rabii3brahim

✌🏽🇵🇸

عاد ماني نعرف نكتب
ونحذق ترصيف الكلام.
ونعرف ننزل عالفلسة نخطف تصويرة
نركّحها على طرف لساني ونترجمها حروف.
و ماني زادة ما نحيرش في الكلمة
و وقت إلّي نحكي نقول
و وقت الي نقول ،نفكّ وذنّ ،تخمامة، ضحكة، قْحرة، تلكيشة ..
تي سَبّة ، سِبٍة ، ثنيّة ، جبدان حديث، بَدوة حكاية ...
ماني زادا ملسن و قحبون و نعشق ظربان...
وخانة مع بتّة مع نشّة على شَلّة
ريق ، ترييق ، ترونيق
لوغة ،تلويغة، تجوليغة
كلامجي، كلايمي، متكلّماني
حدّاث ، حدايثي ، مِتْحدّثْ
تي خرارْفي ، خرّاف
وزّان ، وصّاف
قْاتل الثنايا و مرطّب الأحراف...
و كي نشوفك؟؟؟!!!
تي ماني هذا الكل ،و شي آخر ،و شيّ من هذا ، و من هذا حتّى شيّ...
وَالُو...
جِملة...
وتقْول..
عقّْون وكواك حشّام محدود..
مسكّر ،مغلقْ، مربّط، كلمتين على بعضهم ما نعرفش نركّبهم،
تي مُغط، عصّ رزين ، دمّ ثقيل ، جبالك الرواسي،
(براس أمك لحظة صاحبي (صديقتي) بش نسئلك؛ صارتلك باز في مرحلة من حياتك انك تشوف وحدة (واحد)جونر في العطار في المرشي في إدارة في الفوروج..
تعيش معاه (ا ) قصة حب بينك و بين روحك؟؟ تحكيو تقطعو بعضكم حبّ، تتناقشوا تتعاركو تعملوا الساكس تسافروا...
" في راسك." وتوفا القصّة في لحظة وقت اللي يقلّك لي وراك في الصّفّ قدّم معلّم برسّمّك مزروووبيييين راااناا!! و يزيد يعطيك نقرة على مؤخّرتك ... توفا الحكاية وإنتي ما بديتهاش...)
و كي نشوفك؟؟؟!!!
نعاود نصغر نتصنّت نتعلّم نتستسين نكبر نتمكّن ونعاود ننسى
نعاود نصغر نتصنّت نتعلّم نتستسين نكبر نتمكّن ونعاود ننسى
نعاود نصغر نتصنّت نتعلّم نتستسين نكبر نتمكّن ونعاود ننسى
؟؟
وانا نقعد (راكبتلي) قحبون و في بالي
وأنتي تقعد زبّور و فيبالك...
13/04/18