Balance Biz

បុរសនៅអាស៉ីយើងភាគច្រើន មានទម្លាប់ម្ដាយថែ ម្ដាយបម្រើ។ សួរថា តើមានស្ត្រីជាម្ដាយនៅអាស៊ីយើងប៉ុន្មាននាក់ ដែលបង្រៀនការងារផ្ទះ និងផ្នត់គំនិតដែលទុកការងារទាំងនេះ ជារឿងទូទៅមិនប្រកាន់ភេទ ដល់កូនប្រុស ធ្វើឱ្យពួកគេមានទម្លាប់ចេះរស់នៅ ប្រើជីវិតដែលមានរបៀប និងអនាម័យ។

គឺតិចតួចណាស់ តែផ្ទុយទៅវិញភាគច្រើន បែរជាផ្ដោតតែលើកូនស្រីដោយបង្រៀនឱ្យពួកគេចេះប្រតិបត្តិប្ដី និងគ្រួសារ ដើម្បីធ្វើជាស្ត្រីមេផ្ទះដ៏ល្អ។ ផ្នត់គំនិតទាំងនេះ បានបន្តពីម្ដាយដល់កូន ពីកូនៗដែលនឹងក្លាយជាម្ដាយគេ រុញបន្តដល់កូនៗ ពីមួយជំនាន់ទៅមួយជំនាន់។

បុរសដែលទម្លាប់មានម្ដាយបម្រើតាំងពីតូចដល់ធំ និងនៅក្នុងផ្នត់គំនិតទាំងអស់នេះ ជាលទ្ធផលនៅពេលដែលពួកគេមានប្រពន្ធ ក៏ទុកប្រពន្ធ ដូចមកជំនួសតួនាទីម្ដាយ។ "ការផ្ដល់ឱ្យវាជាសុភមង្គល តែការប្រកាន់ទុកជាតួនាទី វាបានក្លាយទៅជាការអាប់អួរនៅក្នុងជីវិតគូរ។" មនុស្សពីរនាក់រួមរស់នៅក្រោមដំបូលតែមួយគួរតែចេះជួយគ្នា និងរៀនពីរបៀបរស់នៅបែបជីវិតគូ ដើម្បីសាងនូវសុភមង្គលគ្រួសារ។

តើមនុស្សស្រីមានសុភមង្គលយ៉ាងដូចម្ដេច នៅក្នុងលក្ខខណ្ឌដែលបុរសជាប្ដី មិនយល់ទុក្ខធុរ:ប្រពន្ធ ប្រកាន់ខ្លួនក្នុងកិច្ចការងារផ្ទះ "បងអត់ចេះ! អូនធ្វើទៅ! ក្រែងអូនឯងប្រពន្ធហ្អេ៎!"។ បុរសខ្លះ មិនត្រឹមតែមិនយល់ទេ ថែមទាំងទាញផ្នត់គំនិតមិនល្អជាប់ខ្លួនមកអនុវត្ត "ផឹកស៊ីជារឿងធម្មតា មានស្រីជារឿងធម្មតា!" ទាំងនេះហើយ ដែលជាមូលហេតុមួយ ដែលក្មេងៗជំនាន់ក្រោយដែលទទួលបានការអប់រំ ទាំងក្នុងសាលា និងសង្គម យល់ពីបញ្ហានេះ មិនអាចកែប្រែបញ្ហានេះ បានសម្រេចចិត្តនៅលីវ មិនរៀបការ មិនបង្កើតកូន។ សូមកុំស្ដីបន្ទោសដល់ពួកគេ តែអ្នកគួរកែប្រែវាឱ្យបានល្អ។

ការលើកតម្លៃក្មេងស្រី និងស្ត្រីដ៏ពិតប្រាកដ មិនមែនជាការដែលឱ្យបុរសយកលុយមកដណ្ដឹងមនុស្សស្រី ហើយបែរជាឱ្យមនុស្សស្រីប្រើពេញមួយជីវិតរបស់នាងទៅបម្រើប្ដី បង្កើតកូន មើលកូន ដោយទុក៖

