Cambodian Human Rights Committee

ឯកឧត្តម វ៉ាន ដាណា សមាជិក គ.ស.ម.ក. ចូលរួមជាគណៈកម្មការក្នុងវេទិកាប្រកួតជជែកដេញដោល នៃកម្មវិធីអបអរសាទរខែមោទកភាព២០២៦
-----------------------------------
ភ្នំពេញ៖ ឯកឧត្តម កែវ រ៉េមី ទេសរដ្ឋមន្រ្តី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) បានចាត់តាំង ឯកឧត្តម វ៉ាន ដាណា សមាជិក គ.ស.ម.ក. ជាតំណាងចូលរួមបើកកម្មវិធី និងធ្វើជាគណៈកម្មការក្នុងវេទិកាប្រកួតជជែកដេញដោល នៃកម្មវិធីអបអរសាទរខែមោទកភាព២០២៦ នៅថ្ងៃទី២៩ ខែឧសភា ឆ្នាំ២០២៦ នៅអាគារ GIA កោះពេជ្រ តបតាមការអញ្ជើញរបស់ អង្គការក្លែនអន្តរជាតិកម្ពុជា (Plan International) រួមជាមួយអង្គការ និងបណ្តាញដៃគូ ដែលធ្វើការងារលើ សិទ្ធិមនុស្ស សិទ្ធិកុមារ សមភាពយេនឌ័រ និងបរិយាបន្ន។

កម្មវិធីអបអរសាទរខែមោទកភាព ២០២៦ មានគោលបំណងលើកកម្ពស់ការយល់ដឹងអំពីសិទ្ធិ និងសមភាពយេនឌ័ររបស់បុគ្គលមាន អត្តសញ្ញាណយេនឌ័រចម្រុះ និងអ្នកស្រលាញ់ភេទដូចគ្នា ព្រមទាំងជំរុញការចូលរួមពីភាគីពាក់ព័ន្ធ ដើម្បី បង្កើនបរិយាកាសសុវត្ថិភាព ការគោរព និងគ្មានការរើសអើងក្នុងសង្គម។ កម្មវិធីនឹងរួមមាន សកម្មភាព សំខាន់ៗដូចជា ការតាំងពិព័រណ៍ ការផ្សព្វផ្សាយ ការពិភាក្សា និងវេទិកាជជែកដេញដោលអំពី ការលុបបំបាត់អំពើរើសអើង និងវេទិកាសារធារណៈលើកកម្ពស់សិទ្ធិសេរីភាព និងសេចក្តីថ្លៃថ្នូរបុគ្គលមានអត្តសញ្ញាណយេនឌ័រចម្រុះ និងអ្នកស្រលាញ់ភេទដូចគ្នាដែលចូលរួមដោយ បណ្តាញអង្គការសង្គមស៊ីវិល សហគមន៍អ្នកស្រលាញ់ភេទដូចគ្នា យុវជន និងភាគីពាក់ព័ន្ធរួមទាំងវិស័យឯកជន។

ខែមោទកភាព (Pride Month: June 1-30) គឺជាពេលវេលាមួយសម្រាប់រំលឹកពីប្រវត្តិសាស្ត្រ ការតស៊ូ និងការលើកកម្ពស់សេចក្តីថ្លៃថ្នូរ សមភាព និងការមិនរើសអើងចំពោះមនុស្សគ្រប់រូប។ សង្គមដែលរឹងមាំ គឺជាសង្គមដែលគោរពភាពខុសគ្នា ទទួលស្គាល់សិទ្ធិ និងតម្លៃមនុស្សដោយស្មើភាព និងរស់នៅជាមួយគ្នាដោយការយោគយល់ និងការគោរពគ្នាទៅវិញទៅមក៕

