NGO2 BambooShoot Foundation

កាលពីថ្ងៃសុក្រ ០៤ កើត ខែមាឃ ឆ្នាំម្សាញ់ សប្តស័ក ព.ស. ២៥៦៩
ត្រូវនឹងថ្ងៃទី២០ ខែកុម្ភៈ ឆ្នាំ២០២៦

រដ្ឋបាលឃុំកំពង់ឃ្លាំង ក្រោមអធិបតីភាពអភិបាលស្រុកសូទ្រនិគម បានរៀបចំកិច្ចប្រជុំស្តីពីការផ្សព្វផ្សាយ និងពង្រឹងការងារសម្អាតបរិស្ថានតាមដងផ្លូវសាធារណៈ ព្រមទាំងការអនុវត្តការញែកសំរាមឱ្យបានត្រឹមត្រូវ ដើម្បីទប់ស្កាត់ការបោះចោលសំរាមរាយប៉ាយ និងការបោះចោលសំរាមចូលក្នុងទន្លេសាប ស្ទឹង បឹង បួរ និងប្រភពទឹកផ្សេងៗ។

ក្នុងឱកាសនោះ លោកអភិបាលស្រុកបានដាក់ចេញផែនការដល់ឃុំទាំងពីរ ដើម្បីពង្រឹងវិធានការទប់ស្កាត់ និងបញ្ឈប់ការបោះចោលសំរាមដោយអនាធិបតេយ្យ តាមបណ្តោយដងផ្លូវ ចាប់ពីគីឡូម៉ែត្រលេខ៨ រហូតដល់ស្ពានតាមុំ និងដងផ្លូវសំខាន់ៗផ្សេងទៀតក្នុងមូលដ្ឋាន។

កិច្ចប្រជុំនេះប្រព្រឹត្តទៅក្រោមការដឹកនាំរបស់៖
• លោក គិម វណ្ណៈ អភិបាល នៃគណៈអភិបាលស្រុកសូទ្រនិគម
• លោកស្រី ងិន មុំ ប្រធានក្រុមប្រឹក្សាស្រុកសូទ្រនិគម
• លោក តាន់ សុភ័ក្ត្រ អភិបាលរង នៃគណៈអភិបាលស្រុក
ដោយមានការចូលរួមពី លោក លោកស្រី មន្ត្រីចំណុះរដ្ឋបាលស្រុក លោក លោកស្រី មេឃុំ និងក្រុមប្រឹក្សាឃុំកំពង់ឃ្លាំង មេឃុំដានរុន ប៉ុស្តិ៍រដ្ឋបាល ប្រជាការពារ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស។
ចំនួនអ្នកចូលរួមសរុប៖ ១៨៥នាក់ (ស្រី ១២០នាក់)។

សូមបញ្ជាក់ផងដែរថា រដ្ឋបាលស្រុកសូទ្រនិគម ដោយមានការគាំទ្រពីអង្គការដៃគូជាតិ និងអន្តរជាតិ បានរៀបចំបើកកម្មវិធីទេសចរណ៍បរិស្ថានក្រោមប្រធានបទ «យុទ្ធនាការសម្អាតកំពង់ឃ្លាំង» ជាផ្លូវការ កាលពីថ្ងៃទី២៨ ខែមករា ឆ្នាំ២០២៦ ហើយបានដាក់ចេញយន្តការបន្តអនុវត្តសកម្មភាពសម្អាតជាប្រចាំរៀងរាល់ខែ រហូតដល់ថ្ងៃប្រារព្ធទិវាបរិស្ថានជាតិ និងពិភពលោក ៥ មិថុនា ក្នុងគោលបំណងប្រមូល និងកម្ចាត់សំរាមប្លាស្ទិកឱ្យបានអស់ក្នុងរដូវទឹកសម្រកនេះ។

រដ្ឋបាលឃុំកំពង់ឃ្លាំង សូមអំពាវនាវដល់បងប្អូនប្រជាពលរដ្ឋទាំងអស់ ចូលរួមថែរក្សាអនាម័យ និងការពារបរិស្ថានរបស់យើងឱ្យបានស្អាត ស្រស់បំព្រង ដើម្បីលើកកម្ពស់សុខភាពសាធារណៈ និងបង្កើនភាពទាក់ទាញផ្នែកទេសចរណ៍ក្នុងសហគមន៍។ 🌿
Ocean Recovery Alliance Rivers.Global Cambodia Tourism Association - CATA Tonle Sap Eco Warriors Angkor Wildlife & Aquarium សហគមន៍ទេសចរណ៍ធម្មជាតិ-កំពង់ឃ្លាំង រដ្ឋបាលស្រុកសូទ្រនិគម/Soutrnikom district Administration