-ការងារផ្ទះ ការបម្រើប្ដីជារឿងធម្មតា
-បុរស អត់ធ្វើការងារផ្ទះជារឿងធម្មតា
-បុរសមានស្រីក្រៅ ផឹកស៊ីជារឿងធម្មតា
-ប្ដីខឹង ទះមួយដៃ ជារឿងធម្មតាតិចតួច
-ប្ដីស្រែកគំហក ទ្រគោះបោះបោក ជាកំហឹង ជារឿងធម្មតា បាត់ខឹងលែងអីហើយ
-ការចាប់បង្ខំរួមភេទជារឿងធម្មតា ប្ដីប្រពន្ធឯងទេ!.. ។ល។

នេះឬជាការឱ្យតម្លៃ? ប្រពៃណីដែលល្អរក្សាចុះ តែសូម... សូម... ឱ្យការលើកកម្ពស់ស្ត្រី ឬលើលតម្លៃស្ត្រីពិតប្រាកដ "ផ្ដល់ឱ្យក្មេងស្រីនិងស្ត្រីទទួលបានសិទ្ធិ និងការការពារពិសេសពីសង្គម។" បើក្មេងស្រីឬស្ត្រីទាំងឡាយ សម្លឹងឃើញសុភមង្គលជីវិត ពួកគេនឹងរៀបការដោយមិនបាច់ចាប់បង្ខំហើយ កុំទៅភ័យ។

*និយាយមកដល់នេះក៏សូមជូនក្មេងស្រីៗ កុំស្អប់ ឬប្រកាន់ជ្រុល ការងារផ្ទះ ដូចដាំស្លរ រៀបចំផ្ទះសម្បែង គួររៀនឱ្យចេះ ឱ្យពូកែ មិនមែនទុកបម្រើអ្នកណាទេ តែវាជាបំណិនជីវិត។ វាជួយឱ្យជីវិតងាយស្រួល និងមានផាសុខភាព។ បងសូមផ្ដល់ឱវាទប៉ុន្មានឃ្លាទុកជាការពិចារណា ជាធម្មតា៖

"ខ្លាំងពូកែជាអាទិភាព ប៉ិនប្រសប់ជាភាពងាយស្រួល។ បើមានសមត្ថភាព វាគឺជាលទ្ធភាពនៃជម្រើស។ ភាពវៃឆ្លាត ធ្វើឱ្យយើងដឹងពីការប្រព្រឹត្តិស្របតាម កាល:ទេស: មនុស្ស ទីកន្លែង និងពេលវេលា ដែលធ្វើឱ្យសកម្មភាពរបស់យើងវាមានប្រសិទ្ធភាពខ្ពស់ ។ ឯរបៀបអប់រំចិត្ត(បញ្ញា) នេះវិញ ធ្វើឱ្យយល់ដល់ភាពស៊ីជម្រៅនៃការទទួល និងផ្ដល់ឱ្យ ដែលជាភាពសោយសុខ សន្តិភាព និងសុភមង្គលនៅក្នុងជីវិត។"

កុំប្រើជីវិតទៅបម្រើបុរសណា តែផ្ដល់ឱ្យ និងទទួលបានពីមនុស្សដែលសក្តិសម វាជាសុភមង្គល។ ហើយចាំបាច់មានចំណុច ដែលនិយាយខាងលើ ខ្លាំងពូកែ ប៉ិនប្រសប់ វៃឆ្លាត និងមានរបៀបអប់រំចិត្តល្អ។

*ក្មេងៗប្រុសៗក៏ដូចគ្នា កុំចាំនណាមកបម្រើ រៀនរស់នៅជាមួយបំណិនជីវិតទាំងនេះ ហើយទុកភាពប៉ិនប្រសប់ខ្លួនឯង ផ្ដល់ឱ្យ និងទទួលបានពីមនុស្សដែលសក្តិសម។ វាជាសមត្ថភាព និងជាសុខសុភមង្គលក្នុងជីវិត។ ចាំថាបុរសកើតមក ដើម្បីជួយឱ្យមានភាពល្អប្រសើរឡើង មិនមែនដើម្បីមកបន្ថែមបញ្ហា៕

រក្សាសិទ្ធិ: ស្នង នេត្រា
Pic: Pinterest