ឯកឧត្តមទេសរដ្ឋមន្រ្តី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានចុះសួរសុខទុក្ខ នាំយកគ្រូពេទ្យស្ម័គ្រចិត្តពិនិត្យសុខភាពកុមារ និងគ្រឿងឧបភោគបរិភោគ ជូនអង្គការការអភិវឌ្ឍកុមារកម្ពុជា លើកទី១៩ និងសមាគមស្នាមញញឹមថ្មីនៃក្ដីសង្ឃឹមរបស់កុមារ លើកទី៧។
===========

ខេត្តកណ្ដាល៖ នៅព្រឹកថ្ងៃទី២៨ ខែឧសភា ឆ្នាំ២០២៦ ឯកឧត្តមទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) អមដំណើរដោយថ្នាក់ដឹកនាំ និងមន្រ្តីរាជការនៃ គ.ស.ម.ក. សប្បុរសជននានា និងក្រុមគ្រូពេទ្យស្ម័គ្រចិត្ត បានចុះសួរសុខទុក្ខ ពិនិត្យសុខភាពច្រមុះ បំពង់ក ត្រចៀក មាត់ធ្មេញ និងគ្រឿងឧបភោគបរិភោគ ព្រមទាំងសម្ភារៈប្រើប្រាស់ផ្សេងៗ ជូនអង្គការការអភិវឌ្ឍកុមារកម្ពុជា លើកទី១៩ និងសមាគមស្នាមញញឹមថ្មីនៃក្ដីសង្ឃឹមរបស់កុមារ លើកទី៧ ដែលមានទីតាំងក្នុងខេត្តកណ្ដាល ដែលជាការចូលរួមលើកកម្ពស់សុខុមាលភាព និងគុណភាពជីវិតរបស់កុមារ ព្រមទាំងអបអរសាទរទិវាកុមារអន្តរជាតិ ខួបទី៧៧ ដែលប្រព្រឹត្តទៅនៅថ្ងៃទី១ ខែមិថុនា ឆ្នាំ២០២៦ ខាងមុខនេះ។

សូមបញ្ជាក់ជូនថា ឯកឧត្តមទេសរដ្ឋមន្រ្តី តែងតែចុះជួបសួរសុខទុក្ខ និងនាំយកគ្រឿងឧបភោគបរិភោគទៅប្រគល់ជូនអង្គការ និងសមាគមទាំងនេះដោយផ្ទាល់ យ៉ាងហោចណាស់ម្តងក្នុងមួយឆ្នាំ ហើយក៏បានចាត់ឱ្យក្រុមការងាររបស់ គ.ស.ម.ក. នាំយកគ្រឿងឧបភោគបរិភោគ និងឱសថមួយចំនួន ប្រគល់ជូនជាប្រចាំជារៀងរាល់ខែផងដែរ។ សកម្មភាពទាំងនេះ គឺជាការចូលរួមសំខាន់ក្នុងការជួយសម្រាលបន្ទុករបស់អង្គការ សមាគម និងជួយដល់កុមារ ជាពិសេសកូនតាមម្តាយនៅពន្ធនាគារ និងមណ្ឌលអប់រំកែប្រែ និងកុមារងាយរងគ្រោះផ្សេងៗ មានឱកាសរស់នៅក្នុងបរិយាកាសប្រកបដោយសុវត្ថិភាព សេចក្តីថ្លៃថ្នូរ និងការការពារសិទ្ធិជាមូលដ្ឋាន។

ការចុះសួរសុខទុក្ខនេះ ក៏បានចូលរួមធានាថា កុមារដែលរស់នៅទីនោះ ទទួលបានសិទ្ធិសំខាន់ៗ ដូចជា សិទ្ធិរស់រានមានជីវិត សិទ្ធិទទួលបានសុខភាពទាំងផ្លូវកាយនិងផ្លូវចិត្ត សិទ្ធិទទួលបានការអប់រំ សិទ្ធិទទួលបានការការពារពីអំពើបៀតបៀន ការបំពាន និងអំពើហិង្សាគ្រប់ទម្រង់ ស្របតាមអនុសញ្ញាស្តីពីសិទ្ធិកុមារ និងគោលនយោបាយរបស់រាជរដ្ឋាភិបាល ដែលផ្តោតលើគោលការណ៍ «មិនទុកនរណាម្នាក់ឱ្យនៅឯកា»។ កុមារត្រូវបានចាត់ទុកថាជាធនធានដ៏មានតម្លៃបំផុតរបស់សង្គមជាតិ និងជាក្តីសង្ឃឹមដ៏សំខាន់សម្រាប់អនាគតនៃប្រទេសជាតិ។

