယ်။ ကလေးငယ်လေးတွေဟာ သင်ယူလက်ခံမှုအား ပိုကောင်းပါတယ်။

ကလေးတွေရဲ့ အမူအကျင့်ကောင်းလို့ပြောတဲ့အခါမှာ မိဘက တစ်ခွန်းဆို တစ်ခွန်းပြီးတာမျိုး၊ ကိုယ့်ဆန္ဒကို မထုတ်ဖော်ရဲဘဲ မိဘစကား တသွေမတိမ်းနားထောင်တာမျိုး၊ ကလေးသဘာဝ မကစားဘဲ မစူးစမ်းဘဲ မရှုပ်ပွဘဲ ငြိမ်ငြိမ်လေးနေနေတာမျိုးကို မဆိုလိုပါဘူး။ ဘယ်လိုအမူအကျင့်ကောင်းတွေလဲဆိုတာ ဆက်ဖတ်ပေးပါရှင်။

1) ကျေးဇူးတင်ကြောင်း ပြောတတ်ပါစေ။

ကျေးဇူးတင်ကြောင်း ပြောတတ်ခြင်းဟာ အခြေခံလူ့ကျင့်ဝတ်တစ်ခုပါပဲ။ ကျမတို့ကတော့ ကိုယ်တိုင်က မကြာခဏ ပြောဖြစ်တာမို့ တကူးတက သင်စရာမလိုဘဲ ကလေးကလည်း လိုက်ပြောပါတယ်။ သူ့ရေဘူးလေး ရေဖြည့်ပေးတာကအစ "Thank you မေမေ" လို့ ပြောတာမျိုးပါ။ မိသားစုဝင်အချင်းချင်းလည်းပြော၊ အပြင်လူနဲ့လည်း ပြောတတ်တဲ့အကျင့်လေး ရှိအောင် သင်ထားပါ။ ကိုယ်တိုင်လည်း ပြုမူပါ။ တစ်ခုခုတောင်းချိန်မှာ "Please" နဲ့စပြီး တစ်ခုခုလက်ခံရရှိတဲ့အချိန်မှာ "Thank you" ပြောတာဟာ ယဉ်ကျေးတဲ့အပြုအမူပါ။

2) သူတပါးပစ္စည်းတစ်ခုခု မယူခင်၊ မကိုင်ခင်မှာ ခွင့်တောင်းတတ်ပါစေ။

မိဘပစ္စည်းပဲဖြစ်ဖြစ်၊ မောင်နှမပစ္စည်းပဲဖြစ်ဖြစ်၊ အခြားသူရဲ့ပစ္စည်းပဲဖြစ်ဖြစ် မယူခင်၊ မကိုင်ခင်မှာ ခွင့်တောင်းတတ်ဖို့၊ ကိုယ်ယူထားစဉ်မှာ သေချာကိုင်တွယ်ဖို့၊ သေချာပြန်ပေးတတ်ဖို့၊ ပြန်ပေးတဲ့အခါ ကျေးဇူးတင်စကားပြောတတ်ဖို့ သင်ထားရပါမယ်။

3) တောင်းပန်တတ်ပါစေ။

အမှားတစ်ခုခုလုပ်ရင် တောင်းပန်တတ်ဖို့ဟာလည်း အင်မတန်အရေးကြီးပါတယ်။ တောင်းပန်ခြင်းဟာ သတ္တိရှိတဲ့သူ၊ ကိုယ့်အမှားကိုယ် ဝန်ခံရဲတဲ့သူတွေမှ လုပ်နိုင်တာပါ။ ကျမတို့ ပတ်ဝန်းကျင်မှာ "Sorry" မပြောနိုင်လို့ အမှားတွေထပ်ခါထပ်ခါ လုပ်မိတဲ့လူကြီးတွေ တွေ့ဖူးကြတယ် မဟုတ်လား။ ကလေးအပေါ် အမှားလုပ်မိရင်လည်း ကိုယ့်အမှားကို တာဝန်ယူ တောင်းပန်ပါ။

4) အခန်းထဲမဝင်ခင် တံခါးခေါက်ခိုင်းပါ။

သူတပါးရဲ့အခန်းထဲမဝင်ခင် တံခါးခေါက်ရတယ်၊ ခွင့်တောင်းရတယ်ဆိုတာ သင်ထားပါ။ ငယ်စဉ်မှာ သင်ထားတဲ့အရာအားလုံးဟာ သူတို့အသက်ကြီးတဲ့အထိ ပါသွားမှာပါ။ လူကြီးမိဘများ ကိုယ်တိုင်ကလည်း ကိုယ်သင်တဲ့အတိုင်း ပြုမူပါ။

