LDP FORCE

លោកពូ​ ៖​🙏🙏🙏
មេត្តា និងករុណាៈ
ចិត្តមានរចនាសម្ព័ន្ធបួន សញ្ញា វិញ្ញាណ វេទនា និងសង្ខារ។ នេះជាតួចិត្តដែលធ្វើពីកម្លាំងសុទ្ធ ចំណែកអាសវៈជាកុសលមេត្តា និងករុណាជាគ្រឿងសម្រាប់អោយចិត្តត្រាំនៅក្នុងវា។ ទឹកប្រៀបដូចជាចិត្តដែលមានខន្ធបួននោះ ហើយស្ករជាកុសលអាសវៈ។ ស្ករដាក់លាយនឹងទឹក វាចេញជាល្បាយទឹកស្ករ ពេលវិបស្សនាទៅជាព្រះអរហន្តគឺញែកកុសលធម៌នេះចេញពីចិត្ត។ កត្តញ្ញូគឺវិញ្ញាណដែលដឹងខុស ដឹងត្រូវ ដឹងឆ្គង ឬមិនឆ្គង គឺដឹងណា គឺដឹង គឺជាចរន្តដឹងខុស ដឹងត្រូវកម្រិតណាមួយនោះ វាជាខន្ធមួយរបស់ចិត្ត បញ្ញានៅជាប់នឹងវិញ្ញាណនេះ ជាសមត្ថភាពរបស់វិញ្ញាណ ដល់ពេលវិញ្ញាណចូលរួមជាមួយខន្ធបីទៀតបង្កើតជាចិត្ត យើងហៅចិត្តនោះថាជាចិត្តកត្តញ្ញូ ឬចិត្តដែលមានវិញ្ញាណដឹងខុស ដឹងត្រូវ ចិត្តមានបញ្ញា ចំណែកកុសលអាសវៈវាជាកម្លាំងធាតុល្អដើម្បីអោយចិត្តដេកត្រាំក្នុងវា ប៉ុន្តែទាំងអាសវៈ ទាំងចិត្តកើតមកពីកម្លាំងណា មិនមែនកើតពីធាតុទេ ដូច្នេះក្នុងមនោរម្មណ៍ក្មួយៗអ្នកអានត្រូវគិតវាក្នុងលក្ខណៈពិតរបស់វាគឺកម្លាំង។ ករុណាជាកម្លាំងធាតុទឹក វាមានពណ៌ស ជាកម្លាំងធាតុ មិនមែនធាតុទេ វាត្រជាក់ណាស់ គឺទឹកអម្រឹត ចិត្តដែលត្រាំជាមួយទឹកករុណានេះ គេហៅចិត្តនោះថាមានធម៌ករុណាគឺចិត្តល្អណាស់ ចិត្តចេះអាណិត អាសូរគេគ្រប់គ្នាគឺលក្ខណៈរបស់ចិត្តត្រូវធ្វើអោយល្អដោយសារទឹកករុណានេះដូចជាស្ករដែលគេដាក់លាយនឹងទឹក ទឹកដូចតួចិត្ត ស្ករដូចករុណា ចិត្តនេះក្លាយទៅជាចិត្តចេះអាណិតអាសូរគ្រប់តែមនុស្សគឺអាណិតអាសូរគ្រប់មនុស្ស នេះគឺចិត្តករុណា។ ចំណែកឯចិត្តអាណិតតែកូនឯង អាណិតតែគូភេទខ្លួនឯងជាដើម មិនមែនជាចិត្តលាយអាសវៈករុណានោះទេ។ សូមក្មួយៗចាប់ ហើយសម្គាល់ត្រង់នេះអោយបាន។ អាណិតតែកូនឯង អាណិតតែប្អូនឯង អាណិតតែគូភេទឯង នេះគឺសញ្ញាណាក្មួយ។ សញ្ញាវាប្រាប់ថាមុខនេះកូនអញ មុខនេះប្អូនអញ មុខនេះគូភេទអញ សញ្ញាជារចនាសម្ព័ន្ធមួយរបស់ចិត្ត។ ពេលដែលសញ្ញាតាមភ្នែកចាប់បានថានេះជាកូនឯង នេះគឺប្ដីឯង ប្រពន្ធខ្លួនឯង។ល។ វិញ្ញាណរបស់ចិត្តចាប់ផ្ដើមអាណិតភ្លាម នេះគឺជាលក្ខណៈរបស់វិញ្ញាណនៃចិត្តទេ មិនមែនលក្ខណៈរបស់អាសវៈករុណានៃចិត្តឡើយ គឺវាអាណិតតែសញ្ញាកូន សញ្ញាប្ដី សញ្ញាថាប្រពន្ធជាដើម នេះគឺប្រភេទចិត្តអាក្រក់ វាជាចិត្តដែលគ្មានកម្លាំងធាតុទឹកករុណារុំព័ទ្ធទេ ពេលបែកអត្ថិភាពជាមនុស្សទៅ ចិត្តនេះនឹងធ្វើគ្រោងវិញ្ញាណជានរក ប្រេតតិរច្ឆានហើយ ព្រោះវាគ្មានកម្លាំងនៃធាតុទឹកនៅរុំវាទេ។ វាមិនមែនជាចិត្តសត្វសួគ៌ឡើយ វាជាចិត្តនៃសត្វក្នុងដែនកម្លាំងធាតុភ្លើង។ ចំណែកមេត្តាក៏ដូចករុណាដែរ គឺជាកម្លាំងធាតុទឹក ចម្រាញ់អោយបានជាទឹកមានពណ៌ក្រហមដូចស្រាទំពាំងបាយជូ វានៅរុំចិត្ត អោយចិត្តមានមនោសញ្ចេតនា អោយចិត្តទទួលបានទឹកចិត្តរបស់គេ ខ្លួនក្លាយជាកក់ក្ដៅ ចិត្តស្គាល់អារម្មណ៍លះបង់ដែលពេញចិត្ត ស្គាល់អារម្មណ៍គោរព អារម្មណ៍នឹកឃើញអានុស្សាវរីយ៍ នេះគឺដោយសារចិត្តមានអាសវៈជាកុសលទៅរុំព័ទ្ធចិត្តគឺមេត្តានោះឯង។ ចំណែកស្រលាញ់តែកូនឯង ស្រលាញ់តែប្ដីឯង ប្រពន្ធឯងជាដើម គឺមិនមែនអាសវៈមេត្តាដែលធ្វើអោយចិត្តចេះស្រលាញ់អញ្ចឹងទេ គឺលក្ខណៈវិញ្ញាណទេព្រោះចិត្តមានសញ្ញា វេទនា សង្ខារ និងវិញ្ញាណ។ សញ្ញាប្រាប់ថាកូនឯងដូច្នេះវិញ្ញាណមិនដឹងខុស មិនដឹងត្រូវ ចាប់សញ្ញានេះភ្លាមហើយវេទនាគឺអារម្មណ៍ស្រលាញ់ ហើយសង្ខារក៏ប្រតិកម្មទាញចូលភ្លាម ស្រលាញ់តែកូនឯង បងឯង ប្អូនឯង គូភេទរបស់ខ្លួនឯង នេះមិនមែនអាសវៈមេត្តាធ្វើអោយចិត្តចេះស្រលាញ់នោះទេ តើក្មួយៗសម្គាល់ភាពខុសគ្នារវាងចិត្តចេះស្រលាញ់ ចិត្តចេះអាណិត ព្រោះសញ្ញាតាមទ្វារភ្នែកបានអោយសញ្ញាទៅវិញ្ញាណជាខន្ធមួយរបស់ចិត្តថានេះគឺកូន នេះគឺម្ដាយឪពុក ថានេះគឺគូភេទរបស់ខ្លួន មិនមែនចិត្តរុំព័ទ្ធដោយអាសវៈជាកម្លាំងធាតុទឹកមានឈ្មោះថាមេត្តានោះទេ។ តើវិញ្ញាណរបស់ក្មួយៗចាប់បានភាពខុសគ្នារវាងចិត្តស្រលាញ់ ហើយនិងអាសវៈចិត្តមានឈ្មោះមេត្តាដែលរុំព័ទ្ធចិត្តធ្វើអោយចិត្តចេះស្រលាញ់នេះទេ? ស្រលាញ់តែកូនឯង តែម្ដាយឪពុកឯង តែគូភេទខ្លួន មិនមែនមានអាសវៈមេត្តាជាកម្លាំងធាតុទឹករុំព័ទ្ធចិត្តនោះ គឺចិត្តរបស់សត្វក្នុងទុគ្គតិភពមាននរក មានប្រេត មានតិរច្ឆានជាដើមនោះហើយ។ ពូសុំរំលឹកក្មួយៗថា កម្លាំងធាតុទឹកមេត្តា និងករុណាដែលរុំព័ទ្ធចិត្តសត្វ នាំអោយចិត្តសត្វមិនអាចទៅចុតិ បដិសន្ធិនៅក្នុងដែនកម្លាំងធាតុក្តៅមាននរកប្រេតនោះទេ។ តើក្មួយៗចាប់បានត្រង់ចំនុចនេះទេ? វាសំខាន់ខ្លាំងណាស់ ក្មួយៗត្រូវសញ្ជឹងគិតអោយវិញ្ញាណរបស់ក្មួយស្រូបបាននូវដំណើរធម្មជាតិនៃចិត្តត្រង់ចំណុចនេះណាក្មួយ។ ចិត្តស្រលាញ់ ចិត្តអាណិតព្រោះសញ្ញាប្រាប់ថាជារបស់អញគឺស្រលាញ់ដើម្បីអញ មិនមែនស្រលាញ់ ឬអាណិតដោយអាសវៈមេត្តា និងករុណាដែលស្រលាញ់ និងអាណិតបានជាផ្ដល់អោយនោះទេ។ ស្រលាញ់ អាណិតព្រោះសញ្ញាអញគឺទាញចូល ស្រលាញ់អាណិតព្រោះមេត្តា និងករុណាគឺផ្ដល់អោយ៕