ថ្លែងក្នុងឱកាសនោះ ឯកឧត្តមទេសរដ្ឋមន្រ្តី បានសម្ដែងនូវការកោតសរសើរ និងវាយតម្លៃខ្ពស់ចំពោះ គណៈគ្រប់គ្រង និងបុគ្គលិកនៃអង្គការ និងសមាគមទាំងពីរ ដែលបានបំពេញភារកិច្ចដោយការទទួលខុសត្រូវខ្ពស់ ក្នុងការថែទាំ ការពារ និងលើកកម្ពស់សិទ្ធិសេរីភាពជាមូលដ្ឋានរបស់កុមារ ជាពិសេសសិទ្ធិសុខភាព សិទ្ធិអប់រំ និងសិទ្ធិរស់នៅក្នុងបរិយាកាសប្រកបដោយសុវត្ថិភាព។ ឯកឧត្តមទេសរដ្ឋមន្រ្តី ក៏បានកត់សម្គាល់ថា ការគ្រប់គ្រងនៅទីនេះ ប្រព្រឹត្តទៅដោយការគោរពសិទ្ធិកុមារ និងមិនមានការរំលោភបំពានណាមួយកើតឡើងឡើយ។ លើសពីនេះ ឯកឧត្តមទេសរដ្ឋមន្រ្តី បានបញ្ជាក់ថា ក្នុងករណីកុមារណាមានបញ្ហាសុខភាព ឬត្រូវការជំនួយបន្ទាន់ អង្គការ និងសមាគមអាចទំនាក់ទំនងមកកាន់ គ.ស.ម.ក. ដើម្បីជួយអន្តរាគមន៍ និងសម្របសម្រួលក្នុងការនាំកុមារទៅទទួលការព្យាបាលនៅមន្ទីរពេទ្យឱ្យបានទាន់ពេលវេលា។

ជាចុងក្រោយ ឯកឧត្តមទេសរដ្ឋមន្រ្តី បានផ្ដាំផ្ញើដល់គណៈគ្រប់គ្រង និងបុគ្គលិកនៃអង្គការ និងសមាគមទាំងអស់ ឱ្យបន្តយកចិត្តទុកដាក់ថែទាំកុមារ ដោយត្រូវចៀសវាងដាច់ខាតនូវការប្រព្រឹត្តអំពើមិនគប្បី ឬការរំលោភបំពានណាមួយទៅលើសិទ្ធិកុមារ ព្រមទាំងឱ្យប្អូនៗកុមារខិតខំប្រឹងប្រែងរៀនសូត្រ ដើម្បីក្លាយជាធនធានសម្រាប់សង្គមជាតិនាពេលអនាគត។ ទន្ទឹមនឹងនេះ ឯកឧត្តមទេសរដ្ឋមន្រ្តី បានបញ្ជាក់ពីការប្ដេជ្ញាចិត្តរបស់ គ.ស.ម.ក. ក្នុងការបន្តគាំទ្រ និងជួយឧបត្ថម្ភបន្ថែមទៀត ហើយក៏បានអំពាវនាវដល់សប្បុរសជនទាំងអស់ ឱ្យបន្តចូលរួមឧបត្ថម្ភគាំទ្រដល់អង្គការ សមាគម និងមណ្ឌលកុមារកំព្រាផ្សេងៗទៀត ដែលជាការបង្ហាញពីស្មារតីមនុស្សធម៌ វប្បធម៌ចែករំលែក និងការចូលរួមសកម្មក្នុងការលើកកម្ពស់ និងការពារសិទ្ធិកុមារនៅកម្ពុជា៕

