R-FiX

ម៉ាស៊ីនចំហេះក្នុងគឺជាកម្លាំងស្នូលដែលអោយយានយន្តដំណើរការទៅមុខបាន។🛵🚙
ម៉ាស៊ីនចំហេះក្នុងដែលប្រើពិស្តុងគឺមានច្រើនប្រភេទអាស្រ័យទៅលើការតំរៀបសឺមីរបស់វាដូចជា In-line, V-type, Radial ជាដើម។
តែទៅបីជាការតំរៀបយ៉ាងម៉េចក៏ដោយ គោលការណ៍ធ្វើការរបស់វាគឺត្រូវគោរពតាមយន្តការណ៍ដូចគ្នាគឺពិស្តុងឡើងចុះក្នុងសឺមីក្នុងមួយខួបមាន4វគ្គ។
1. វគ្គបឺតបញ្ចូល: ពិស្តុងធ្វើចលនាពីលើចុះក្រោម (ស៊ូប៉ាប់ខ្យល់បើក ស៊ូប៉ាប់ភ្លើងបិទ) ដើម្បីបឺតរឺស្រូបយកល្បាយសាំងចូលក្នុងបន្ទប់ចំហេះតាមផ្លូវបឺតបញ្ចូល។
2. វគ្គសង្កត់បង្រួម: ពិស្តុងធ្វើចលនាពីក្រោមឡើងលើ (ស៊ូប៉ាប់ទាំងពីរបិទ) ដើម្បីបំណែនល្បាយសាំងរហូតដល់ចំណុចផុតលើ (TDC)។
3. វគ្គផ្ទុះឆេះ: ពេលពិស្តុងឡើងដល់ចំណុចផុតលើ (ស៊ូប៉ាប់ទាំងពីរបិទ) ប៊ូស៊ីអោយផ្កាភ្លើងដើម្បីអោយល្បាយសាំងផ្ទុះឆេះបង្កើតបានជាសម្ពាធក្នុងការរុញច្រានពិស្តុងចុះក្រោម ត្រង់វគ្គនេះគេអាចហៅម្យ៉ាងទៀតបានថាវគ្គផលិតកម្លាំង។
4. វគ្គបញ្ចេញផ្សែង: ពិស្តុងធ្វើចលនាពីក្រោមឡើងលើ (ស៊ូប៉ាប់ខ្យល់បិទ ស៊ូប៉ាប់ភ្លើងបើក) ដើម្បីរុញសំណល់ផ្សែងបន្ទាប់ពីការឆេះអោយចេញទៅក្រៅតាមរយៈស៊ូប៉ាប់ភ្លើង។
ដល់ត្រង់នេះគេហៅថាមួយខួប បន្ទាប់ពីនេះគឺចូលទៅវគ្គទី1វិញ។