SP Creator

ឯកឧត្ដម​ តែម​ ម៉ឺន​ អញ្ជើញ​ជាអធិបតី​បិទកិច្ចប្រជុំស្ដីពី​ កីឡា​លេីក​ទម្ងន់​រយៈពេល​ ៣ថ្ងៃ​

ភ្នំពេញ : ឯកឧត្តម ឧត្តមសេនីយ៍ឯក តែម ម៉ឺន អនុរដ្ឋលេខាធិការក្រសួងការពារជាតិ និងជាប្រធានសហព័ន្ធកីឡាលើកទម្ងន់កម្ពុជាអញ្ជើញអធិបតី​បិទ​កិច្ចប្រជុំ​ស្ដីពី​កីឡា​លេីកទម្ងន់​ ក្រោមប្រធានបទ​ "កីឡាដើម្បីមិត្តភាព និងអភិវឌ្ឍ " និងមាន​ការ​អញ្ជើញ​ចូលរួម​ពី​ លោក​ យ៉ុង ជូថុមលាវ​ អនុប្រធានសហព័ន្ធកីឡាលើកទម្ងន់ "អន្តរជាតិ" និង​ជា​ប្រធាន​សហព័ន្ធ​កីឡា​លេីកទម្ងន់​សឹង្ហបុរី​ ព្រមទាំង ឯកឧត្តម​ លោកជំទាវ​ អនុប្រធាន​សហព័ន្ធ​កីឡាលេីក​ទម្ងន់​ម្ពុជា​ សមាជិក​ក្រុមប្រឹក្សាភិបាល​ គ្រូបង្វឹក​ អ្នកបច្ចេកទេសកីឡាលើទម្ងន់ជាតិ​ និងអន្តរជាតិជាច្រើននាក់​ នៅ​រសៀល​ថ្ងៃទី​១៣​ ខែសីហា​ ឆ្នាំ​២០២៥​ ស្ថិត​នៅ​អាគារ​ NOCC​ រាជធានី​ភ្នំពេញ​។

ថ្លែង​ក្នុង​ឱកាស​បិទ​កិច្ចប្រជុំ​ ដែល​មានដំណើរ​អស់​រយៈ​ពេល​ ៣ថ្ងៃ​ ចាប់​ពីថ្ងៃទី​១១​ ខែសីហា​ ដល់ថ្ងៃទី​១៣​ ខែ​សីហា​ ឆ្នាំ​២០២៥​ ឯកឧត្ដម​ តែម​ ម៉ឺន​ បាន​ប្រាប់​ថា​ កិច្ចប្រជុំ​នេះ​ គឺធ្វើ​ឡេីង​ក្នុង​គោល​បំណង​ដេីម្បី​បំពាក់បំប៉ន​លេី​ការ​ហ្វឹកហាត់​ ទាំង​កីឡាករ​ និង​គ្រូបង្វឹក​ សំដៅ​លេី​បច្ចេកទេស​ និង​ច្បាប់​វិន័យ​ នៃ​ការ​ប្រកួត​ ទាំង​ថ្នាក់​ជាតិ​ និង​ថ្នាក់​អូឡាំពិក​ជាដេីម។

ឯកឧត្ដម​ បាន​បន្ដលេីកឡេីងទៀត​ថា​ ប្រភេទ​កីឡា​លេីកទម្ងន់​នៅកម្ពុជា​ ទេីបតែ​ចាប់ផ្ដើម​ដំណើរការ​បាន​រយៈពេល​ ៨ឆ្នាំ​ ប៉ុណ្ណោះ​ ហេតុ​ដូចនេះ​ហើយ​ សហព័ន្ធ​ត្រូវ​ការ​ភាព​ជា​ដៃគូរ​សហការ​ ដែល​ពោរពេញ​ដោយ​បទពិសោធន៍​ មកពីបណ្តា​សហព័ន្ធ​កីឡា​លេីកទម្ងន់​ បរទេស​ជា​ដៃគូ​ ក្នុង​ការអភិវឌ្ឍន៍​ និង​ជ្រុំជ្រែង​ ដេីម្បី​លេីកស្ទួយ​ ទាំង​បច្ចេកទេស​ ស្មារតី​ គុណភាព​ និង​ច្បាប់​វិន័យ​នានា​ ធ្វើ​យ៉ាងណា​ឱ្យ​ប្រភេទ​កីឡា​លេីក​ទម្ងន់​នៅ​កម្ពុជា​ អាច​ឈរ​លេីឆាក​អន្ដរជាតិ​បាន​ និង​មាន​ឱកាស​ឱ្យ​កីឡាករ​អាច​ទទួល​ជ័យជម្នះ​ ជា​មេដាយ​ជូន​ជាតិ​។

ក្នុង​អំឡុង​ពេល​ ៣ថ្ងៃ​ នេះ​ លោក​ យ៉ុង ជូថុមលាវ​ អនុប្រធានសហព័ន្ធកីឡាលើកទម្ងន់ "អន្តរជាតិ"​ បាន​ផ្ដល់​នូវ​អនុសាសន៍​ល្អ​ៗ ព្រមទាំង​បច្ចេកទេស​សំខាន់​ៗ​ ជូន​ដល់​សហព័ន្ធ​កីឡា​លេីកទម្ងន់​កម្ពុជា​ ដោយ​ផ្ដោត​សំខាន់​លេីក​ កីឡាករ​ និង​គ្រូ​បង្វឹក​។

លោក​ យ៉ុង ជូថុមលាវ​ បាន​បន្ថែម​ថា​ លោក​ នឹងចូលរួម​គាំទ្រ​ លេីកទឹកចិត្ដ​ ឱ្យ​កីឡាករ​ ក៏ដូច​ជា​គ្រូ​បង្វឹក​ បន្ដការ​ខិតខំ​ប្រឹងប្រែង​ហាត់​រៀន​ ទាំង​បច្ចេកទេស​ និង​ច្បាប់​វិន័យ​ ក្នុងការប្រួត​សម្រាប់​ថ្នាក់​អន្តរជាតិ​ ហើយ​លោក​បាន​ចូលរួម​ឧបត្ថម្ភ​នូវ​សម្ភារៈ​ហ្វឹកហាត់​មួយ​ចំនួន​ផងដែរ។

https://deumtnorttv.com/hetemmeun13082502/

ក្រសួងបរិស្ថានកំពុងពន្លឿនការដ្ឋានសាងសង់ហេដ្ឋារចនាសម្ព័ន្ធផ្លូវឡើងទៅភ្នំខ្នងផ្សារ ដើម្បីក្លាយជាគោលដៅលំហែបៃតងទាក់ទាញភ្ញៀវទេសចរណ៍ ឱ្យបានកាន់តែច្រើន

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅថ្ងៃពុធ ទី១៣ ខែសីហា ឆ្នាំ២០២៥ បានអញ្ជើញចុះពិនិត្យការដ្ឋានសាងសង់ ផ្លូវប្រវែងជាង ៧,២ គីឡូម៉ែត្រ ដែលទើបបានកិនពង្រាប កាលពីពេលថ្មីៗ និងការសាងសង់ហេដ្ឋរចនាសម្ព័ន្ធ ភ្ជាប់ពីតំបន់លំនៅដ្ឋានរបស់សហគមន៍រលាក់កងជើង ឆ្ពោះទៅផ្លូវឡើងទៅលើភ្នំខ្នងផ្សារ នៃឧទ្យានជាតិជួរភ្នំក្រវ៉ាញ ក្នុងភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។ ឯកឧត្តមបណ្ឌិត អ៊ាង សុផល្លែត បានថ្លែងថា ដំណើរការសាងសង់ កំពុងដំណើរការទៅមុខ ខណៈក្រុមការងារ កំពុងខិតខំសម្រុកស្ថាបនា ឲ្យបានរួចរាល់រចនាសម្ព័ន្ធនៅតំបន់ជើងភ្នំ តភ្ជាប់ពីផ្លូវចេញពីលំនៅដ្ឋានសហគមន៍ នៅជើងភ្នំ ឆ្ពោះទៅលើភ្នំខ្នងផ្សារ។

ឯកឧត្តមរដ្ឋមន្រ្តីបានថ្លែងបន្ថែម ថាតាមរយៈហេដ្ឋារចនាសម្ព័ន្ធទាំងនេះ នឹងចូលរួមលើកកម្ពស់ជីវភាព គ្រួសាររស់នៅរបស់ប្រជាពលរដ្ឋ នៃសហគមន៍តំបន់ការពារធម្មជាតិ មកចូលរួមចំណែកក្នុងការការពារ និងអភិរក្សធនធានធម្មជាតិ តាមរយៈទទួលបានចំណូល ពីមុខរបរថ្មីតាមរយៈការអភិវឌ្ឍគោលដៅលំហែបៃតង ព្រោះសហគមន៍មានសក្តានុពលធម្មជាតិជាច្រើន ជាពិសេសទេសភាពធម្មជាតិ តំបន់ខ្នងផ្សារ និងខ្នងសំពៅជាដើម។ តំបន់ខ្នងផ្សារ ជាកន្លែងដ៏ពេញនិយមសម្រាប់ទេសចរ ដែលចូលចិត្តដើរកម្សាន្តតាមព្រៃភ្នំ និងតំបន់ធម្មជាតិដ៏ស្រស់ត្រកាល។ ឯកឧត្តមរដ្ឋមន្រ្តី បានថ្លែងថាការអភិវឌ្ឍតំបន់នេះ គឺអនុវត្តតាមប្រសាសន៍ដឹកនាំ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកាលពីឱកាសបំពេញទស្សនកិច្ចនៅតំបន់ភ្នំខ្នងផ្សារ កាលពីថ្ងៃទី០៨ ខែមីនា ឆ្នាំ២០២៥ កន្លងទៅបានដាក់ចេញ គោលដៅថែរក្សា អភិរក្ស និងអភិវឌ្ឍដោយចីរភាព នូវតំបន់ភ្នំខ្នងផ្សារ ឱ្យបានកាន់តែប្រសើរឡើង និងក្លាយជាគោលដៅទាក់ទាញទេសចរណ៍ ឱ្យបានកាន់តែច្រើន។