ឯកឧត្តម​ទេសរដ្ឋមន្រ្តី កែវ​ រ៉េមី អញ្ជើញ​ជា​អធិបតី នៅ​ក្នុងពិធីបើកសិក្ខា​សាលា “ផ្សព្វផ្សាយរបាយការណ៍ជាតិ ស្តីពីយន្ដការ ពិនិត្យឡើងវិញជាសកលតាមកាលកំណត់ (UPR)”

=======================

បាត់ដំបង៖ នាថ្ងៃទី២៦ ខែឧសភា ឆ្នាំ២០២៦ ឯកឧត្តមទេសរដ្ឋមន្រ្តី កែវ រ៉េមី ប្រធានគណៈកម្មាធិការ​សិទ្ធិមនុស្សកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសិក្ខាសាលា “ផ្សព្វផ្សាយរបាយការណ៍ជាតិស្តីពីយន្តការពិនិត្យឡើងវិញជាសកលតាមកាលកំណត់ (UPR)” ក្រោមកិច្ចសហការវាងគណៈកម្មាធិការសិទ្ធិមនុស្ស កម្ពុជា ជាមួយរដ្ឋបាលខេត្តបាត់ដំបង នៅសាលប្រជុំសាលាខេត្តបាត់ដំបង ដោយមានការអញ្ជើញចូលរួមពី ឯកឧត្តម យឹម សៀប អភិបាលរងនៃគណៈអភិបាលខេត្តបាត់ដំបង តំណាងសាលាដំបូងខេត្ត អយ្យការអមសាលាដំបូងខេត្ត កងរាជអាវុធហត្ថ រដ្ឋបាលសាលាខេត្ត ពន្ធនាគារខេត្ត មន្ទីរ តំណាងសាលាស្រុក និងស្ថាប័នពាក់ព័ន្ធនានា អង្គការសង្គមស៊ីវិល ព្រមទាំងយុវជន ស.ស.យ.ក. ខេត្ត សរុប៣២០នាក់។

ថ្លែងក្នុងឱកាសនោះ ឯកឧត្តមទេសរដ្ឋមន្ត្រី បានមានប្រសាសន៍ថា យន្តការ UPR គឺជាយន្តការដ៏សំខាន់មួយរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ ដែលផ្តល់ឱកាសឱ្យប្រទេសសមាជិកទាំងអស់ចែករំលែកនូវឧត្តមានុវត្តន៍ និងផ្លាស់ប្តូរយោបល់គ្នាទៅវិញទៅមកលើវិស័យសិទ្ធិមនុស្ស។

ឯកឧត្តមទេសរដ្ឋមន្រ្តីបានគូសបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញយុទ្ធសាស្ត្របញ្ចកោណ និងកម្មវិធីអាទិភាពនានា ដើម្បីធានាស្ថិរភាពសង្គម និងជំរុញការអភិវឌ្ឍលើគ្រប់វិស័យ គឺជាបុរេលក្ខខណ្ឌនៃសិទ្ធិមនុស្ស និងស្របតាមអនុសាសន៍ដែលកម្ពុជាបានទទួលយកក្នុងក្របខណ្ឌ UPR។

ជាមួយគ្នានេះ ឯកឧត្តមទេសរដ្ឋមន្រ្តី បានលើកឡើងពីចំណុចជាអាទិភាព និងឈានមុខគេរបស់កម្ពុជា ក្នុង វិស័យសិទ្ធិមនុស្ស រួមមាន ការផ្តល់សច្ចាប័នលើលិខិតុបករណ៍សិទ្ធិមនុស្សអន្តរជាតិដ៏ច្រើនលើសលប់ ការ អនុញ្ញាតឱ្យមានវត្តមានការិយាល័យ OHCHR អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាព​សិទ្ធិមនុស្ស​ប្រចាំកម្ពុជា ការលុបចោលទោសប្រហារជីវិត សុខដុមនីយកម្មសាសនា និងការបើកទូលាយចំពោះសិទ្ធិសេរីភាពរបស់ក្រុមអ្នកស្រឡាញ់ភេទដូចគ្នា ជាដើម។