5) နှာချေ၊ ချောင်းဆိုးတဲ့အခါ ပါးစပ်ကို လက် (သို့မဟုတ်) ပုဝါနဲ့ ကာခိုင်းပါ။

နှာချေ၊ ချောင်းဆိုးတဲ့အခါ ပါးစပ်ကို ကာတတ်ဖို့ သင်ထားပါ။ လူကြားသူကြားထဲမှာ နှာခေါင်းနှိုက်ခြင်းကလည်း မသင့်တော်ဘူး၊ ရိုင်းတယ်ဆိုတာလည်း သင်ထားပါ။ ဒါဟာ အမူအကျင့်ကောင်းဖြစ်ရုံသာမက ကျန်းမာရေးအတွက်လည်း အရေးကြီးပါတယ်။

6) စကားပြောတဲ့အခါ အတင်းဖြတ်မပြောဖို့ သင်ထားပါ။ ပြောချင်တဲ့အခါ ကိုယ့်အလှည့်တောင်းတတ်ဖို့ သင်ပေးထားပါ။

ကလေးတွေဟာ စိတ်မရှည်တတ်ပါဘူး။ ဒါပေမဲ့ သူတပါးကို စကားပြောခွင့်မပေးဘဲ သူချည်းပြောနေတာဟာ မယဉ်ကျေးကြောင်း၊ သူတပါးစကားပြောနေချိန် အတင်းဖြတ်ပြောခြင်းဟာ မယဉ်ကျေးကြောင်း သင်ထားပေးပါ။ မူကြိုမှာပဲဖြစ်ဖြစ်၊ ကျောင်းမှာပဲဖြစ်ဖြစ် ကိုယ်ပြောချင်တာ တစ်ခုခုရှိရင် အရင်ခွင့်တောင်းဖို့ သင်ထားပါ။ "Excuse me" (သို့မဟုတ်) "သား/သမီး ပြောစရာရှိပါတယ်" ဆိုပြီး ပြောတတ်စေပါ။ ကလေးတွေပြောတဲ့စကားကိုလည်း အလေးထားပြီး နားထောင်ပေးပါ။

7) သူတပါးကို မလှောင်တတ်စေဖို့ သင်ထားပါ။

သူတပါးကို မလှောင်တတ်ဖို့၊ မပြောင်တတ်ဖို့ သင်ထားပါ။ လှောင်ခြင်း၊ ပြောင်ခြင်းဟာ ယဉ်ကျေးတဲ့အပြုအမူ မဟုတ်ပါဘူး။ ကိုယ့်ရဲ့နောက်ပြောင်ခြင်းဟာ သူတပါးရဲ့စိတ်ခံစားချက်ကို ထိခိုက်စေရင် ဒါဟာ အင်မတန်ရိုင်းတဲ့ အပြုအမူဖြစ်တယ်ဆိုတာ သင်ထားပါ။ လူကြီးမိဘကိုယ်တိုင်လည်း မလုပ်ပါနဲ့။ သူတပါးရဲ့ ပိန်ခြင်း၊ ဝခြင်း၊ အသားအရောင်၊ မသန်စွမ်းမှုတွေဟာလည်း လှောင်စရာ ပြောင်စရာမဟုတ်ဘူးဆိုတာ သင်ထားပါ။

8 ) လူကြီးသူမတွေကို လေးစားသမှုနဲ့ ဆက်ဆံတတ်ပါစေ။

မိဘ၊ ဘိုးဘွား၊ ဆရာသမားတွေအပါအဝင် လူကြီးသူမတွေကို ယဉ်ကျေးစွာ ပြုမူဆက်ဆံတတ်ဖို့ သင်ထားပါ။ မိဘကိုယ်တိုင်ကလည်း လူကြီးသူမတွေကို လေးစားသမှု ရှိပါ။ ဘတ်စ်ကားပေါ်၊ ရထားပေါ်မှာ သက်ကြီးရွယ်အိုတွေတွေ့ရင်၊ ကိုယ်ဝန်ဆောင်သည်တွေတွေ့ရင်၊ ကလေးချီထားတဲ့သူတွေတွေ့ရင်၊ မသန်စွမ်းတွေကိုတွေ့ရင် နေရာဖယ်ပေးခြင်းမျိုးနဲ့ ကလေးရှေ့မှာ ပုံသက်သေကောင်း ဖြစ်စေပါ။

