Braves 07

إكرام الميت دفنه.

في البحر كتبدا حكايات أحيانًا بلا نهاية هادي قصة ياسين دزاز خرج للبحر وما رجعش. ما كيعرف حتى واحد بالضبط كيفاش دازت لحظاتو الأخيرة، ولكن اللي مؤكد هو أن البحر ما كانش رحيم، وسالات حياتو غرقًا فصمت موجع ما كيسمعو غير اللي فقدو ولادهم فالبحر.

اليوم، الوجع ديال العائلة ما كيتقاسش بالكلمات. أُمّ كتستنى خبر يحبس هاد الألم، أَبّ باغي غير قبر يقرا فيه الفاتحة على ولدو، و أصدقاء حاسّين بالعجز و الذنب معندهم حيلة من غير الدعاء و يتبناو القضية و يطالبو بدفن ياسين فين ما مشاو، و فين ما كانو، عامين تقريبًا ديال الإنتظار كافية تهرس القلوب وتزرع إحساس كبير بالظلم.

سنتين تقريبا و ياسين ما زال الجثة ديالو مرمية فمستودع الأموات، بلا قبر، بلا وداع، و بلا كرامة، غير حيث مسؤول قرر ما يتحركش. عامين تقريباً ديال الإهمال ما يمكنش تفسرو لا بسوء الحظ، لا بتعقيد الإجراءات، و لا حتى بالمشاكل السياسية، حيث هاد القضية ما كانتش مستحيلة الحل.
شفنا حالة مشابهة ديال لاعب كرة معروف، تحركات فيها المسؤوليات بسرعة، تحلات القنوات، تحيدات العراقيل، و ترجع الجثمان للوطن و تدفن بكرامة. هادشي كيبين بالواضح أن الإمكانية كانت موجودة، و أن اللي كان ناقص فحالة ياسين ماشي القانون و لا الوسائل، و لكن الإرادة.
وهنا كيبقى السؤال اللي كيوجع

واش كرامة المواطن كتقاس بالشهرة ديالو؟
واش الحق غير للي كتذكرهم وسائل الإعلام؟
و واش المواطن البسيط اللي ما عندوش صوت و لا نفوذ يُترك وحيدا و تبقى جثة معلّقة غير حيث سميتو ما كتحرّكش العناوين؟

نقول اليوم بصارح العبارة، ترك جثمان ياسين في مستودع الأموات فدولة أخرى رغم القدرة على إنهاء هاد الملف، ماشي غير تقصير إداري، ولكن خيانة لمواطن مغربي كان خاص الدولة تحميه بلا تمييز. فَالدولة اللي ما كتساويش بين ولادها فالموت، صعيب تقنع الناس بالعدل ديالها فالحياة.

اليوم، أهل و أصدقاء ياسين ما كيطالبوش بالمستحيل. ما باغين لا تعويض، لا اعتذار، لا بيانات. باغين غير ترجع جثة ياسين لأرضو، لتراب كيعرفو، لقبر فيه سميتو، باش يبدا الحزن ياخد طريقو الطبيعي نحو القبول.

رمضان كريم.

بمناسبة حلول شهر الرحمة و المغفرة، تتقدم مجموعة كاب صولاي بأحر التهاني إلى الأمة الإسلامية، و إلى منطقة دكالة و كافة الجماهير الدفاعية.

نسأل الله أن يتقبل منا و منكم الصيام و القيام.

قوتنا في وحدتنا فكما تتوحد أصواتنا في المدرجات، تتوحد قلوبنا في هذا الشهر الفضيل.

رمضان كريم.