Sri Parami Rajapaksha

සූර්‍යයා මීන රාශියේ සිට මේෂ රාශියට සංක්‍රමණය වීම, අස්වනු නෙලීමේ අවසානය සනිටුහන් කරමින් සිංහල හා හින්දු අලුත් අවුරුද්ද බක් මාසයේ උදාවෙයි. "බක්" යන්නෙහි සිංහල අරුත වන්නේ "විශාල", "භාග්‍යවත්" ලෙස වන අතර මේ අරුත් ගෙන භාග්‍යවත් මාසය ආරම්භ වෙයි. ශ්‍රී ලාංකීය ජන සමාජය තුළ බක් මාසයට හිමිවන්නේ සුවිශේෂී ස්ථානයකි. එයට හේතුව නම් අලුත් අවුරුදු උදාවයි. මේ අවුරුද්ද හා සබැඳි බොහෝ චාරිත්‍ර සහ සංස්කෘතිකාංග දැක ගත හැකි වේ. මේ ලිපිය අවුරුද්ද හා සබැඳි සංස්කෘතිකාංග හා චාරිත්‍ර තුළ ඇති මනෝවිද්‍යාත්මක පදනම පිළිබඳවයි.

අවාසනාවකට මේ වන විට බොහෝ අවුරුදු චාරිත්‍ර හා සංස්කෘතිකාංග මිනිසුන් විසින් මඟ හැර තිබුණද ඒවා තුළ බොහෝ දේ ගන්නට ඇත. අවුරුදු චාරිත්‍ර ආරම්භ වන්නේ අවුරුදු දිනම නොව ඊට පෙර සිටයි. නව සඳ බැලීම, පරණ අවුරුදු ස්නානය, පුණ්‍ය කාලය, ආහාර පිසීම, වැඩ ඇල්ලීම, ගණුදෙනු කිරීම, ආහාර අනුභවය, හිසතෙල් ගෑම, රැකි රක්ෂා සඳහ පිටත්ව යාම චාරිත්‍ර වන අතර නෑගම් යාම, ජන ක්‍රීඩා සපිරි අවුරුදු උත්සව පැවැත්වීම විශේෂ අංග වේ.

පුරාණ මුතුන් මිත්තන්ගේ සිට පැවත එන අවුරුදු සිරිතෙහි ප්‍රධාන ලෙස විග්‍රහ වෙන මනෝවිද්‍යාත්මක පසුබිමක් නැති උනද එහි මනෝවිද්‍යාත්මක හරයක් ඇතැයි සිතමි. එය මෙසේ විග්‍රහ කරමු. අලුත් අවුරුද්ද ආරම්භය සනිටුහන් වන්නේම ස්වාභාව ධර්මය සබැඳිවය. අස්වනු නෙලාගෙන , ගස් වැල් අලුත් පණක් ලබන කාලයේදි මිනිසාද ස්වාභාව ධර්මයට පරිසරයට ලබැඳි වෙයි. මනසේ සහනයට, නීරෝගී මනසකට ස්වාභාවික පරිසරය මනා ඉවහල් වේ. මේ අවුරුදු කාලයේදි මිනිසුන් පරිසරය සමඟ ගණුදෙනු කිරීම මඟින් ඔවුන්ගේ ජීවත තුළ තිබූ තිබෙන බොහෝ ප්‍රශ්න ගැටලු පසෙකින් තබා නිදහසක් ලබා ගනි.මනස සැහැල්ලු කරගනි. මෙහි නව සඳ බැලීම පළවෙනි අවුරුදු චාරිත්‍රය වෙයි. අතීතයේදි චන්ද්‍ර මාස ක්‍රමය අනූව අවුරුද්ද ,මාස ගණනය කරන ලදි.මෙය් සිංහල හින්දු ජනයා අතර පමණක් නොව ඉස්ලාම් ආගමද සබැඳි දෙයකි. මෙහිදි ඉහත සඳහන් කලාක් මෙන් ස්වාභාව සෞන්දර්ය සමඟ ඇති කරගන්නා ගණුදෙනුවක් වන් අතර පරිසරය සමඟ මනා සබඳතාවක් ගොඩ නඟා ගැනීම යහපත් සෞඛ්‍ය ලක්ෂණයකි. එසේම අතීතයේදි බොහෝ ශිෂ්ඨාචාරවල මෙන්ම ආයුර්වේදය තුළදීද සඳට මනෝවිද්‍යාත්මක වටිනා කමක් ලබා දී ඇත. ඔවුන් පිළිගනු ලබන්නේ සඳෙහි වෙනස් වීම් මිනිස් මනසට හා ශරීරයට බලපාන බවයි. ඔවුන් සඳ බලා ස්ත්‍රී ඔසප් චක්‍රය ගනන් බැලීමටද පුරුදු වී සිට ඇත. ඒ අනූව නව සඳ බැලීමේ චාරිත්‍රය තුළද වටිනා කමක් ගැබ්ව ඇත.