9) မသန်စွမ်းသူများကို ညှာတာတတ်ဖို့ သင်ထားပါ။

ကလေးတွေဟာ စူးစမ်းပါတယ်။ မသန်စွမ်းသူတွေတွေ့ရင် သူတို့အတွက်ထူးဆန်းပြီး လက်ညိုးတထိုးထိုးနဲ့ မေးတတ်ပါတယ်။ စိုက်လည်း ကြည့်နေတတ်ပါတယ်။ "သူကဘာလို့ အဲ့လိုဖြစ်နေတာလဲ" ဆိုပြီးလည်း အကျယ်ကြီးမေးတတ်ပါတယ်။ တစ်ခါတရံမှာ ကြောက်တဲ့အမူအရာတွေ ပြတတ်ပါတယ်။ လောကမှာ အကြောင်းအမျိုးမျိုးကြောင့် မသန်စွမ်းသူများရှိကြောင်း၊ သူတို့ဟာ အခြားသာမန်လူတွေလိုပဲ ဖြစ်ကြောင်း၊ အပေါ်မှာပြောခဲ့တဲ့ အပြုအမူတွေဟာ သူတို့ကို စိတ်မကောင်းဖြစ်စေတတ်ကြောင်း ရှင်းပြပါ။

10) ဧည့်သည်ကောင်းဖြစ်ဖို့ သင်ကြားပါ။

သူများအိမ်သွားလည်တဲ့အခါ ယဉ်ကျေးလိမ္မာဖို့ သင်ထားပါ။ သူများပစ္စည်းတွေ ခွင့်မပေးဘဲ မကိုင်ဖို့၊ ကျွေးတဲ့အစားအစာကို ချေး (ဂျီး) မများဖို့၊ မကြိုက်ရင်လည်း ယဉ်ယဉ်ကျေးကျေး ပြောတတ်ဖို့ သင်ထားပါ။ သူတပါးအိမ် သူတပါးနေရာကို သွားလည်တဲ့အခါ အိမ်ရှင်ကို ယဉ်ကျေးစွာ နှုတ်ဆက်တတ်ဖို့လည်း သင်ထားပါ။

11) သူတပါးကို ကရုဏာထားတတ်ဖို့၊ ကူညီတတ်ဖို့ သင်ထားပါ။

သူတပါးကို ကရုဏာထားတတ်၊ ကူညီတတ်တဲ့အခါ သူတို့ကိုယ်တိုင်လည်း "ငါ သူ့ကိုကူညီလိုက်ရပါလား" ဆိုတဲ့ စိတ်ခံစားချက်ကောင်းလေး ရစေသလို၊ လူအများကလည်း ချစ်ခင်ကြပါတယ်။

12) သူတို့အမှိုက်တွေ သူတို့ကိုယ်တိုင် ပြန်ရှင်းတတ်ပါစေ။

ကလေးတွေဟာ စားတဲ့အခါ၊ ကစားတဲ့အခါ ရှုပ်ပွနေတတ်ပါတယ်။ အရုပ်တွေ ပြန်သိမ်းတတ်ဖို့၊ ယူကစားထားတဲ့ပစ္စည်းတွေ ပြန်ထားတတ်ဖို့၊ အိမ်သန့်ရှင်းရေးနဲ့ အခြားအိမ်အလုပ်တွေ ကူတတ်စေဖို့ သင်ထားပေးပါ။

13) မလိမ်ညာတတ်ဖို့ သင်ထားပါ။

ရိုးသားတတ်ဖို့၊ မလိမ်ညာတတ်ဖို့ သင်ထားပါ။ သူတို့ပြောထားတဲ့စကားကိုလည်း တည်စေပါ။ ရိုးသားခြင်းဟာ အင်မတန်အရေးကြီးကြောင်း ပြောပြထားပါ။
ကလေးများ မလိမ်ညာတတ်ဖို့ - https://www.facebook.com/100044379851112/posts/481138130042178/

14) စကားပြောတဲ့အခါ မျက်လုံးချင်းဆုံကြည့်တတ်ဖို့ သင်ထားပါ။

စကားပြောတဲ့အခါ မျက်လုံးချင်းဆုံကြည့်တတ်ခြင်းဟာလည်း ယဉ်ကျေးမှုတစ်ခုပါပဲ။ Eye-contact က အရေးကြီးပါတယ်။ အဲဒီလိုပြောဆိုတတ်ခြင်းဟာ အသက်ကြီးလာတာနဲ့အမျှ လူမှုဆက်ဆံရေးနယ်ပယ်မှာ ပိုပြီး အဆင်ပြေစေပါတယ်။

