Kandy Metro News

வதந்தியால் மரணித்துப்போன இரு உயிர்கள்!
உண்மைச் சம்பவம். 💔😢

நவம்பர் 30 இரவு 10:15
கம்பளை நகரம்.

மீட்பு வேலைகளுக்காக வரும் குழுக்களை ஒருங்கிணைப்பது பற்றிய கலந்துரையாடல் ஒன்றில் இருந்தோம். அப்போது...

"Dam ஒடஞ்சாம்" என்று சப்தமாக சொல்லியபடி மக்கள் ஓடிக்கொண்டிருந்தார்கள். அந்தத்தகவல் எப்படியோ நாம் இருந்த இடத்துக்கும் வந்து சேர்ந்தது.

இருந்த இடத்தில் இருந்து ஒரு பத்து அடி ஓடி இருப்பேன். அதன் பின் தான் நிதானமாக சிந்திக்க ஆரம்பித்தேன்.

இந்தத் தகவல் உண்மைதானா? (உண்மையைச் சொல்கிறேன். அந்தப் பதற்றத்தில் என் காதில் விழுந்த சப்தம், அனைத்தையும் புரட்டிக்கொண்டு வரும் தண்ணீரின் சப்தம் போன்றே இருந்தது)

உண்மையாக இருந்தால் ஓடித் தப்ப முடியாதே. கொத்மலை அணைக்கட்டு உடைப்பெடுத்தால் முழுத்தண்ணீரும் எட்டு நிமிடத்தில் பேராதனையில் இருக்கும் என்று ஒரு கணிப்பு இருக்கிறது. இந்த வேகத்தில் எங்கு ஓட?

மேல் மாடிக்கு ஏறலாமா? அணை உடைந்தால் கட்டிடத்தையே பிடுங்கிக்கொண்டு போகுமே.

இவை அனைத்தையும் கணப்பொழுதில் மனதுக்குள் அசை போட்டுக்கொண்டு அமர்நதிருந்த இடத்துக்கே திரும்பும்போது அங்கிருந்த ஒருவர் நிதானமா பேரிடர் முகாமைத்துவ குழு (Disaster Management Committee - DMC) இன் தொலை பேசி இலக்கம் (117) க்கு அழைப்பெடுத்து குறித்த தகவலை விசாரித்துக்கொண்டிருந்தார்.

"தகவல் பொய்யாம்" சப்தமாக சொல்லி ஓடிக்கொண்டு இருந்தவர்களை நிறுத்தி, நம்பாதவர்களை 117 க்கு அழைப்பெடுக்க வைத்து, குழப்பத்தில் நிதானமிழந்தவர்களை சாந்தப்படுத்தி ஓடி வந்து விழுந்த வயோதிபர்களை அமர வைத்து.... என்று அல்லோலகல்லப்பட்டுக்கொண்டு இருந்தபோது யாரோ ஊர்வாசிகள் மஸ்ஜித்களை அணுகி குறித்த தகவல் போலியானது என்று அறிவிக்க ஏற்பாடு செய்திருநதார்கள்.

இத்தனை நடக்கும்போது கம்பளையில் இருந்த இரண்டு மூத்தவர்களின் இதயங்கள் இந்த அதிர்ச்சியை தாங்க முடியாமல் நிரந்தரமாக ஓய்வெடுத்து இருந்தன. (மாரடைப்பால் இறந்துவிட்டனர் - இன்னாலில்லாஹ்)

இந்த வதந்திக்குப் பின்னால் இருந்த நதிமூலம் ரிஷிமூலத்தை தேடிப்பார்த்தால்...

அது கொத்மலை அணையின் வான்கதவுகளில் ஒரு வான்கதவை திறப்பதற்காக எழுப்பிய வழமையான பாதுகாப்பு ஒலி.

வதந்திகள் ஆபத்தானவை.
அவை உயிர்களைக்கூட காவுகொள்ளலாம்.

தகவல்களை உறுதிப்படுத்திக்கொள்ள பிரயத்தனம் எடுப்போம்.

பதிவு - Husni Jabir