Pu Nea

" តើអ្វីទៅហៅថា តម្លៃ? "

ឈើមួយដុំដូចគ្នា៖

ពាក់កណ្ដាលបានយកទៅឆ្លាក់ជារូប ព្រះពុទ្ធបដិមា រីឯពាក់កណ្ដាលទៀតបានយកទៅធ្វើជា កម្រាល។

កម្រាលឥដ្ឋមិនពេញចិត្តក៏និយាយថា៖ «យើងដើមឡើយជាឈើដុំតែមួយ ហេតុអ្វីបានជាគេដើរជាន់ខ្ញុំ តែបែរជាទៅគោរពបូជាអ្នកទៅវិញ?»

ព្រះពុទ្ធបដិមាឆ្លើយថា៖ «ដោយសារតែអ្នកគ្រាន់តែត្រូវគេកាត់ម្ដងប៉ុណ្ណោះ រីឯខ្ញុំវិញបានឆ្លងកាត់ការឆ្លាក់រាប់ពាន់ដង»។

គតិគួរពិចារណា ៖

ជីវិតមនុស្សក៏ដូចគ្នាដែរ ព្រោះ តម្លៃពិតនៃជីវិតមិនមែនស្ថិតនៅលើភាពងាយស្រួល ឬការជៀសផុតពីការលំបាកនោះទេ! ប៉ុន្តែ វាស្ថិតនៅលើ ឆន្ទៈក្នុងការត្រៀមខ្លួនរួចជាស្រេចដើម្បីឆ្លងកាត់ឧបសគ្គ និងតស៊ូជំនះរាល់បញ្ហាប្រឈមទាំងឡាយ។ រាល់ភាពលំបាកនីមួយៗប្រៀបដូចជាការឆ្លាក់រូបព្រះពុទ្ធបដិមាដូច្នោះដែរ ដែលទាមទារនូវភាពអត់ធ្មត់ តស៊ូ និងប្តេជ្ញាចិត្តខ្ពស់។ មានតែតាមរយៈបទពិសោធន៍ឈឺចាប់ទាំងនោះទេ! ទើបយើងអាចកែច្នៃខ្លួនឯងឱ្យទៅជាមនុស្សម្នាក់ដែលមាន ភាពរឹងមាំ គំនិតទូលំទូលាយ និងមានតម្លៃពិតប្រាកដ។

ដូច្នេះហើយ នៅពេលដែលអ្នកឃើញអ្នកដទៃទទួលបាន ជោគជ័យដ៏ត្រចះត្រចង់ មានជីវិតរីកចម្រើនលើសលប់ កុំមានចិត្តច្រណែនពួកគេអី! ព្រោះ ភាពថ្កុំថ្កើងទាំងនោះមិនមែនកើតឡើងដោយចៃដន្យនោះទេ! វាគឺជាផលផ្លែនៃការ លះបង់ដ៏ធំធេង តស៊ូយ៉ាងស្វិតស្វាញ ដួលហើយក្រោកឡើងវិញរាប់មិនអស់ និងបូជាទាំងកម្លាំងកាយចិត្តរបស់ពួកគេ។ ពួកគេបានហែលឆ្លងកាត់រាល់ព្យុះភ្លៀងជីវិតជាច្រើនលើកច្រើនសារ មុននឹងឈានដល់ចំណុចដែលពួកគេកំពុងតែឈរនៅសព្វថ្ងៃ...។

Ⓒ រក្សាសិទ្ធដោយ #ផ្នត់គំនិតសហគ្រិន