15) ဆဲဆိုရိုင်းစိုင်းခြင်း မရှိစေဖို့၊ စကားလုံးကြမ်းကြမ်းတွေ မသုံးဖို့ သင်ထားပါ။

TV ကပဲကြားကြား၊ YouTube ကပဲကြားကြား၊ ဘေးလူတွေဆီကပဲကြားကြား ရိုင်းစိုင်းတဲ့စကားလုံးတွေ မပြောရဘူးဆိုတာ သင်ထားပါ။ ကိုယ်တိုင်လည်း ကလေးရှေ့မှာ မပြောပါနဲ့။ ကျမ စိတ်အရမ်းဆိုးလို့ ဆဲဆိုချင်ရင်တောင် ကလေးရှေ့မှာ ဘယ်တော့မှ မပြောပါဘူး။

~ Ending ~

ကိုယ့်ကလေးက ယဉ်ကျေးတဲ့အပြုအမူ တစ်ခုခုလုပ်ရင် ကိုယ်က သဘောကျကြောင်း ပြပါ။ အဲဒီလိုပြခြင်းက ကလေးကို ကောင်းတဲ့အပြုအမူတွေ ပိုပြီးလုပ်ချင်စိတ် ဖြစ်စေပါတယ်။ ကလေးတွေဟာ ချီးကျူးခံရတာ ကြိုက်ပါတယ်။ သူတို့ရဲ့ကောင်းတဲ့အပြုအမူတွေကို ချီးကျူးမခံရတဲ့အခါ "ငါကောင်းတာလုပ်တာကို သူတို့ဂရုမစိုက်ပါလား" ဆိုတဲ့စိတ်ဖြစ်စေပြီး လူကြီးမိဘရဲ့ Attention ရစေဖို့အတွက် ဆိုးပြပါတော့တယ်။

ကလေးတွေ အမှားတစ်ခုခုလုပ်တဲ့အခါ ချက်ချင်း ထောက်ပြပါ။ ပြင်ပေးပါ။

ကလေးတွေကို စိတ်မရှည်ချင်တဲ့အချိန်တွေ အများကြီးရှိပါလိမ့်မယ်။ ဒါပေမဲ့ စိတ်လွတ်မသွားဖို့ သတိထားပါ။ လိမ္မာယဉ်ကျေးတဲ့ ကလေးတွေဖြစ်ဖို့ သင်ကြားရတာတော့ အရမ်းပင်ပန်းပါတယ်။ စကားတွေ အများကြီးပြောပြီး ရှင်းပြရတယ်။ စိတ်အရမ်းရှည်ရပါတယ်။ တကယ်တော့ စိတ်ရှည်ခြင်းဆိုတာလည်း ကျင့်ဝတ်ကောင်းတစ်ခုပါပဲ။ ကလေးက ကိုယ့်ကိုအမြဲကြည့်ပြီး လေ့လာနေတာဖြစ်တဲ့အတွက် လူကြီးမိဘ ကိုယ်တိုင်ကလည်း ကောင်းမွန်တဲ့အမူအကျင့်တွေ၊ ကျင့်ဝတ်တွေရှိဖို့လိုပါတယ်။

❝ မိဘကိုယ်တိုင် အမူအကျင့်ကောင်းတွေ ပြုမူတဲ့အခါ ကလေးက မိဘဆီကနေ အလေ့အကျင့်ကူးပြီး ပေါ့ပေါ့ပါးပါး သင်ယူပါတယ်။ ❞

Jessica Mozart
Date : 31 March 2022
Ref : https://parenting.firstcry.com

အခြား Social Media, Page, Website များတွင် ပြန်လည်ကူးယူဝေမျှခြင်း ခွင့်မပြုပါ။

MUHI Baby Lotion

🌸Price: 22000 ကျပ်

🌸မွေးပြီး-၃ လမှစ၍အသုံးပြုနိုင်ပါတယ်။

🌸ခြင်/ ယင်/ ပုရွက်ဆိတ် ကစလို့ပိုးမွှားလေးတွေအကိုက်ခံရတဲ့နေရာလေးကိုလိမ်းပေးရပါမယ်။
🌸ချွေးထွက်ပြီးအဖုကလေးများဖြစ်ခဲ့ရင်လည်းလိမ်းပေးရင်ပျောက်ကင်းစေပါတယ်။
🌸ဒိုက်ဘာသုံးလို့ပဲဖြစ်ဖြစ် ကလေးရဲ့ အညစ်အကြေးကြောင့်ပဲဖြစ်ဖြစ်ယားယံကာအဖုအပိတ်လေးများထွက်ရင်လည်းထိုနေရာကိုဒီဆေးလေးလိမ်းရင်သက်သာပျောက်ကင်းစေပါတယ်။
🌸ကလေးရဲ့အသားအရည်ကိုနူးညံ့ချောမွေ့စေပြီးအန္တရာယ်မရှိစေလို့စိတ်ချစွာအသုံးပြုနိုင်ပါတယ်။
Instock