ចំពោះបញ្ហាព្រំដែនកម្ពុជា-ថៃ ឯកឧត្តមទេសរដ្ឋមន្រ្តី បានបញ្ជាក់ថា គណៈកម្មាធិការសិទ្ធិមនុស្សកម្ពុជា បានចូលរួមយ៉ាងសកម្មជាមួយរាជរដ្ឋាភិបាល ក្នុងការការពារបូរណភាពទឹកដី និងសិទ្ធិសេរីភាពរបស់ប្រជាជនកម្ពុជា តាមរយៈការចេញញត្តិថ្កោលទោស និងដាក់ពាក្យបណ្តឹងទៅកាន់យន្តការសិទ្ធិមនុស្សតំបន់ និងអន្តរជាតិចំនួន ៦០ច្បាប់ ព្រមទាំងការបំពេញបេសកកម្មសិទ្ធិមនុស្សនៅក្រុមប្រឹក្សាសិទ្ធិមនុស្សអង្គការសហប្រជាជាតិ នាទីក្រុងហ្សឺណែវ ប្រទេសស្វ៊ីស កាលពីខែមីនា ឆ្នាំ២០២៦ ផងដែរ។ ទន្ទឹមនេះ ឯកឧត្តមទេសរដ្ឋមន្រ្តី ក៏បានបន្ថែមថា ថ្នាក់ដឹកនាំកម្ពុជា ទាំងសម្ដេចតេជោ និងសម្ដេចធិបតី បានផ្ដល់តម្លៃយ៉ាងខ្ពស់ចំពោះអាយុជីវិត សុខសុវត្ថិភាព និងជីវភាពរស់នៅរបស់ប្រជាជនគ្រប់រូប តាមរយៈប្រកាន់យកការអត់ធ្មត់ជាអតិបរមា និងជម្រើសនៃការដោះស្រាយបញ្ហាដោយសន្ដិវិធី និងផ្អែកលើច្បាប់អន្តរជាតិ។

ជាងនេះទៀត ឯកឧត្តមទេសរដ្ឋមន្រ្តី បានលើកទឹកចិត្តដល់យុវជនឱ្យចូលរួមបំពេញកាតព្វកិច្ចយោធាឱ្យបានពេញលេញ ដោយចាត់ទុកថានេះជាឱកាសក្នុងការរួមចំណែកក្នុងការការពារបូរណភាពទឹកដី ក៏ដូចជាដើម្បីពង្រឹងសុខភាពទាំងផ្លូវកាយនិងផ្លូវចិត្ត ហើយត្រូវចៀសវាងជឿតាមការឃោសនាអកុសលណាមួយក្នុងចេតនាបន្ទច់បង្អាក់ការពង្រឹងខឿនការពារជាតិរបស់កម្ពុជាពីសំណាក់បច្ចាមិត្ត។ ឯកឧត្តមទេសរដ្ឋមន្រ្តីបានស្នើឱ្យបន្ដជឿជាក់និងទុកចិត្តលើរាជរដ្ឋាភិបាលក្នុងការដោះស្រាយរាល់បញ្ហា ព្រមទាំងត្រូវរួបរួមសាមគ្គីគ្នាជាធ្លុងមួយជាមួយរាជរដ្ឋាភិបាលក្នុងការការពារនិងកសាងជាតិឱ្យរីកចម្រើនជាលំដាប់៕
#យុទ្ធសាស្ត្របញ្ចកោណ #ធនធានមនុស្ស
https://chrc.gov.kh/
https://x.com/Cambodian_Human
www.tiktok.com/
https://www.youtube.com/
https://t.me/joinchat/QGc1YaLDAYgwODA1