Khan Chankolich

Brivia Group គឺជាក្រុមហ៊ុនអភិវឌ្ឍន៍អចលនទ្រព្យដ៏ធំមួយនៅទីក្រុងម៉ុងរ៉េអាល់ ប្រទេសកាណាដា ដែលមានលោក លី ខេង (Ly Kheng) ជាស្ថាបនិក និងនាយកប្រតិបត្តិ។ ក្រុមហ៊ុននេះបានអភិវឌ្ឍន៍គម្រោងជោគជ័យមួយចំនួននៅកណ្ដាលក្រុងម៉ុងរ៉េអាល់ មានដូចជា អគារខុនដូរភ្លោះ ៣៨ជាន់ YUL Condomuniums, អគារ ៣៦ជាន់ QuinzeCent, អគារ កម្ពស់ ៦១ជាន់ តម្លៃ ១,២ពាន់លានដុល្លារ 1 Square Phillips និងអគារខុនដូ Mansfield ជាដើម។ លោកត្រូវបានគេស្គាល់ច្រើននៅម៉ុងរ៉េអាល់ ប៉ុន្តែនៅកម្ពុជាមិនសូវស្គាល់ទេ។

លោក លី ខេង កើតក្នុងឆ្នាំ ១៩៧១ នៅរាជធានីភ្នំពេញ ជាកូនប្រុសពៅ នៃគ្រួសារដើមកំណើតចិនមួយដែលមានកូនសរុប ៨នាក់។ អំឡុងពេលរបបខ្មែរក្រហមចូលគ្រប់គ្រងភ្នំពេញ គាត់មានអាយុទើបតែ ៤ឆ្នាំប៉ុណ្ណោះ និងត្រូវបានខ្មែរក្រហមជម្លៀសជាមួយគ្រួសារចេញពីទីក្រុង ឲ្យទៅធ្វើពលកម្មនៅទីជនបទ។ បងស្រីរបស់លោកចំនួនពីរនាក់បានបាត់បង់ជីវិតក្នុងរបបដ៏ខ្មៅងងឹតនោះ បន្ទាប់មកលោកបានរស់នៅ និងធំធាត់ក្នុងជំរំភៀសខ្លួនមួយ។

នៅឆ្នាំ ១៩៨៨ ក្នុងអាយុ ១៨ឆ្នាំ លោក លី ខេង បានទៅដល់ទីក្រុងម៉ុងរ៉េអាល់ ប្រទេសកាណាដា និងទទួលបានអាហារូបករណ៍សិក្សាដោយឥតគិតថ្លៃ ប៉ុន្តែមិនយូរប៉ុន្មាន គាត់សម្រេចចិត្តឈប់រៀនដើម្បីធ្វើការជួយរកប្រាក់ផ្គត់ផ្គង់គ្រួសារ។ នេះបើតាមការចុះផ្សាយដោយកាសែត Montreal Gazette ចុះកាលពីឆ្នាំ ២០១៦។

លោកបានចូលធ្វើការនៅក្នុងរោងចក្រកាត់ដេរមួយ ក្រោយមកបានព្យាយាមបង្កើតអាជីវកម្មកាត់ដេរសម្លៀកបំពាក់ដោយខ្លួនឯង ប៉ុន្តែមកដល់ឆ្នាំ ២០០០ ឧស្សាហកម្មកាត់ដេរនៅកាណាដា កាលពីជំនាន់នោះបានធ្លាក់ចុះ ដោយសារតែរោងចក្រ និងអ្នកបញ្ជាទិញបានផ្លាស់ប្ដូរទៅប្រទេសក្រីក្រជំនួសវិញ។ ភ្លាមនោះ លោក លី ខេង បានប្រឡូកចូលក្នុងវិស័យអចលនទ្រព្យ ហើយបន្តិចម្ដងៗដល់ឆ្នាំ ២០១២ លោកបានផ្លាស់ប្ដូរឈ្មោះក្រុមហ៊ុនមកជា Brivia Group ជាផ្លូវការ ដោយដាក់តាមឈ្មោះកូនៗរបស់គាត់ រួចក៏បានចាប់ផ្ដើមអភិវឌ្ឍអគារខុនដូរកម្ពស់ខ្ពស់ចាប់ពីពេលហ្នឹងមក។

ថ្វីបើលោកសម្រេចបានភាពជោគជ័យជាច្រើនក្នុងវិស័យអចលនទ្រព្យនៅប្រទេសកាណាដាក៏ដោយ ប៉ុន្តែក្រុមហ៊ុន Brivia Group ពុំទាន់មានគម្រោងវិនិយោគនៅកម្ពុជានៅឡើយទេ។ យ៉ាងណាមិញ កាលពីខែមករាឆ្នាំ ២០២៦នេះ លោក លី ខេង បានធ្វើដំណើរមករាជធានីភ្នំពេញ ជាមួយគណៈប្រតិភូធុរកិច្ចកាណាដា និងបានចូលជួបពិភាក្សាជាមួយ សភាពាណិជ្ជកម្មកម្ពុជា ដឹកនាំដោយអ្នកឧកញ៉ា គិត ម៉េង ដោយបានបង្ហាញបំណងឈ្វេងយល់ពីទីផ្សារកម្ពុជា និងស្វែងរកកិច្ចសហការលើការវិនិយោគអចលនទ្រព្យរវាងកម្ពុជា កាណាដា និងសហរដ្ឋអាមេរិក។

ទោះជាមួយរយៈចុងក្រោយនេះ ក្រុមហ៊ុនរបស់លោកបានប្រឈមរឿងរ៉ាវមួយចំនួនពាក់ព័ន្ធនឹងគម្រោងអគារកម្ពស់ ៦០ជាន់ CURV នៅទីក្រុង Vancouver ក៏ដោយ ប៉ុន្តែដំណើររឿងរបស់លោក ដែលរួចផុតជីវិតក្នុងរបបប្រល័យពូជសាសន៍ខ្មែរក្រហម ប្រែក្លាយពីជនភៀសខ្លួនកម្ពុជា ដោយគ្មានអ្វីសោះក្នុងឆ្នាំ ១៩៨៨ បានកសាងអាណាចក្រអចលនទ្រព្យដ៏លេចធ្លោបំផុតមួយនៅទីក្រុងម៉ុងរ៉េអាល់ ប្រទេសកាណាដា គឺជារឿងដ៏គួរឲ្យចាប់អារម្មណ៍៕