එසේම අනික් වැදගත් අවස්තාවක් වන්නේ පුණ්‍ය කාලයයි. මේ කාලයේදි සියලු වැඩ අතහැර ආහාර ගැනීම අතහැර පුණ්‍ය කටයුතු වල නිරත වෙයි. මෙහි චාරිත්‍රානුකූල පැතිකඩ සහ පොදු මතය පසෙක තබා මනෝවිද්‍යාත්මක පැහැදිලි කිරීමක් ලබා දීමට වෑයම් කරමි. පැරණි සමාජය තුළ සිදු වූ මෙම චාරිත්‍රය පිළිබඳව නොව නවීන සමාජයට අදාළව මෙය විග්‍රහ කරමි. උදේ සිට රාත්‍රිය පහු වන තුරුම විවිධ වැඩ රාජකාරි වල නියැලෙන මිනිසුන් ප්‍රශ්න හැල හැප්පීම් රැසකට මැදි වී අවුරුද්දක් මුලුල්ලේම වැඩ වලට ප්‍රශ්න හැල හැප්පීම් වලටම පමණක් මුහුණ දෙන මිනිස්සුන්ට තමාගේ මනස සුවපත් කරගැනීමට කාලයක් නොමැති තරම්මය.

ලෝක සෞඛ්‍ය සංවිධානයට අනූව සෞඛ්‍ය නම් ලෙඩ රෝග වලින් තොර වීම පමණක් නොවන අතර ශාරීරික මානසික සමාජීය යහපැවැත්ම සෞඛ්‍ය වේ. මීට වඩා පුලුල් ලෙස සෞඛ්‍ය විග්‍රහ කළ හැකිය මෙයට ආධ්‍යාත්මික, සෞන්දර්යාත්මක, වෘත්තීමය යහපැවැත්මද අත්‍යාවශ්‍ය වේ. නමුත් වර්තමාන සමාජය තුළ එම යහපැවැත්ම සාදා ගැනීමට කාලයක්ද මිනිස්සුන්ට නැත. එසේ වූ කල්හි පුණ්‍ය කාලය තුළ සියලු වැඩ රාජකාරි අතහැර ආගමික කටයුතු වල නිරත වීම මනස සංසුන් වීමටද මනසේ ඒකාග්‍රතවයටද ලිහිල් වීමටද උපකාරි වේ. ඉහත සඳහන් කළ එක් එක් යහපැවැත්මවල් එකිනෙක වෙන් වෙන්ව නොව අන්තර් සම්බන්දතාවන් ඔස්සේ මිනිසෙකු නිර්මාණය වේ. ආධ්‍යාත්මික ලෙස සංතෘප්ත වීමට මෙම කාලය මැනවින් ඉවහල් වේ. තවත් ලෙසකින් මෙය චිකිත්සාවකි. එයට හේතුවනම් මේ කාලයේ අතීත සිරිතක් වූවේ ඉෂ්ට දේවතානුස්මරණය වේ. එනම් අවුරුදක් පුරාවට තමා රැකි දේවතාවාට පිං දීමයි. මෙය කෘතඥපූර්වක වීමකි. මෙය gratitude journal එකකට සමාන යමකි. එය මනස සැහැල්ලු විමකි. එසේම මෙතෙක් ගෙවා දැමූ ජීවිතය නැවත මෙනෙහි කොට අඩු පාඩු වැරදි නිවැරදි කරගෙන නව වසර නැවුම්ව ආරම්භයට මෙය උපකාරි වේ.

