Multi-Knowledge

នាថ្ងៃទី ២៥ ខែមករា ឆ្នាំ២០២៦នេះ លោក លុយ ដាវីត ឯកអគ្គរាជទូតកម្ពុជាប្រចាំសាធារណរដ្ឋបារាំង បានបង្ហោះសារជាសំណេរនៅលើទំព័រហ្វេស ប៊ុក របស់លោកថា ប្រទេសបារាំងត្រៀមខ្លួនជាស្រេចក្នុងការផ្ដល់ឯកសារនិងផែនទីដើម្បីដោះស្រាយបញ្ហាព្រំដែនរវាងកម្ពុជានិងថៃនៅតុលាការយុត្តិធម៌អន្តរជាតិ (ICJ)។

ទាក់ទងទៅនឹងសារដែលលោកឯកអគ្គរាជទូតកម្ពុជាប្រចាំសាធារណរដ្ឋបារាំងបង្ហោះនេះដែរ លោកបណ្ឌិត គិន ភា អ្នកជំនាញវិទ្យាសាស្រ្តនយោបាយ ក៏បានបង្ហោះជាសំណេរនៅលើទំព័រហ្វេស ប៊ុករបស់លោកថា ការដោះស្រាយបញ្ហាព្រំដែនរវាងកម្ពុជានិងថៃដោយផ្អែកលើសន្ធិសញ្ញា កិច្ចព្រមព្រៀង និងផែនទីដែលទទួលស្គាល់ជាអន្តរជាតិក្រោមយន្តការការទូតនិងច្បាប់អន្តរជាតិ គឺជាជម្រើដ៏ល្អបំផុត ដើម្បីធានាបាននូវខ្សែបន្ទាត់ព្រំដែនមួយដែលច្បាស់លាស់ សន្តិភាព ស្ថិរភាព និងមិត្តភាព។ ប្រទេសបារាំងជាប្រភពឯកសារនិងផែនទីផ្លូវច្បាប់ដ៏សំខាន់បំផុតទាក់ទងនឹងព្រំដែនរវាងកម្ពុជានិងថៃ ព្រោះបារាំងជាម្ចាស់អាណានិគមលើប្រទេសកម្ពុជាជិតមួយសតវត្សរ៍។

លោកបណ្ឌិតបន្តថា “តែបញ្ហាស្មុគស្មាញនៅពេលនេះ គឺមិនមែនបញ្ហាឯកសារនិងផែនទីដែលទទួលស្គាល់ជាអន្តរជាតិទេ គឺភាពស្មោះត្រង់និងការប្តេជ្ញាចិត្តរបស់ភាគីថៃក្នុងការដោះស្រាយបញ្ហាព្រំដែនរវាងប្រទេសទាំងពីរដោយសន្តិវិធីឱ្យបានឆាប់តាមដែលអាចធ្វើបាន ព្រោះពួកគេនៅតែមានមហិច្ឆតាឈ្លានពានទឹកដីកម្ពុជាតទៅទៅទៀតដោយកម្លាំងបាយនិងច្បាប់ព្រៃ។”

លោកបណ្ឌិត គិន ភាព បានគូសបញ្ជាក់បន្ថែមថា “ដូច្នេះ សម្រាប់កម្ពុជា ក្រៅតែពីការប្រកាន់ខ្ជាប់នូវដំណោះស្រាយដោយសន្តិវិធីដោយឈរលើគោលការណ៍ច្បាប់អន្តរជាតិ កម្ពុជាត្រូវតែពង្រឹងសមត្ថភាពវិស័យការពារជាតិ សេដ្ឋកិច្ច ការទូត និងព័ត៌មានឱ្យបានរឹងមាំ ទន្ទឹមគ្នានឹងការពង្រឹងសាមគ្គីនិងឯកភាពជាតិក្នុងស្មារតីជាតិខ្មែរតែមួយ។ ការរើសអើង ការស្អប់ខ្ពើម និងការកាប់សម្លាប់គ្នាដោយហេតុផលនិងមនោគមវិជ្ជានយោបាយ ត្រូវតែបញ្ចប់ពីសង្គមយើង។ ឈាមខ្មែរយើងហូរច្រើនណាស់ហើយ, ហើយទឹកដីខ្មែរបានរួមតូចណាស់ទៅហើយដែរ បើយើងនៅតែឈ្លោះគ្នា ខ្មែរនឹងរលាយបាត់ពីផែនទីពិភពលោកនៅថ្ងៃណាមួយមិនខានឡើយ៕”

#ព្រំដែន #ថៃឈ្លានពានកម្ពុជា