សូមបញ្ជាក់ថា បន្ទាប់បានរៀបចំពង្រាបផ្លូវបានស្អាតហើយ ការដ្ឋានសាងសង់ តំបន់ជើងភ្នំ រួមមានក្លោងទ្វារចូលតំបន់ខ្នងផ្សារ សួនច្បារ កន្លែងសម្រាក ហាងកាហ្វេ នឹងបញ្ចប់នៅក្នុងខែតុលាខាងមុខ ដើម្បីសម្រួលការធ្វើដំណើរ និងការកម្សាន្តរបស់ភ្ញៀវទេសចរ។ ជាមួយគ្នានេះ ក្រសួងបរិស្ថានកំពុងធ្វើការ ការពារនិងអភិរក្សធនធានធម្មជាតិ និងចូលរួមដាំដើមឈើឱ្យបានច្រើន ថែមទៀត។

ផ្លូវក្រាលគ្រួសក្រហម (ក្រាលថ្មម៉ិច) ប្រវែង ៧,២ គ.ម ទទឹងប្រវែង ៨ ម៉ែត្រ ចាប់ពីផ្លូវលេខ ៤៨.៤ CAM ដល់ជើងភ្នំឡើងតំបន់ខ្នងផ្សារ ដែលបានសម្ពោធបើកការដ្ឋានស្ថាបនា កាលពីថ្ងៃទី១៦ ខែឧសភា ឆ្នាំ២០២៥ កន្លងទៅ កំពុងស្ថាបនាជិតរួចរាល់។ តាមគម្រោង ការសាងសង់ផ្លូវចូលទៅភ្នំខ្នងផ្សារ ត្រូវបានរៀបចំ រួមទាំងការសាងសង់ហេដ្ឋារចនាសម្ព័ន្ធ បម្រើឱ្យគោលដៅលម្ហែបៃតង តំបន់ភ្នំខ្នងផ្សារ ដូចជាការសាងសង់ផ្លូវថ្មើជើង ឡើងតំបន់ខ្នងផ្សារ ចាប់ពីចំណុចជើងភ្នំ ដល់ដំណាក់ដានព្រះចម្ងាយជាង ៤ គ.ម។ នៅតាមផ្លូវឡើងសួងបរិស្ថាន មានគម្រោងរៀបចំកន្លែង សម្រាកជាដំណាក់ៗ ដែលមានដើមឈើហូបផ្លែ និងឈើព្រៃផ្តល់ម្លប់ និងអាចអ្នកទេសចរណ៍ បានសម្រាកផង និងអាចទទួលទានផងដែរ។ គម្រោងនឹងផ្តល់ជូនដល់អ្នកទេសចរឡើងភ្នំខ្នងផ្សារ អាចពិសាទឹកស្អាត ដែលចម្រោះចេញពីទឹកធម្មជាតិ ប្រភពពីលើភ្នំ ដល់កន្លែងសម្រាក ជាមួយការដាក់ស្លាកព័ត៌មាន ដែលបង្ហាញពីចម្ងាយផ្លូវ ឆ្ពោះទៅភ្នំខ្នងផ្សារថែមទៀត។ នៅលើខ្នងភ្នំ ក្រសួងមានគម្រោង សាងសង់ហេដ្ឋារចនាសម្ព័ន្ធគាំទ្រ មានដូចជា ៖ ហាងកាហ្វេ កន្លែងផ្តល់ព័ត៌មាន ប្រព័ន្ធអគ្គិសនីដើរដោយថាមពលព្រះអាទិត្យ ប្រព័ន្ធទឹកស្អាត កន្លែងបោះតង់ កន្លែងសង្គ្រោះបឋម អាហារដ្ឋាន និងកន្លែងទុកដាក់សំរាមផងដែរ៕