ඉන් පසුව උදාවන්නේ අලුත් අවුරුද්දයි. අලුත් අවුරුදු උදාව චාරිත්‍රානුකූලව බොහෝ සෙයින් වැදගත් කාල හෝරාවකි. ඉන් පසුව පවුලේ සියලුම දෙනා එකතුව අලුතින් ගත් ඇදුම් පැළදුම්ද ඇද ලිප ගිනි මෙලවීමට සූදානම් වෙයි. පැරණි අවුරුද්දේ තිබූ බර එහෙමත් නැතිනම් අනවශ්‍ය ලෙස පිරුනු මනසින් නිදහස්ව අලුත් සිතුම් පැතුම් නිදහසක් සමඟ අලුත් මිනිසෙකු ලෙස වැඩ කටයුතු කිරීමට සූදානම් වෙයි. කිරි ඉතිරවීම තුළ වෙනස්ම දෙයක් පැහැදිලි කිරීමට නොමැති උවද පහුගිය අවුරුදු සමයේ මට වැටහුනු දෙයනම් මෙය සිදුකරන අවස්තාවේ සියලුම දෙනා අවධානය ලබා දෙන්නේ මේ කිරි මුට්ටියටයි. එය එක් අතකින් භාවනාවක් මෙන් කර්තව්‍යකි. හේතුවනම් කිරි ඉතිරෙන වේලාව ඇසි පිය නොහෙලා එක් සිතින් යුතුව බලා සිටි. සුලු වේලාවකට හෝ එසේ මනස එක් තැනකට ගත හැකි වීම වටින බව මාගේ අදහසයි. එසේම ධනාත්මක චින්තනයන්ගෙන් පෝෂණය වී නව පනක් ලැබීම සිදුවේ.

ඊළඟට එලැබෙන නැකැත් සියලු දෙනාගේම ප්‍රියතම නැකැත් වනු ඇති. ආහාර අනුභවය, ගණුදෙනු කිරීම, වැඩ ඇල්ලීම ඊළඟ චාරිත්‍ර වේ. පැය ගනනක් නිරාහාරව සිට පවුලේ සියලු දෙනා එක්ව පහනක් දල්වා පවුලේ වැඩිහිටියාගේ සිට පොඩිහිටියා ලෙස පිළිවෙලට ආහාර බෙදා අනුභව කිරීම ආරම්භ කරයි. එසේම ගනුදෙනු කිරීමෙදි පැරැන්නන් ළිඳ සමඟද ගනුදෙනු කර ඇත. ඊළඟට වැඩ ඇල්ලීම, එනම් තමාගේ රාජකාරි නැවත ආරම්භ කරයි. මේ චාරිත්‍ර ඉටු කිරීමේදි වැඩිහිටියන්ට සහ සියලුම දෙනාට ගරු කිරීම සිදුවේ. ඇමරිකානු මනෝවිද්යාඥය ඇල්බර්ට් බාඳුරාගේ සමාජ ඉගෙනුම් න්‍යාය (Social learning theory) අනූව ඉගෙනීම සිදු වන්නේ නිරීක්ෂණය මඟිනි. මෙම අවස්තාවේදි අනිකුත් පවුලේ සාමාජිකයන් ගරුත්වයන් පෙන්වන ආකාරය එකිනෙකාට සහයෝගය දෙන ආකාරය ගනු දෙනු කරන ආකාරය පොඩිහිටියන් බලා සිටි. මෙම ගුණ ධර්ම ඔවුන් ඉගෙන ගනි. ඔවුන් වැඩිහිටියන් වන විට අනිකාට ගරු කිරීමට වැඩිහිටියන් හදුනා ගැනීමට සහයෝගය ලබා දීමට ඔවුන්ද හුරු වේ. වර්තමාන කාර්‍යබහුල සමාජය තුළ මෙසේ ආදර්ශමත් ක්‍රියා පෙන්වීමට මීට වඩා හොද අවස්තා අවමය. එසේම තමාට උපකාර කළ අජීවි වතුවක් උවද ළිඳට පවා කෘතගුණ සැලකීම ආදර්ශමත් ක්‍රියාවකි. එසේම නවතා දැමු වැඩකටයුතු නැවත නිදහස් මනසකින් පෙර වැරදි නිවැරදි කර නැවත ආරම්භ කිරීමට අවස්තව උදා වේ. එසේම තම අරමුණු ඉටුකර ගැනීමේ ස්ථීර අධිෂ්ඨානයකින් වැඩ ඇල්ලීම සිදු කරයි.

මීළඟට හිස තෙල් ගෑම සහ වැඩ රාජකාරි සඳහා පිටත් වීමේ චාරිත්‍ර පැමිණෙයි. හිස තෙල් ගෑම පිළිබඳව ගැඹුරින් සළකා බැලිය හැකිය. බටහිර මනෝවිද්‍යාව / මනෝවෛද්‍ය විද්‍යාව තුළ මෙන්ම ආයුර්වේදය තුළදීද මිනිසාගේ මනස පිළිබඳව වැදගත් ස්ථානයක් ලැබී ඇත. පැරණි සෘෂිවරුන් සඳහන් කර ඇත්තේ ශීර්ෂ තෛල අභ්‍යන්ගය (හිස තෙල් ගෑම) හිසේ නීරෝගීබාවයට හේතු වන බවයි. එසේම අයුර්වේදය තුළ මනුෂ්‍ය ශරීරයේ ක්‍රියාකාරීත්වය කප (ජලය), පිත (අග්නිය), වාත(වාතය) ප්‍රධානත්වයෙන් සිදු වන බව විශ්වාස කරයි. අප්‍රේල් මාසයේදි ලංකාවට ඉර මුඳුන් වනවාත් සමඟම අධික උෂ්ණත්වයක් ඇති වේ. මේ සමඟ ශරීරයේ පිත වැඩිවන බව විශ්වාස කරයි. එයින් ඇතිවන ශරීර පීඩා අවම කර ගැනීමට නානු ගෑම උපකාරි වේ. එසේම හිස තෙල් ගෑමේදි යොදා ගන්නා කලාදුරු අල, කුංකුමප්පු , සුදු හදුන්, විෂ්ණු ක්‍රාන්ති, ගෝරෝචන, සස්සඳ මුල්, ඉරිවේරිය, නස්නාරන් මුල්, සැවන්දරා මුල්, නෙලුම් දඩු, ගොඩමානෙල් අල, බෙලිමුල්, වෙනිවැල්ගැට, ඊ තණ වැනි ඖෂධ ඉහළ ඖෂධීය ගුණයක් ඇති ලෙස සැලකේ. මේ අනූව හිස තෙල් ගෑමද මනෝවිද්‍යාත්මක වටිනාකමක් ඇති චාරිත්‍රයක් ලෙස හැඳින්විය හැකි වේ.

අලුතින් ගත් ඇදුම් ඇද වේලාවට රාජකාරි සඳහ නිවාඩු අවසන් කර ඊළඟට පිටත් වෙයි. දවස් තුන හතරක විශාල නිදහස් කාලයකින් පසුව තිබූ ආතතීන්ගෙන් මනස සැහැල්ලු කර වැරදි හදුනා ගෙන ඒවාට පිළියම්ද සොයා නිදහස් මිනිසකු ලෙස රාජකාරි සඳහ පිටත් වීමට හැකි වේ.

මීට අමතරව ජන ක්‍රීඩා නැගෑම් යාම වැනි ක්‍රියාකාරකම් අවුරුදු කාලය තවත් රසවත් කරයි. කාලයකින් හමු නොවුනු හිතවතුන් හමු වී සමාජ සබඳතා ශක්තිමත් කරගනි. එසේම ක්‍රීඩා කිරීම තුළින් ජය පැරදුම සමසිතින් විද දරා ගැනීමට උගනී. එසේම ශාරීරික සෞඛ්‍ය සඳහාද ජන ක්‍රීඩා වැදගත් කාර්‍යභාරයක් ඉටුකරයි.

එසේනම් සිංහල හා දමිළ අලුත් අවුරුදු චාරිත්‍ර තුළින් විශාල යහපතක් සියලුම දෙනාට සිදුවේ. බොහෝ විඩාබර කාලරාමුවකට පසුව දවස් තුන හතරක සැනසුමකට මෙම අවුරුදු උදාව මැනවින් ඉවහල් වේ. එසේම සමාජයක් තුළ ජීවත් වීමේදී පුද්ගලයකු සමාජ අනන්‍යතාවය හඳුනාගැනීම උපකාරි වේ. මෙම චාරිත්‍ර මුලු සමාජයක් එක්ව කරන විට පුද්ගලයින් එය අනුගමනය කිරීම සමාජ අනන්‍යතාවය හඳුනා ගැනීමට උපකාරි වේ. එසේම මාස්ලෝගේ අවශ්‍යතා ධූරාවලිය පහදන්නේ පුද්ගලයකු ධූරාවලියක ලෙස තම අවශ්‍යතා ඉටු කරගන්නා බවයි. එහිදි භෞතික අවශ්‍යතා, ආරක්ෂක අවශ්‍යතා ඉටු කර ගැනීමෙන් පසුව සමාජීය අවශ්‍යතා ඉටු කර ගනි. මෙහිදී පුද්ගලයකු තම සමාජයට අයිති වන බවට හැඟීම පුද්ගලයකු ඉහත ධූරාවලින්ට යොමු කරයි. චාරිත්‍ර වාරිත්‍ර එලෙස ඉටු කිරීම පුද්ගලයකු තමා සමාජයට අයත් වන බවට හැඟෙයි.

එසේ බලන කල්හි අලුත් අවුරුදු චාරිත්‍ර එලෙසම ඉටු කිරීම එක් ආකාරයක මනෝචිකිත්සාවකි.

®️ ශ්‍රී පාරමි රාජපක්ෂ
මනෝවිද්‍යා කථිකාචාර්ය